Duvvada Srinivas: రాజకీయాల్లో చాలా అంశాలు పనిచేస్తాయి. దూకుడు ఎంతగా ఉపయోగపడుతుందో.. అంతలా మైనస్ చేస్తుంది. ఈ విషయంలో ఎమ్మెల్సీ దువ్వాడ శ్రీనివాస్ చక్కటి ఉదాహరణ. చాలా దూకుడుతో యువనేతగా రాజకీయాల్లోకి వచ్చారు. అంతే దూకుడుతో ఇబ్బందులు తెచ్చుకున్నారు. ప్రస్తుతం పొలిటికల్ జంక్షన్ లో నిలబడ్డారు. అరెస్టుల భయంతో ప్రస్తుతం పరారీలో ఉన్నారు. అసలు దువ్వాడ శ్రీనివాస్ ను ఆదరించే పార్టీ ఏది అనే చర్చ బలంగా నడుస్తోంది. ఆయనను భరించే శక్తి ఏ పార్టీకి లేదన్నది శ్రీకాకుళం పొలిటికల్ సర్కిల్స్ లో ఒక మాట.
యువజన కాంగ్రెస్ ద్వారా ఎంట్రీ..
యువజన కాంగ్రెస్ ద్వారా రాజకీయాల్లోకి వచ్చారు దువ్వాడ శ్రీనివాస్. ఈయనతో పాటు రాజకీయ అరంగేట్రం చేసిన చాలా మంచి నేతలుగా ఎదిగారు. కానీ దువ్వాడ శ్రీనివాస్ మాత్రం ఆ స్థాయికి చేరుకోలేకపోయారు. కేవలం దూకుడుతో చేసిన రాజకీయాల మూలంగానే ఆయనకు ఇబ్బందులు ఎదురయ్యాయి. రాజకీయ ప్రత్యర్థులుగా కింజరాపు కుటుంబం ఉంది. కానీ పార్టీలో ప్రత్యర్థులుగా ధర్మాన కుటుంబాన్ని మార్చుకున్నారు దువ్వాడ. మారుతున్న రాజకీయ పరిణామాలకు అనుగుణంగా తన ఆలోచనలను మార్చుకోలేకపోయారు. ఆపై కుటుంబ కలహాలతో తన పొలిటికల్ జీవితాన్ని తానే నాశనం చేసుకున్నారు.
నిత్యం ఓటమి..
2000లో యువజన కాంగ్రెస్ జిల్లా కార్యదర్శిగా ఉండేవారు దువ్వాడ శ్రీనివాస్. తెలుగుదేశం పార్టీ హయాంలో చాలా దూకుడుగా వ్యవహరిస్తూ యువనేతగా గుర్తింపు సాధించారు. 2006లో జడ్పిటిసి గా ఎన్నికయ్యారు. జిల్లా పరిషత్ వైస్ చైర్మన్ గా ఎంపికయ్యారు. 2009లో ప్రజారాజ్యం పార్టీ ఆవిర్భావంతో ఆ పార్టీలో చేరారు. టెక్కలి నుంచి పోటీ చేసి మూడో స్థానానికి పరిమితం అయ్యారు. అక్కడ నుంచి తిరిగి వైయస్సార్ కాంగ్రెస్ పార్టీలో చేరారు. 2014 ఎన్నికల్లో టెక్కలి అసెంబ్లీ నియోజకవర్గం నుంచి పోటీ చేసి ఓడిపోయారు. 2019లో శ్రీకాకుళం పార్లమెంట్ స్థానం నుంచి పోటీ చేసి ఓడిపోయారు. 2024 లో టెక్కలి నుంచి పోటీ చేసిన దువ్వాడకు ఓటమి తప్పలేదు.
ప్రత్యర్ధులతో పాటు శత్రువులు..
అయితే దువ్వాడ శ్రీనివాస్ దూకుడు మూలంగా రాజకీయంగా ప్రత్యర్ధులు ఉన్నారు. ఆయన పని చేసే పార్టీలోనే ప్రత్యర్ధులుగా చాలామంది నేతలను మార్చుకుంటారు. కాంగ్రెస్ పార్టీలో ఉన్నా.. వైయస్సార్ కాంగ్రెస్ పార్టీలో ఉన్నా.. ధర్మాన బ్రదర్స్ తో శత్రుత్వం పెంచుకున్నారు. అదే సమయంలో కింజరాపు ఫ్యామిలీని శాశ్విత ప్రత్యర్థులుగా మార్చుకున్నారు. ఈ క్రమంలో సొంత పార్టీ శ్రేణులతో సఖ్యతగా మెలగాల్సిన ఆయన.. వారితో విభేదాలు పెంచుకుంటూ తన పొలిటికల్ కెరీర్ కు ఇబ్బందులు తెచ్చుకున్నారు. రాజకీయాల్లో వ్యూహాలు ఉండాలే కానీ.. దూకుడు తనం ఎల్లకాలం పనిచేయదు అనడానికి.. దువ్వాడ శ్రీనివాస్ పొలిటికల్ లైఫ్ ఒక ఉదాహరణ.
