Mahakumbh 2025
Mahakumbh 2025: ప్రపంచంలోనే అతిపెద్ద ఆధ్యాత్మిక కార్యక్రమం.. ఎవరూ ఆహ్వానించకుండానే కోట్లాది మంది అక్కడికి తరలి వస్తారు. ఎవరూ సూచించకుండానే ఆధ్యాత్మిక కార్యక్రమాలు పెద్ద ఎత్తున జరుగుతాయి. ఇసుక వేస్తే రాలనంత జనం అక్కడకు చేరుకుంటారు. త్రివేణి సంగమం తీరంలో మహా కుంభమేళా సందర్భంగా ఇక్కడ కోట్లాది మంది ఆధ్యాత్మిక భావాలలో మునిగిపోతారు. భూమిపై అత్యధిక సంఖ్యలో భక్తులు హాజరయ్యే గొప్ప ఆధ్యాత్మిక వేడుక. ఒకే చోట ఇంత మంది ప్రజలు గుమిగూడే ఈ మతపరమైన ఉత్సవం అంతరిక్షం నుండి చూడగలిగే అరుదైన వేదిక. ఇది హిందువుల అతిపెద్ద సమావేశం అయినప్పటికీ, స్వదేశీ.. విదేశాల నుండి లెక్కలేనంత మంది కూడా ఇందులో పాల్గొంటారు. ఈ కారణంగా యునెస్కో గుర్తింపు పొందిన ఈ మహా కుంభమేళా ప్రపంచానికి గొప్ప పండుగగా నిలుస్తుంది. ఇది ప్రతి 12 సంవత్సరాలకు కోటి మంది భక్తులను స్వాగతిస్తుంది. సంక్రాంతి నుండి శివరాత్రి వరకు ఈ ప్రాంతం 45 రోజుల పాటు భక్తుల ఆనందోత్సాహాలతో నిండి ఉంటుంది.
2025 మహా కుంభమేళాను సురక్షితంగా, చక్కగా నిర్వహించడానికి పోలీసు యంత్రాంగం కూడా పూర్తిగా సిద్ధంగా ఉన్నట్లు కనిపిస్తోంది. భద్రతా సంస్థలు పూర్తిగా అప్రమత్తంగా ఉన్నాయి. గట్టి భద్రతా ఏర్పాట్లను నిర్ధారించడానికి ఉత్తరప్రదేశ్ పోలీసులు, కుంభమేళా పోలీసులు, NSG, ATS, NDRF,ఇతర పారామిలిటరీ దళాలు నిరంతరం మాక్ డ్రిల్‌లను నిర్వహిస్తున్నాయి. అత్యవసర సమయాల్లో మహా కుంభ్ లో పాల్గొనే భక్తులకు మెరుగైన భద్రత కల్పించడం ఈ మాక్ డ్రిల్ ల ప్రధాన లక్ష్యం.
శనివారం, NSG, UP ATS (ఉగ్రవాద నిరోధక దళం), NDRF (జాతీయ విపత్తు ప్రతిస్పందన దళం), జల పోలీసులు ప్రయాగ్‌రాజ్‌లోని బోట్ క్లబ్‌లో సంయుక్తంగా మాక్ డ్రిల్‌ను నిర్వహించాయి. ఈ కసరత్తులో ఉగ్రవాద దాడి దృశ్యం క్రియేట్ చేశారు. దీనిలో బందీలను తీసుకోవడంతో పాటు ఉగ్రవాదులు తీసుకెళ్లే డర్టీ బాంబు కూడా ఉంది. NSG బృందాలు SDRF పడవ ద్వారా , రోడ్డు ద్వారా రెండు దిశల నుండి లక్ష్యాన్ని చేరుకున్నాయి. బందీలను విడిపించి భవనంలో CBRN (రసాయన, జీవ, రేడియోలాజికల్, న్యూక్లియర్) ముప్పును తటస్థీకరించడాన్ని ప్రదర్శించాయి.
మాక్ డ్రిల్‌లో NSG అద్భుతమైన ప్రదర్శన
మాక్ డ్రిల్ సమయంలో NSG కమాండోలు ఉగ్రవాదుల బందీలుగా ఉన్న భక్తులను రక్షించడం, బాంబు పేలుడు నుండి ప్రజలను రక్షించడం, లైవ్ బాంబును నిర్వీర్యం చేయడం వంటి వాటిని ప్రదర్శించారు. మహా కుంభ్ లో NSG బృందాలు కూడా మోహరించబడతాయి. ఈ బృందాలు డర్టీ బాంబులు, ఆత్మాహుతి దాడులు , రసాయన, జీవ, రేడియోలాజికల్ మరియు అణు ముప్పులను ఎదుర్కోగల పూర్తి సామర్థ్యాన్ని కలిగి ఉన్నాయి.
రసాయన దాడిని ఎదుర్కోవడానికి NDRF సిద్ధం
మహా కుంభమేళా సమయంలో రసాయన దాడి జరిగినా ఎదుర్కోవడానికి NDRF బృందాలు మాక్ డ్రిల్‌లు కూడా నిర్వహించాయి. ఈ కాలంలో అత్యవసర పరిస్థితుల్లో త్వరిత ప్రతిస్పందన కోసం ప్రణాళికను పరీక్షించారు. రసాయన, ఇతర ప్రమాదాల ప్రభావాన్ని తగ్గించడంలో..సహాయక చర్యలలో NDRF బృందాలు తమ సామర్థ్యాన్ని నిరూపించుకుంటున్నాయి.
