Tamil Nadu CM Vijay: జోసెఫ్ విజయ్ అనే నేను.. అనే పదంతో మొదలుపెట్టిన విజయ్.. ప్రమాణ స్వీకారంలో ఆద్యంతం గంభీరంగా మాట్లాడాడు. ఇన్ని రోజులపాటు తనలో ఉన్న ఒత్తిడి మొత్తాన్ని అధిగమించి.. ప్రభుత్వ ఏర్పాటు విషయంలో ఎదురైన ఇబ్బందులను తట్టుకొని.. అతడు ప్రభుత్వాన్ని ఏర్పాటు చేశాడు. డీఎంకే, అన్నా డిఎంకె సపోర్ట్ లేకుండానే ప్రభుత్వాన్ని ఏర్పాటు చేసుకున్నాడు. ద్వారా విజయ్ ద్రావిడ విధానం లేకుండానే తొలిసారిగా తమిళనాడులో ప్రభుత్వాన్ని ఏర్పాటు చేసి సరికొత్త రికార్డు సృష్టించాడు.
కాంగ్రెస్ పార్టీ, కమ్యూనిస్టులు, ఐఎంయూల్, వీసీకే ను ఒప్పించి.. ప్రభుత్వాన్ని ఏర్పాటు చేయించడం అంటే మామూలు విషయం కాదు. విజయ్ కి ఎటువంటి రాజకీయ అనుభవం లేకపోయినప్పటికీ.. తనవెంట కాకలు తీరిన రాజకీయ పండితులు లేకపోయినప్పటికీ విజయ్ బలమైన అడుగులు వేశారు. గవర్నర్ పదేపదే ఇబ్బంది పెడుతున్నప్పటికీ.. నిబంధనల పేరుతో ప్రభుత్వాన్ని ఏర్పాటు చేయించకుండా అడ్డుపడుతున్నప్పటికీ విజయ్ ఏ మాత్రం ధైర్యాన్ని కోల్పోలేదు. పైగా మహాబలిపురంలో ఉన్న తన ఎమ్మెల్యేలకు ఎప్పటికప్పుడు ధైర్యం చెప్పుకుంటూ వచ్చారు. ఫలితంగా విజయ్ ప్రభుత్వాన్ని ఏర్పాటు చేసి రాజకీయ పండితులను సైతం ఆశ్చర్యానికి గురి చేశారు.
ప్రమాణస్వీకారంలో జోసెఫ్ విజయ్ అనునాన్ (అనే నేను) తో మొదలు పెట్టిన విజయ్.. ఆ తర్వాత ప్రమాణస్వీకారంలో పేపర్ చూడలేదు.. గవర్నర్ వైపు కన్నెత్తి చూడలేదు. “తమిళనాడు అభ్యున్నతి కోసం కట్టుబడి ఉన్నాను. నన్ను నమ్మి ఓటు వేసిన ప్రజలకు కచ్చితంగా గొప్ప పరిపాలన అందిస్తాను. తమిళనాడు రాష్ట్రాన్ని గొప్పగా నిలబెడతాను. ఈ పదవిని అందించిన మీకు జన్మజన్మలా కృతజ్ఞుడిగా ఉంటాను.. విజయ్ మీకు సేవ చేయడానికి ఇక్కడికి వచ్చాడు. మీ సేవలో నిత్యం తరిస్తూ ఉంటాడని” విజయ్ భావోద్వేగంగా మాట్లాడాడు. విజయ్ మాట్లాడుతున్నంతసేపు అక్కడ వాతావరణం బాహుబలి 2 సినిమాను గుర్తు చేసింది.
అందులో ప్రభాస్ ప్రమాణస్వీకారం విషయంలో ఏమాత్రం వెనుకడుగు వేయడు. పైగా ప్రమాణ పత్రం చూడకుండానే ప్రసంగిస్తుంటాడు. అతడు ప్రమాణం చేస్తున్నంత సేపు ఏనుగులు.. సైనికులు గట్టిగా నినాదాలు చేస్తూ ఉంటారు. దీంతో రాజమాత శివగామి దేవి ఆశ్చర్య పోతుంది. అంతేకాదు రాజు భల్లాలదేవ నెత్తి మీద ఉన్న చత్రం కింద పడుతుంది. దానిని పట్టుకున్న బాహుబలి.. రాజును రక్షిస్తాడు. అటువంటి సన్నివేశమే విజయ్ ప్రమాణ స్వీకారం సందర్భంగా చోటుచేసుకుంది.
