Python And Anaconda: పాము పేరు వినగానే చాలామందికి భయం వేస్తుంది. ప్రపంచవ్యాప్తంగా దాదాపు 3,900 నుండి 4,000 వరకు పాము జాతులు ఉన్నాయి. వీటిలో దాదాపు 600 జాతులు మాత్రమే విషపూరితమైనవి కాగా, అందులోనూ కేవలం 200 నుండి 250 రకాల పాములు మాత్రమే ఒకే కాటుతో మనిషిని చంపేంత ప్రమాదకరమైన విషాన్ని కలిగి ఉన్నాయి. వీటిలో భారీ పరిమాణం కారణంగా పైథాన్ (Python), ఆనకొండ (Anaconda) ప్రత్యేక గుర్తింపు పొందాయి. ఇవి విషపూరిత పాములు కాకపోయినా, తమ బలమైన శరీరంతో ఆహారాన్ని బిగించి చంపే శక్తి కలిగి ఉంటాయి. చూడటానికి రెండూ ఒకేలా కనిపించినా, వీటి నివాస ప్రాంతాలు, పరిమాణం, జీవన విధానంలో అనేక తేడాలు ఉన్నాయి.
పైథాన్ అంటే ఏమిటి?
Python ప్రపంచంలోని అతిపెద్ద పాములలో ఒకటి. ఇవి ప్రధానంగా ఆసియా, ఆఫ్రికా, ఆస్ట్రేలియా ప్రాంతాల్లో కనిపిస్తాయి. భారతదేశంలో కూడా ఇండియన్ రాక్ పైథాన్ జాతి విస్తృతంగా కనిపిస్తుంది. అడవులు, గడ్డి మైదానాలు, చిత్తడి నేలలు వంటి ప్రాంతాల్లో ఇవి నివసిస్తాయి. పైథాన్లు సాధారణంగా 3 నుంచి 7 మీటర్ల పొడవు వరకు పెరుగుతాయి. కొన్ని జాతులు 8 మీటర్లకు పైగా కూడా పెరిగినట్లు నమోదైంది.
ఆనకొండ అంటే ఏమిటి?
Anaconda ప్రపంచంలోనే అత్యంత బరువైన పాముగా ప్రసిద్ధి చెందింది. ఇవి ప్రధానంగా దక్షిణ అమెరికాలోని అమెజాన్ అడవులు, నదులు, చిత్తడి ప్రాంతాల్లో జీవిస్తాయి. ముఖ్యంగా గ్రీన్ ఆనకొండ అత్యంత భారీ జాతిగా గుర్తింపు పొందింది. కొన్ని ఆనకొండలు 9 మీటర్లకు పైగా పొడవు, 200 కిలోలకుపైగా బరువు కలిగి ఉంటాయి.
ఎక్కడ నివసిస్తాయి?
పైథాన్లు ఎక్కువగా భూమిపై, చెట్లపై సంచరిస్తాయి. ఇవి నీటిలో ఈదగలిగినా, ఎక్కువ సమయం నేలపైనే గడుపుతాయి. మరోవైపు ఆనకొండలు నీటి జీవనానికి ఎక్కువగా అలవాటు పడ్డాయి. నదులు, సరస్సులు, చిత్తడి నేలల్లో ఎక్కువ సమయం గడుపుతాయి. వాటి కళ్ళు, ముక్కు భాగం తలపై ఉండటం వల్ల నీటిలో దాగి వేటాడేందుకు అనుకూలంగా ఉంటుంది.
పరిమాణం, బరువులో ఎవరు పెద్దవి?
పొడవు పరంగా చూస్తే కొన్ని పైథాన్ జాతులు ఆనకొండలతో సమానంగా లేదా కొద్దిగా ఎక్కువగా ఉండొచ్చు. కానీ బరువు విషయంలో ఆనకొండ స్పష్టంగా ముందుంటుంది. దీని బరువు సుమారు 30 నుంచి 80 కిలోల వరకు ఉంటుంది. పైథాన్, ఆనకొండ రెండూ విషరహిత పాములే. ఇవి తమ ఆహారాన్ని కాటేసి విషంతో చంపవు. బదులుగా ఆహారాన్ని చుట్టుముట్టి బలంగా బిగించి శ్వాస ఆడకుండా చేసి చంపుతాయి. తర్వాత మొత్తం మింగేస్తాయి. జింకలు, అడవి పందులు, పక్షులు, కోతులు వంటి జంతువులు వీటి ఆహారంగా ఉంటాయి. పెద్ద ఆనకొండలు కొన్ని సందర్భాల్లో కైమన్ మొసళ్లు, అడవి జంతువులను కూడా వేటాడగలవు.
సాధారణంగా పైథాన్లు, ఆనకొండలు మనుషులను చూసి దాడి చేయవు. అవి ప్రమాదంగా భావించినప్పుడు మాత్రమే ప్రతిస్పందిస్తాయి. అయితే వాటి భారీ పరిమాణం కారణంగా చాలా దగ్గరగా వెళ్లడం ప్రమాదకరం. ప్రపంచవ్యాప్తంగా కొన్ని అరుదైన సందర్భాల్లో మాత్రమే పెద్ద పాముల దాడుల ఘటనలు నమోదయ్యాయి.
