Vijay Rahul Gandhi friendship : విజయ్ ఎక్కువ సీట్లు సాధించారు. అలాగని టీవీకే అధినేతగా తమిళనాడులో ప్రభుత్వాన్ని ఏర్పాటు చేసే సామర్థ్యం ఆయనకు లేదు. ఈ లోగానే కాంగ్రెస్ పార్టీ అగ్ర నాయకుడు రాహుల్ గాంధీకి ఆయన ఫోన్ చేశారు. మద్దతు ఇవ్వాలని కోరారు. దానికి రాహుల్ గాంధీ ఒప్పుకున్నారు. కమ్యూనిస్టులు ఇబ్బంది పెట్టినప్పటికీ.. మిగతా పార్టీలు గోడ మీది పిల్లుల మాదిరిగా వ్యవహరించినప్పటికీ.. కాంగ్రెస్ మాత్రం తాను ఇచ్చిన మాటకు కట్టుబడి ఉంది. డీఎంకేతో ఇబ్బందికరమైన వాతావరణం వస్తుందని తెలిసినప్పటికీ.. ఇండియా కూటమిలో రకరకాల సమస్యలు వస్తాయని అంచనా ఉన్నప్పటికీ కాంగ్రెస్ పార్టీ బేషరతు గా మద్దతు ప్రకటించింది.
వాస్తవానికి విజయ్ ఫోన్ చేయగానే రాహుల్ గాంధీ ఎలా ఒప్పుకున్నారు.. పైగా ముఖ్యమంత్రిగా ప్రమాణ స్వీకారం చేస్తున్న క్రమంలో రాహుల్ గాంధీ విజయ్ పక్కన కూర్చున్నారు. ఆయన ముఖ్యమంత్రిగా ప్రమాణ స్వీకారం చేస్తున్నప్పుడు.. తొలి ఫైల్ మీద సంతకం పెడుతున్నప్పుడు గట్టిగా చప్పట్లు కొట్టారు. ఆ తర్వాత విజయ్ తో కలసి పార్టీ కార్యకర్తలకు అభివాదం చేశారు. స్వల్ప కాలంలో ఇద్దరి మధ్య ఈ స్థాయిలో స్నేహం ఎలా కుదిరింది.. ఇది ఎలా సాధ్యమైందని పొలిటికల్ వర్గాల్లో ప్రచారం జరుగుతోంది.
రాహుల్ గాంధీకి, విజయ్ కి ఏర్పడిన స్నేహం ఈనాటిది కాదు. 2009 నుంచి వీరిద్దరి మధ్య పరిచయం ఉంది. 2009లో కాంగ్రెస్ పార్టీలో చేరాలని విజయ్ అనుకున్నారు. అప్పట్లో విజయ్ తండ్రి చంద్రశేఖర్ రాహుల్ గాంధీతో సమావేశమయ్యారు. నాటి రోజుల్లో కాంగ్రెస్ పార్టీ కేంద్రంలో అధికారంలో ఉంది. అప్పుడు యువజన కాంగ్రెస్ బాధ్యతలను రాహుల్ చూస్తున్నారు. విజయ్ కి తమిళనాడులో యువజన కాంగ్రెస్ అధ్యక్ష పదవిని కూడా ఇస్తామని చెప్పారు. ఏం జరిగిందో తెలియదు అది కార్యరూపం దాల్చలేదు.
సరిగ్గా 17 సంవత్సరాల తర్వాత తమిళనాడు రాజకీయాలలో పరిణామాలు పూర్తిగా మారిపోయాయి. నాడు కాంగ్రెస్లో చేరాలనుకున్న విజయ్ టీవీకే పార్టీ ఏర్పాటు చేశారు. పార్టీ ఏర్పాటుచేసిన స్వల్ప కాలంలోనే అధికారంలోకి వచ్చారు. ఆయన ఆధ్వర్యంలో ఏర్పాటు అయిన ప్రభుత్వానికి రాహుల్ గాంధీ సపోర్ట్ చేయాల్సి వచ్చింది. ఇప్పటివరకు కాంగ్రెస్ నేతలు డీఎంకేతో పొత్తు పెట్టుకున్నారు. ఇటీవల ఎన్నికల్లో కూడా డీఎంకేతో కలిసి కాంగ్రెస్ పార్టీ పోటీ చేసింది. కేవలం ఐదు స్థానాలు మాత్రమే గెలిచింది. రాష్ట్రంలో కాంగ్రెస్ పార్టీ ప్రాధాన్యం పూర్తిగా తగ్గుతున్న నేపథ్యంలో.. విజయ్ పార్టీతో ఏర్పరచుకున్న పొత్తు ప్రాధాన్యం సంతరించుకుంది.
రాహుల్ గాంధీకి ప్రత్యేకమైన భావజాలం ఉంటుంది. దానికి విజయ్ సరిగ్గా సరిపోతాడని రాహుల్ గాంధీ భావిస్తున్నట్టు తెలుస్తోంది. ఇక ఇటీవల జరిగిన తమిళనాడు ఎన్నికల్లో డీఎంకే నిర్వహించిన అనేక సమావేశాలకు కాంగ్రెస్ పార్టీ అధినేత రాహుల్ గాంధీ హాజరు కాలేదు. ఇవన్నీ కూడా విజయ్ తో ఉన్న స్నేహానికి నిదర్శనమని కాంగ్రెస్ పార్టీ నేతలు అంటున్నారు. ప్రమాణ స్వీకార కార్యక్రమంలో విజయ్ రాహుల్ గాంధీని ఉద్దేశించి బ్రదర్ అని వ్యాఖ్యానించారు.. దానికంటే ముందు రాహుల్ గాంధీకి విజయ్ తన ప్రమాణ స్వీకారానికి రావాలని కోరితే.. తప్పకుండా వస్తానని రాహుల్ బదులిచ్చారు. ఇచ్చిన మాటను రాహుల్ గాంధీ నిలబెట్టుకున్నారు. ఫలితంగా విసికె, ఐయూఎంఎల్, వామపక్ష పార్టీల సపోర్ట్ తో విజయ్ పార్టీ అధికారాన్ని దక్కించుకుంది. ముఖ్యమంత్రిగా విజయ్ ప్రమాణ స్వీకారం చేశారు.
