Shubman Gill IND vs AFG: ఆఫ్ఘనిస్తాన్ జట్టుతో ఒక టెస్ట్, 3 వన్డేల సిరీస్ కోసం బీసీసీఐ భారత జట్టును ప్రకటించింది. మన దేశం వేదికగా జూన్ నెలలో ఈ సిరీస్ లు జరుగుతాయి. టెస్ట్, వన్డేలకు టీమిండియా సారధిగా గిల్ వ్యవహరిస్తాడు.
గిల్ సారధిగా ఉంటాడని కోచ్ అజిత్ చెప్పడం స్పోర్ట్స్ వర్గాలను ఆశ్చర్యపరిచింది. ఎందుకంటే టీమిండియా వన్డే సారధిగా గిల్ ను తప్పించి అయ్యర్ ను నియమిస్తారని కొద్దిరోజులుగా ప్రచారం జరుగుతోంది. ఎందుకంటే వన్డేలలో గిల్ నాయకత్వంలో టీమిండియా ఆశించిన స్థాయిలో విజయాలు సాధించలేకపోతోంది. దీనికి తోడు గిల్ వ్యక్తిగత ప్రదర్శన కూడా అంత గొప్పగా లేదు. టెస్టులలో కూడా గిల్ అంతంతమాత్రంగానే ఆడుతున్నాడు. దీంతో అతని స్థానంలో అయ్యర్ కు నాయకత్వ బాధ్యతలు అప్పగిస్తారని ప్రచారం జరిగింది.
సారధి మార్పుపై భారత క్రికెట్ నియంత్రణ మండలి పెద్దలు అధికారికంగా ప్రకటన చేయకపోయినప్పటికీ.. పరోక్షంగా అదేవిధమైన సంకేతాలు ఇచ్చారు. అయితే ఈ ఐపీఎల్ ప్రారంభంలో పంజాబ్ జట్టు సారధిగా ఉన్న అయ్యర్.. జట్టుకు వరుస విజయాలు సాధించి పెట్టాడు. ఆ తర్వాత వరుస ఓటములతో పంజాబ్ ప్రస్థానం ప్రశ్నార్థకంగా మారింది. దీంతో ఆ జట్టు ప్లే ఆఫ్ వెళ్లే అవకాశం లేకుండా పోయింది. వరుస విజయాలు సాధించిన ఆ జట్టు.. ఇప్పుడు వరుస ఓటములతో ఇబ్బంది పడుతోంది. చివరికి ప్లే ఆఫ్ వెళ్లడానికి ఇతర జట్ల గెలుపుల మీద ఆధార పడాల్సిన దుస్థితి నెలకొంది.
పంజాబ్ జట్టును సమర్థవంతంగా నడిపించలేకపోయాడనే కారణంతో అయ్యర్ ను సారధిగా ఎంపిక చేయలేదని తెలుస్తోంది. అందువల్లే అతనికి వన్డే జట్టులో అవకాశం కల్పించారు. ఇటీవల ఆస్ట్రేలియా జట్టుతో వన్డే సిరీస్ లో ఆడుతున్నప్పుడు అయ్యర్ గాయపడ్డాడు. చాలా రోజుల వరకు క్రికెట్ కు దూరంగా ఉన్నాడు. ఇప్పుడు ఐపీఎల్ లో సత్తా చూపిస్తున్నాడు. ఆఫ్ఘనిస్తాన్ జట్టుతో జరిగే సిరీస్లో కాకున్నా.. వచ్చే సిరీస్ లో నైనా అతడికి సారధిగా అవకాశం లభించవచ్చని స్పోర్ట్స్ వర్గాలలో ప్రచారం జరుగుతోంది.
