TANA Father’s Day Walk : ఉత్తర అమెరికా తెలుగు సంఘం (తానా) మిడ్-అట్లాంటిక్ ప్రాంతం ఆధ్వర్యంలో నిర్వహిస్తున్న సామాజిక, సాంస్కృతిక కార్యక్రమాల పరంపర విజయవంతంగా కొనసాగుతోంది. జూలై 2025 నుంచి నిరంతరాయంగా వివిధ కార్యక్రమాలను నిర్వహిస్తూ తెలుగు సమాజాన్ని ఒక్క తాటిపైకి తీసుకువస్తున్న తానా మిడ్-అట్లాంటిక్, తాజాగా తన 40వ కార్యక్రమంగా ‘నాన్నతో నడక’ పేరుతో ప్రత్యేక వేడుకను ఘనంగా నిర్వహించింది.
ఫాదర్స్ డే సందర్భంగా జూన్ 21న పెన్సిల్వేనియాలోని వ్యాలీ ఫోర్జ్ నేషనల్ హిస్టారికల్ పార్క్లో నిర్వహించిన ఈ కార్యక్రమం తండ్రి-పిల్లల అనుబంధానికి ప్రతీకగా నిలిచింది. కుటుంబ సభ్యులతో కలిసి పాల్గొన్న ప్రతి ఒక్కరికీ తమ నాన్నతో గడిపిన మధుర జ్ఞాపకాలను మరోసారి గుర్తు చేస్తూ ఈ కార్యక్రమం భావోద్వేగభరితంగా సాగింది.
ఈ కార్యక్రమంలో తానా అధ్యక్షుడు డా. నరేన్ కొడాలి, తానా బోర్డ్ డైరెక్టర్ రవి పొట్లూరి, తానా మిడ్-అట్లాంటిక్ రీజినల్ రిప్రజెంటేటివ్ ఫణి కంతేటి, తానా బెనిఫిట్ కోఆర్డినేటర్ వెంకట్ సింగు పాల్గొని కార్యక్రమాన్ని విజయవంతం చేశారు. వారి మార్గదర్శకత్వం, ప్రోత్సాహంతో కార్యక్రమం మరింత ఆకర్షణీయంగా సాగింది.
ఈ వేడుకకు ప్రముఖ సినీ నటుడు సుమన్ తల్వార్ ముఖ్య అతిథిగా హాజరై ప్రత్యేక ఆకర్షణగా నిలిచారు. ప్రతి వ్యక్తి జీవితంలో తండ్రి పాత్ర ఎంత గొప్పదో ఆయన తన ప్రసంగంలో హృదయాన్ని హత్తుకునేలా వివరించారు. అనంతరం తండ్రులు, పిల్లలతో కలిసి ఫోటోలు దిగుతూ అందరితో ఆత్మీయంగా మమేకమయ్యారు.
కార్యక్రమంలో ప్రముఖ కళాకారుడు మిమిక్రీ రమేష్ తన వినోదభరితమైన ప్రదర్శనలు, పాటలతో ప్రేక్షకులను అలరించారు. అలాగే మఖ్దూమ్ సయ్యద్, ఉమాకాంత్ తమ స్ఫూర్తిదాయకమైన సందేశాలతో కుటుంబ విలువలు, తల్లిదండ్రుల పట్ల గౌరవం గురించి మాట్లాడి కార్యక్రమానికి మరింత విలువను తీసుకొచ్చారు.
దాదాపు 200 మందికి పైగా తండ్రులు, పిల్లలు పాల్గొన్న ఈ కార్యక్రమం ఆత్మీయ వాతావరణంలో విజయవంతంగా ముగిసింది. కార్యక్రమం నిర్వహణలో కీలక పాత్ర పోషించిన సురేష్ యలమంచికి నిర్వాహకులు ప్రత్యేక కృతజ్ఞతలు తెలిపారు. అలాగే సునీల్ కోగంటి, రంజిత్ మామిడి, శ్రీధర్ సాదినేని, దీప్తి కోక, సంతోష్ రౌతు, చలం పావులూరి, కృష్ణ నందమూరి, విశ్వనాథ్ కోగంటి, ప్రసాద్ కస్తూరి తదితరుల సహకారాన్ని అభినందించారు.
ఈవెంట్ విజయవంతానికి అహర్నిశలు శ్రమించిన వాలంటీర్లకు ‘వాలంటీర్ సర్వీస్ అవర్ సర్టిఫికేట్లు’ అందజేసి వారి సేవలను గుర్తించారు. కార్యక్రమానికి విచ్చేసిన వారందరికీ రుచికరమైన మధ్యాహ్న భోజనాన్ని ఏర్పాటు చేయడంతో పాటు, కుటుంబ సభ్యులు కలిసి ఆనందంగా గడిపేలా పలు కార్యకలాపాలు నిర్వహించారు. జూలై 2025 నుంచి వరుసగా 40 కార్యక్రమాలను విజయవంతంగా నిర్వహించిన తానా మిడ్-అట్లాంటిక్, తెలుగు సంఘానికి సేవ చేయడంలో మరో మైలురాయిని ఈ ‘నాన్నతో నడక’ కార్యక్రమం ద్వారా నమోదు చేసింది.
