Delhi Air Quality: మన దేశ రాజధాని ఢిల్లీ. కేంద్రపాలిత ప్రాంతం.. చిన్న నగరమే అయినా.. ఇక్కడి వాతావరణ పరిస్థితులు మానవ మనుగడను ప్రశ్నార్థకం చేస్తున్నాయి. ఏదేశ రాజధాని అయినా కట్టుదిట్టమైన భద్రత.. ఆహ్లాదకర వాతావరణం ఉంటాయి. కానీ మన రాజధానిలో వాతావరణమే అక్కడి ప్రజలకు శత్రువుగా మారుతోంది. ఇప్పటికే యమునా నది పూర్తిగా కాలుష్యకారకమైంది. అందులో స్నానం చేసినా ఆరోగ్య సమస్యలు ఖాయం. ఇక ఇప్పుడు ఢిల్లీ గాలి పీల్చినా ప్రమాదమే. ప్రత్యేకించి వింటర్ సీజన్లో హానికర స్థాయిలో గాలి నాణ్యత దెబ్బతింటోంది. 2025 లో సగటు గాలి నాణ్యత సూచిక (ఏక్యూఐ) గత అనేక సంవత్సరాల కంటే కొంత మెరుగ్గా ఉండినప్పటికీ, ముఖ్యంగా నవంబర్ నెలలో ’సేవియర్’ నుండి ’హజార్డస్’ స్థాయికి చేరుకుంది. పీఎం 2.5, పీఎం 10 వంటి కాలుష్య కారకాల తీవ్రత ఎక్కువగా ఉండడంతో, ప్రజలు తీవ్రమైన ఆరోగ్య సమస్యలకు గురవుతున్నారు.
ఢిల్లీకి వలస వచ్చిన కుటుంబం..
ఒక కుటుంబం రెండు సంవత్సరాల క్రితం ఢిల్లీకి వలస వచ్చింది. ఇక్కడి గాలి కాలుష్యం కారణంగా వారి బిడ్డ ఆసుపత్రిపాలయ్యాడు. ఈ కుటుంబం సామాన్య ప్రజల ఆశలను ప్రతిబింబిస్తూ, ’డబ్బు ఉంటే ఢిల్లీలో బతకగలం.. ప్రభుత్వానికి మన ఆరోగ్యమేమీ ముఖ్యం కాదు’ అని బాధ వ్యక్తం చేశారని సోషల్ మీడియాలో ఓ వీడియో వైరల్ అయింది. ఈ అనుభవం దేశ రాజధానిలో గాలి కాలుష్య తీవ్రతకు అద్దం పడుతోంది. ప్రజలను ఎదుర్కొంటున్న కష్టాలను తెలియజేస్తుంది.
ఫలించని ప్రభుత్వ చర్యలు?.
ప్రభుత్వం కాలుష్యాన్ని తగ్గించడం కోసం గడచిన సంవత్సరాల్లో పలు చర్యలు తీసుకున్నప్పటికీ, వింటర్ సీజన్లో పంట వ్యర్థాలకు నిప్పు పెట్టడం, వాహనాలు, పారిశ్రామిక ఉత్పత్తులు, వాతావరణ పరిస్థితులు గాలి కాలుష్యాన్ని మరింత క్లిష్టతరం చేసేస్తున్నాయి. ప్రజల ఆరోగ్య రక్షణ కోసం మరింత సమగ్ర చర్యలు అవసరం కావడం స్పష్టమే.
చిన్నపిల్లలపై పీఎం 2.5 ప్రభావాలు..
పీఎం 2.5 అణువులోని సూక్ష్మ కాలుష్యాలు చిన్నపిల్లల ఊపిరితిత్తులకు, మెదడు అభివృద్ధికి తీవ్ర హానికారకం అవుతాయి. ఈ సూక్ష్మ కాలుష్యాలు అనగా 2.5 మైక్రోమీటర్ల కంటే తక్కువ అణువులు ఊపిరితిత్తులలోకి వెళ్లి, ఊపిరితిత్తు అంటు వ్యాధులు, ఆస్తమా వంటి సమస్యలు కలిగిస్తాయి. చిత్రంగా పిల్లల మెదడులో ఈ పదార్థాలు రక్త–మెదడు అవరోధాన్నీ దాటే సామర్థ్యం ఉండి, దీర్ఘకాలికంగా జ్ఞాపకశక్తి, సహజ అభివృద్ధిలో సమస్యలను సృష్టిస్తాయి. గర్భిణులు కాలుష్య గాలి పీల్చితే గర్భశ్రావం, లేదా ప్రసవ సమయంలో పిల్లలకు ఇబ్బందులు కలిగే అవకాశం ఉంది.
