Late Night Sleeping: ప్రస్తుత కాలంలో చాలా మంది ఉద్యోగాలు చేసేవారితో పాటు యువత.. మొబైల్ ఫోన్లు, OTTలు, సోషల్ మీడియా కారణంగా అర్థరాత్రి తర్వాతే నిద్రపోతున్నారు. మళ్లీ ఉదయం ఆలస్యంగా నిద్ర లేస్తున్నారు. దీంతో నిద్రగడియారం దెబ్బతింటోంది. అయితే ప్రతిరోజూ రాత్రి 11 తర్వాత నిద్రపోవడం శారీరక, మానసిక ఆరోగ్యంపై తీవ్ర ప్రభావం చూపుతుందని ఆరోగ్య నిపుణులు హెచ్చరిస్తున్నారు. శరీరంలోని బయోలాజికల్ క్లాక్ (సర్కేడియన్ రిథమ్) దెబ్బతినడంతో అనేక అనారోగ్య సమస్యలు వచ్చే అవకాశం ఉంటుందని చెబుతున్నారు. ఆలస్యంగా నిద్రపోవడం వల్ల ఎలాంటి ప్రమాదాలు ఉంటాయో చూద్దాం..
రోగనిరోధక శక్తి తగ్గిడం:
రాత్రి వేళల్లో శరీరం విశ్రాంతి తీసుకుంటుంది. ఈ సమయంలో కణాలను పునరుద్ధరిస్తుంది. కానీ ఆలస్యంగా నిద్రపోతే ఈ ప్రక్రియ సరిగా జరగదు. ఫలితంగా రోగనిరోధక శక్తి తగ్గి తరచూ జలుబు, జ్వరం, ఇన్ఫెక్షన్లు వచ్చే ప్రమాదం పెరుగుతుంది. శరీరానికి సరిపడ నిద్ర లేకపోతే వైరస్లు, బ్యాక్టీరియాలను ఎదుర్కొనే సామర్థ్యం కూడా తగ్గిపోతుంది.
గుండెకు ముప్పు:
రాత్రిళ్లు ఎక్కువసేపు మేల్కొని ఉండటం వల్ల రక్తపోటు పెరగడం, గుండెపై ఒత్తిడి అధికమవడం జరుగుతుంది. దీర్ఘకాలంగా ఇదే అలవాటు కొనసాగితే హైబీపీ, గుండెజబ్బులు, స్ట్రోక్ వంటి సమస్యలు వచ్చే ప్రమాదం ఉందని వైద్యులు చెబుతున్నారు. సరైన నిద్ర లేకపోవడం వల్ల శరీరంలో హార్మోన్ల సమతుల్యత కూడా దెబ్బతింటుంది.
మధుమేహం, బరువు పెరుగుదల:
ఆలస్యంగా నిద్రపోయేవారిలో జీవక్రియ (మెటబాలిజం) మందగిస్తుంది. దీంతో శరీరం చక్కెరను సరిగ్గా వినియోగించుకోలేక మధుమేహం వచ్చే అవకాశాలు పెరుగుతాయి. అలాగే రాత్రిళ్లు ఆకలి ఎక్కువై జంక్ ఫుడ్ తినే అలవాటు పెరగడం వల్ల ఊబకాయం సమస్య కూడా ఎదురవుతుంది.
మెదడు పనితీరుపై ప్రభావం:
నిద్ర సరిపోకపోతే ఏకాగ్రత తగ్గిపోతుంది. చిన్న విషయాలు కూడా మర్చిపోవడం, పని మీద దృష్టి పెట్టలేకపోవడం, నిర్ణయాలు తీసుకోవడంలో ఇబ్బందులు ఎదురవుతాయి. విద్యార్థులు, ఉద్యోగుల్లో పనితీరు తగ్గడానికి ప్రధాన కారణాల్లో నిద్రలేమి కూడా ఒకటిగా నిపుణులు చెబుతున్నారు.
మానసిక ఆరోగ్యానికి ముప్పు:
రాత్రి వేళల్లో ఎక్కువసేపు మేల్కొని ఉండేవారిలో ఒత్తిడి, ఆందోళన, చిరాకు ఎక్కువగా కనిపిస్తాయి. కొందరిలో డిప్రెషన్ లక్షణాలు కూడా పెరుగుతాయని వైద్యులు హెచ్చరిస్తున్నారు. నిద్ర సమయంలో మెదడు విశ్రాంతి తీసుకుని భావోద్వేగాలను నియంత్రిస్తుంది. కానీ నిద్రలేమి వల్ల ఈ ప్రక్రియ దెబ్బతింటుంది.
ఎంతసేపు నిద్ర అవసరం?:
పెద్దవారు రోజుకు కనీసం 7-8 గంటల నాణ్యమైన నిద్ర తీసుకోవాలని నిపుణులు సూచిస్తున్నారు. ఒకవేళ పని కారణంగా ఆలస్యంగా నిద్రపోవాల్సి వచ్చినా, మధ్యలో అంతరాయం లేకుండా పూర్తి నిద్ర ఉండేలా చూసుకోవాలని చెబుతున్నారు. ప్రతిరోజూ ఒకే సమయానికి నిద్రపోవడం, ఒకే సమయానికి లేవడం ఆరోగ్యానికి మంచిదని సూచిస్తున్నారు.
మంచి నిద్ర కోసం చిట్కాలు ఇవే..:
నిద్రకు గంట ముందు మొబైల్, ల్యాప్టాప్ వాడకాన్ని తగ్గించాలి. రాత్రి సమయంలో టీ, కాఫీ వంటి కెఫీన్ పానీయాలు తగ్గించాలి. తేలికపాటి ఆహారం తీసుకోవాలి. గది ప్రశాంతంగా, చల్లగా ఉండేలా చూసుకోవాలి. ప్రతిరోజూ వ్యాయామం చేస్తే నిద్ర నాణ్యత మెరుగవుతుంది
