WhatsApp Username Feature: ప్రపంచవ్యాప్తంగా అత్యధిక మంది ఉపయోగించే మెసేజింగ్ యాప్ వాట్సాప్. దీని మాతృసంస్థ మరో కీలక ప్రైవసీ ఫీచర్ను అందుబాటులోకి తీసుకొచ్చింది. ఇప్పటి వరకు కొత్త వ్యక్తితో చాట్ చేయాలంటే తప్పనిసరిగా ఫోన్ నంబర్ షేర్ చేయాల్సి వచ్చేది. అయితే ఇప్పుడు ‘యూజర్నేమ్’ ఫీచర్తో ఆ అవసరం లేకుండా పోనుంది. ముందుగా యూజర్నేమ్ను రిజర్వ్ చేసుకునే అవకాశాన్ని వాట్సాప్ దశలవారీగా అందుబాటులోకి తీసుకొస్తోంది. ఇది ఎలా ఉంటుంది? దీనిని ఎలా పొందాలి? ఎటువంటి ప్రయోజనాలు ఉంటాయి?
మొబైల్స్ లో యాప్స్ యూజ్ చేసేవారికి యూజర్నేమ్ అనేది ప్రత్యేకంగా ఉండే ఒక గుర్తింపు పేరు. భవిష్యత్తులో కొత్త వ్యక్తులతో మాట్లాడేటప్పుడు ఫోన్ నంబర్కు బదులుగా ఈ యూజర్నేమ్ను షేర్ చేస్తే సరిపోతుంది. దీంతో వ్యక్తిగత మొబైల్ నంబర్ను తెలియజేయాల్సిన అవసరం ఉండదు. ముఖ్యంగా అపరిచితులు, వ్యాపార సంబంధాలు లేదా గ్రూపుల్లో పాల్గొనే వారికి ఈ ఫీచర్ మరింత ఉపయోగపడనుంది.
తాజా వాట్సాప్ వెర్షన్ను అప్డేట్ చేసిన తర్వాత యాప్ ఓపెన్ చేస్తే కొంతమందికి యూజర్నేమ్ రిజర్వేషన్కు సంబంధించిన నోటిఫికేషన్ కనిపిస్తోంది.నోటిఫికేషన్ రాకపోతే..Settings → Account → Username లేదా కొన్ని డివైస్లలో ప్రొఫైల్ సెక్షన్లో Create Username లేదా Reserve Username అనే ఆప్షన్ కనిపించవచ్చు. దీనిని సెట్ చేసుకోవచ్చు. అయితే ఈ ఫీచర్ ప్రస్తుతం దశలవారీగా విడుదల అవుతున్నందున అందరికీ ఒకేసారి అందుబాటులో ఉండదు.
ఒకే డిజిటల్ గుర్తింపును కొనసాగించాలనుకునే వారికి వాట్సాప్ మరో సౌకర్యాన్ని కల్పిస్తోంది. ఇప్పటికే ఇన్స్టాగ్రామ్ లేదా ఫేస్బుక్లో ఉపయోగిస్తున్న యూజర్నేమ్ అందుబాటులో ఉంటే దానినే వాట్సాప్లో కూడా క్లెయిమ్ చేసుకునే అవకాశం ఉంటుంది. ఇది ముఖ్యంగా కంటెంట్ క్రియేటర్లు, చిన్న వ్యాపారాలు, సంస్థలకు ఉపయోగకరంగా ఉంటుంది.
ఈ ఫీచర్లో ప్రధాన ఉద్దేశం యూజర్ల వ్యక్తిగత సమాచారాన్ని మరింత సురక్షితంగా ఉంచడం. యూజర్నేమ్ ద్వారా సంప్రదించినప్పుడు మీ ఫోన్ నంబర్ ఎదుటి వ్యక్తికి కనిపించదు. అలాగే వాట్సాప్లో యూజర్నేమ్ల కోసం పబ్లిక్ డైరెక్టరీ లేదా సెర్చ్ లిస్ట్ ఉండదు. ఎవరైనా మిమ్మల్ని సంప్రదించాలంటే మీ ఖచ్చితమైన యూజర్నేమ్ తెలుసుకోవాల్సిందే. దీంతో అనవసర సందేశాలు, స్పామ్ తగ్గే అవకాశం ఉంటుంది. సోషల్ మీడియా ఇన్ఫ్లుయెన్సర్లు, వ్యాపార సంస్థలు, ఫ్రీలాన్సర్లు, విద్యార్థులు, ఉద్యోగులు, అలాగే కొత్త వ్యక్తులతో తరచూ కమ్యూనికేట్ చేసే వారికి ఈ ఫీచర్ ఎంతో ప్రయోజనకరంగా ఉంటుంది. వ్యక్తిగత మొబైల్ నంబర్ను గోప్యంగా ఉంచుతూ సురక్షితంగా సంభాషణలు కొనసాగించేందుకు ఇది కొత్త మార్గాన్ని అందిస్తుంది.
