PAN 2.0 Digital India: పాన్.. ఇన్కం ట్యాక్స్ చెల్లింపులో ఒక అద్భుతం. పన్ను ఎగవేతదారులను పట్టించే ఆయుధం. అయితే ఇప్పటికీ చాలా మంది ఈ పాన్ను కూడా దుర్వినియోగం చేస్తున్నారు. పన్ను ఎగవేతకు అడ్డదారులు వెతుకుతున్నారు. పాన్లోని లోపాలు వారికి కలిసి వస్తున్నాయి. ఈ నేపథ్యంలో కేంద్రం 2026లో పాన్ 2.0ను ప్రవేశపెట్టాలని నిర్ణయించింది. ఇది పన్ను సంబంధిత సేవలను ఒకే డిజిటల్ వేదికపై ఏకీకృతం చేయడం ద్వారా పౌరులకు సౌలభ్యాన్ని అందించనుంది. క్యాబినెట్ కమిటీ ఆన్ ఎకనామిక్ అఫైర్స్ (సీసీఈఏ)ఆమోదంతో రూ.1,435 కోట్ల బడ్జెట్తో, ఐటీ దిగ్గజం ఎల్టీఐమైండ్ట్రీ ఈ ప్రాజెక్టును అభివృద్ధి చేసి నిర్వహించనుంది.
Also Read: రెచ్చగొట్టకు.. భారత్ తో పెట్టుకుంటే పోతావ్ రా ‘‘భుట్టో
పాన్ 2.0 ప్రత్యేకత..
ప్రస్తుతం, పాన్ (పర్మనెంట్ అకౌంట్ నంబర్), టీఏఎన్ (టాక్స్ డిడక్షన్ అండ్ కలెక్షన్ అకౌంట్ నంబర్) సేవలు ఇన్కమ్ టాక్స్ ఈ–ఫైలింగ్ పోర్టల్, యూటీఐఐటీఎస్ఎల్, ప్రొటీన్ (గతంలో ఎన్ఎస్డీఎల్) వంటి బహుళ వేదికలపై విస్తరించి ఉన్నాయి. పాన్ 2.0తో, ఈ సేవలన్నీ ఒకే కేంద్రీకృత డిజిటల్ ఇంటర్ఫేస్లో అందుబాటులోకి వస్తాయి. ఇది పౌరులకు సమయం ఆదా చేయడమే కాక, కాగితం లేని ప్రక్రియలను ప్రోత్సహిస్తుంది. పాన్ 2.0 వివిధ సంస్కరణలను తీసుకొస్తుంది, ఇవి ఖాతాదారుల అనుభవాన్ని మెరుగుపరుస్తాయి:
సేవలన్నీ ఒకే వేదికపై..
ప్రస్తుతం పాన్ దరఖాస్తు, సవరణలు, ఆధార్ లింకింగ్, ధ్రువీకరణల కోసం బహుళ వెబ్సైట్లను ఉపయోగించాల్సి ఉంటుంది, ఇది సంక్లిష్టంగా ఉంటుంది.పాన్ 2.0లో అన్ని సేవలు ఒకే వేదికపై అందుబాటులో ఉంటాయి, ఇది వినియోగదారులకు సౌలభ్యాన్ని, సమయం ఆదాను అందిస్తుంది. ఇప్పటికే పాన్ కార్డు ఉన్నవారు కొత్త దరఖాస్తు చేయనవసరం లేదు. ప్రస్తుత పాన్ నంబర్ పాన్ 2.0 కింద పూర్తిగా చెల్లుబాటవుతుంది. ఇది ఖాతాదారులకు ఆర్థిక, సాంకేతిక భారాన్ని తగ్గిస్తుంది. పాన్ వివరాల సవరణలు ఉచితంగా ఉంటాయి. సవరించిన ఈ–పాన్ నేరుగా రిజిస్టర్డ్ ఈమెయిల్కు పంపబడుతుంది. ఇది వేగవంతమైన, ఖర్చు లేని సేవలను అందిస్తూ, డిజిటల్ పరివర్తనను ప్రోత్సహిస్తుంది.
మెరుగైన క్యూఆర్ కోడ్..
పాన్ కార్డులపై ఉన్న క్యూఆర్ కోడ్ కేంద్రీకృత డేటాబేస్ నుంచి తాజా సమాచారాన్ని ప్రదర్శిస్తుంది. గుర్తింపు ధ్రువీకరణ వేగవంతంగా, సురక్షితంగా జరుగుతుంది, మోసాలను తగ్గిస్తుంది. డిజిటల్ ఇండియా మిషన్లో భాగంగా, పాన్ బహుళ ప్రభుత్వ సేవలకు యూనివర్సల్ డిజిటల్ ఐడెంటిటీగా మారవచ్చు. ఇది పౌరులకు ఒకే గుర్తింపుతో బహుళ సేవలను యాక్సెస్ చేసే సౌలభ్యాన్ని అందిస్తుంది.
ఖాతాదారులు పొందే మార్పు..
ఇప్పటి పాన్ కార్డులు ఎటువంటి మార్పు లేకుండా చెల్లుబాటవుతాయి. క్యూఆర్ కోడ్ లేని కార్డుల ఉన్నవారు, ప్రస్తుత లేదా కొత్త వ్యవస్థలో రీప్రింట్ కోసం దరఖాస్తు చేయవచ్చు. పాన్ 2.0 అమలులోకి వచ్చిన తర్వాత, సవరణలు, ధ్రువీకరణలు వేగవంతంగా, పూర్తిగా డిజిటలైజేషన్ సేవలు అందుబాటులోకి వస్తాయి.
Also Read: ఇండియా అంటే ట్రంప్ కే కాదు.. అభివృద్ధి చెందిన దేశాలన్నిటికి వణుకు అందుకే!
పాన్ 2.0 భారతదేశంలో పన్ను సంబంధిత సేవలను సరళీకరించడంతోపాటు, డిజిటల్ గుర్తింపు వ్యవస్థ వైపు ఒక ముఖ్యమైన అడుగుగా నిలుస్తుంది. ఇప్పటి పాన్ కార్డు హోల్డర్లకు ఎటువంటి ఇబ్బంది లేకుండా, ఉచిత సవరణలు, వేగవంతమైన ఈ–పాన్ సేవలు, మెరుగైన ధ్రువీకరణ వంటి ప్రయోజనాలు అందిస్తుంది.
