TANA : ఉత్తర అమెరికా తెలుగు సంఘం (తానా) తన సేవా కార్యక్రమాల పరంపరలో భాగంగా న్యూజెర్సీలోని ఫ్రీహొల్డ్ బరో స్కూల్ విద్యార్థులకు స్కూల్ బ్యాగులను పంపిణీ చేసింది. ఈ కార్యక్రమంలో సుమారు 200 మంది విద్యార్థులకు బ్యాక్ప్యాక్లు మరియు పాఠశాల అవసరమైన సామాగ్రి అందజేశారు.
ఈ సేవా కార్యక్రమంలో స్థానిక స్కూల్ అధికారులు, పోలీస్ అధికారులు మరియు తానా ప్రతినిధులు పాల్గొని విద్యార్థులకు స్వయంగా బ్యాగులను అందించారు. అమెరికాలోని తెలుగు కమ్యూనిటీకి తాము చేయగలిగినంత సేవ అందించాలన్న ఉద్దేశ్యంతో తానా ఈ కార్యక్రమాన్ని చేపట్టిందని నిర్వాహకులు తెలిపారు.
తానా అధ్యక్షులు నరెన్ కొడాలి, ఉపాధ్యక్షులు శ్రీనివాస్ లావు మార్గదర్శకత్వంలో ఈ కార్యక్రమం జరిగింది. న్యూజెర్సీ ప్రాంతీయ ప్రతినిధి సుధీర్ చంద్ర నారెపలుపు, స్కూల్ నిర్వాహకులతో కలిసి ఈ పంపిణీని సమన్వయపరిచారు. కార్యక్రమ విజయవంతం కోసం కృషి చేసిన తానా కోశాధికారి రాజా కసుకుర్తికి ప్రత్యేక ధన్యవాదాలు తెలిపారు.
ఈ సందర్భంగా తానా ప్రతినిధులలో రాజా కసుకుర్తి, సుధీర్ చంద్ర నారెపలుపు, యూత్ కోఆర్డినేటర్ శ్రీనివాస్ చెరుకురి, ఫౌండేషన్ ట్రస్టీలు శ్రీనివాస్ ఒరుగంటి, సతీష్ మేకా, అలాగే సేవకులు సుధీర్ రామపురం, ఉమా రవి, కిరణ్ భాసన, వెంకట్ పుసులూరి, రామకృష్ణ చెరుకురి పాల్గొన్నారు.
ఫ్రీహొల్డ్ బరో స్కూల్ టీచర్లు, నిర్వాహకులు మాట్లాడుతూ – “తానా కమ్యూనిటీ ఎల్లప్పుడూ సమాజానికి ఉపయోగపడే విధంగా సేవా కార్యక్రమాలు నిర్వహిస్తోంది. మా స్కూల్ను ఎంపిక చేసి విద్యార్థులకు స్కూల్ బ్యాగులు అందజేయడం ఆనందంగా ఉంది” అని తెలిపారు.
విద్యార్థుల తల్లిదండ్రులు కూడా తానా ప్రతినిధులకు ధన్యవాదాలు తెలుపుతూ, ఇలాంటి కార్యక్రమాలు పిల్లలకు ఎంతగానో తోడ్పడతాయని అభినందనలు తెలిపారు.
