TANA 5K Run In Charlotte: ఉత్తర అమెరికా తెలుగు సంఘం (తానా) ఆధ్వర్యంలో సెప్టెంబర్ 21వ తేదీన నార్త్ కరోలినా రాష్ట్రంలోని ఛార్లెట్–కాంకర్డ్లోని ఫ్రాంక్లిస్కే పార్క్లో నిర్వహించిన 5కె రన్/వాక్ కార్యక్రమం ఘనవిజయాన్ని సాధించింది. కమ్యూనిటీ నుంచి అపూర్వమైన స్పందన లభించగా, సుమారు 300 మంది ఎన్నారైలు కుటుంబాలతో కలిసి పాల్గొని ఈ కార్యక్రమాన్ని విజయవంతం చేశారు.
ఈ కార్యక్రమాన్ని తానా టీమ్ స్క్వేర్ నిధుల సేకరణ కోసం స్థానిక తానా నాయకులు సమన్వయించారు. చిన్నారుల నుండి పెద్దల వరకు అన్ని వయస్సుల వారు ఇందులో ఉత్సాహంగా పాల్గొన్నారు. పాల్గొన్న ప్రతి ఒక్కరికీ ఉచిత టీ-షర్టులు అందించగా, ఎలిమెంటరీ, మిడిల్, హైస్కూల్ విద్యార్థుల కోసం ప్రత్యేకంగా నిర్వహించిన పోటీల్లో విజేతలకు నగదు బహుమతులు అందజేశారు. చిన్నారులను ప్రోత్సహిస్తూ అందరికీ రుచికరమైన దక్షిణ భారత అల్పాహారం వడ్డించారు.
ఈ కార్యక్రమంలో ప్రత్యేక ఆకర్షణగా డైనమిక్ యాంకర్, సర్టిఫైడ్ యోగా ఇన్స్ట్రక్టర్ సౌమ్యశ్రీ తలంకి పాల్గొని అందరినీ ఉత్సాహపరిచారు. అదే విధంగా సర్టిఫైడ్ జుంబా ఇన్స్ట్రక్టర్ మౌనిక కవలి తన హై-ఎనర్జీ జుంబా ప్రదర్శనతో వాతావరణాన్ని మరింత ఉత్సాహభరితంగా మార్చారు. ఈ కార్యక్రమానికి మార్గదర్శకులుగా మారథాన్ రన్నర్, తానా కమ్యూనిటీ సర్వీస్ అవార్డు గ్రహీత నవీన్ అప్పలనేని సేవలందించారు. ఆయన అంకితభావం, నాయకత్వం అందరికీ ఆదర్శంగా నిలిచింది.
కార్యక్రమ సమన్వయకర్తలలో తానా అప్పలాచియన్ రీజినల్ ప్రతినిధి రవి వడ్లమూడి (నాని), తానా స్పెషల్ ప్రాజెక్ట్స్ కో ఆర్డినేటర్ నాగమల్లేశ్వర పంచుమర్తి, తానా టీమ్ స్క్వేర్ చైర్మన్ కిరణ్ కొత్తపల్లి, తానా ఫౌండేషన్ ట్రస్టీ ఠాగూర్ మల్లినేని, తానా హెల్త్ సర్వీసెస్ కో ఆర్డినేటర్ మాధురి ఏలూరి, తానా రైతుకోసం చైర్ రమణ అన్నే, పట్టాభి కంఠంనేని తదితరులు ఉన్నారు.
రన్ ముగిసిన తర్వాత జరిగిన సమావేశంలో తానా నాయకులు మాట్లాడుతూ తానా టీమ్ స్క్వేర్ ద్వారా ఎన్నో సేవా కార్యక్రమాలు జరుగుతున్నాయని వివరించారు. ఈ 5కె రన్ను విజయవంతం చేసినందుకు పాల్గొన్న ప్రతి ఒక్కరికీ, వాలంటీర్లకు, స్పాన్సర్లకు ప్రత్యేక ధన్యవాదాలు తెలిపారు.
ఛార్లెట్లో జరిగిన ఈ తానా 5కె రన్ ఎన్నారై కమ్యూనిటీ ఐక్యతను, తెలుగు వారి సేవా స్పూర్తిని ప్రతిబింబిస్తూ ఒక జ్ఞాపకార్థకమైన కార్యక్రమంగా నిలిచింది.
