toddler abuse case Kerala : ఆ బాలుడు వయసు ఏడాదిన్నర.. వచ్చిరాని మాటలతో.. తప్పటడుగులతో ఇల్లంతా సందడి చేసేవాడు.. అటువంటి ఆ బాలుడి ఒంటిమీద 51 గాయాలున్నాయి. దేహం మీద సిగరెట్ వాతలు ఉన్నాయి. అంతర్గతంగా రక్త స్రావం జరిగింది. అతడిని రోజుల తరబడి కొట్టారు. చిత్రహింసలు పెట్టారు. దీంతో ఆ బాలుడు కన్నుమూశాడు. ఆ బాలుడు చనిపోవడానికి ప్రధాన కారణం తల్లి అయితే.. రెండవ కారణం ఆమె ప్రియుడు.
కేరళ రాష్ట్రంలో మే 29న ఒక బాలుడి హత్య కేసు వెలుగులోకి వచ్చింది. నెడుమంగాడు అనే ప్రాంతంలో అఖిల అనే మహిళకు గతంలోనే వివాహం జరిగింది. వీరికి హర్షత్ అనే బాబు పుట్టాడు. బాబు పుట్టిన కొద్ది రోజులకే అఖిల భర్త చనిపోయాడు. దీంతో ఆమె అష్కర్ అనే వ్యక్తికి దగ్గర అయింది. ఇతడికి కూడా గతంలో వివాహం జరిగింది. భార్యను తీవ్రంగా వేధింపులకు గురిచేస్తున్న నేపథ్యంలో ఆమె విడాకులు తీసుకుంది. అఖిలను ట్రాప్ చేసి అతడు.. తన వశం చేసుకున్నాడు.
అతడి మాయ నుంచి బయటికి రాలేకపోయిన అఖిల తన కుమారుడిని తల్లిదగ్గర వదిలేసి వెళ్ళింది. తన అమ్మమ్మ దగ్గర ఉన్నంతవరకు హర్షత్ బాగానే ఉన్నాడు.. కానీ, ఎప్పుడైతే అఖిల అతడిని తన వెంట తీసుకెళ్లిందో అప్పటినుంచి కష్టాలు మొదలయ్యాయి. అష్కర్ పదేపదే ఆ బాలుడిని కొట్టేవాడు. అఖిల కూడా అదే పని చేసేది. తమ ఇద్దరి మధ్య అతడు అడ్డుగా ఉన్నాడని భావించి.. తీవ్రంగా హింస పెట్టేవారు. చిన్న బాలుడు అని చూడకుండా విపరీతంగా కొట్టేవారు. వాళ్లు కొట్టిన దెబ్బలకు అతడి అంతర్గత అవయవాలలో రక్తం గడ్డకట్టుకుపోయింది. సరిగ్గా ఈనెల 27న బాలుడు తీవ్ర అనారోగ్యానికి గురయ్యాడు. సమీపంలో ఉన్న ఆసుపత్రికి అఖిల తీసుకెళ్లింది. అక్కడి నుంచి మరో ఆసుపత్రికి తీసుకెళ్లారు. పరీక్షించిన వైద్యులు చనిపోయాడని నిర్ధారించారు.
ఆహారం తింటుండగా గొంతులో ఇరుక్కొని అతడు చనిపోయాడని అఖిల చెప్పింది. ఆమె చెప్పిన మాటలు పోలీసులకు అనుమానం కలిగించాయి. దీంతో వారు అఖిల, అష్కర్ వ్యవహారం మీద దృష్టి తరించారు. ఆ తర్వాత ఆ బాలుడి మృతదేహానికి పోస్టుమార్టం నిర్వహించారు. 51 గాయాలు ఉన్నట్టు.. సిగరెట్ల తో కాల్చినట్టు.. బాబు రెండు కాళ్లు.. చేతులు విరిగినట్టు గుర్తించారు. బాబు రెండు కాళ్ల పాదాల కింద దారుణమైన గాయాలు ఉన్నట్టు వారిని నిర్ధారించారు.
ఈ వ్యవహారం తెలిసిన స్థానికులు అష్కర్ మీద దాడి చేయడానికి ప్రయత్నించారు.. బాలుడి తల్లిని కూడా అంతం చేయడానికి యత్నించారు. పోలీసులు అడ్డుకున్నారు. అయితే అక్కడి ప్రభుత్వం ఈ కేసును అత్యంత తీవ్రంగా పరిగణించింది. ప్రస్తుతం నిందితులు పోలీసుల అదుపులో ఉన్నారు. ఏడాదిన్నర బాబు విషయంలో ఇంత పైశాచికంగా వ్యవహరించిన అఖిల, ఆమె ప్రియుడిని ఉరి తీయాలని స్థానికులు డిమాండ్ చేస్తున్నారు.
