What Not To Eat Before Bedtime: ఈ మధ్యకాలంలో రాత్రి వేళ ఆకలి వేస్తే చాలా మంది ఇన్స్టంట్ నూడుల్స్ను సులభమైన ఆహారంగా ఎంచుకుంటున్నారు. కొన్ని నిమిషాల్లో తయారవడం, రుచిగా ఉండటం వల్ల ఇవి యువత నుంచి ఉద్యోగుల వరకు అందరికీ ఇష్టమైన ఎంపికగా మారాయి. అయితే రాత్రిపూట తరచూ నూడుల్స్ తినడం ఆరోగ్యంపై ప్రతికూల ప్రభావం చూపుతుందని వైద్యులు హెచ్చరిస్తున్నారు. ఇవి తింటే ఏం జరుగుతుందంటే?
ఇన్స్టంట్ నూడుల్స్లో సోడియం (ఉప్పు) మోతాదు ఎక్కువగా ఉంటుంది. రాత్రి సమయంలో ఇలాంటి ఆహారం తీసుకోవడం వల్ల శరీరంలో నీరు నిల్వ ఉండి రక్తపోటు పెరిగే అవకాశం ఉంటుంది. ఇప్పటికే బీపీ సమస్య ఉన్నవారిలో ఇది మరింత ప్రమాదకరంగా మారవచ్చు. దీర్ఘకాలం ఇలా కొనసాగితే గుండె జబ్బులు, స్ట్రోక్ వంటి సమస్యల ముప్పు పెరుగుతుందని నిపుణులు చెబుతున్నారు. నూడుల్స్లో ఎక్కువగా శుద్ధి చేసిన కార్బోహైడ్రేట్లు ఉంటాయి. ఇవి త్వరగా జీర్ణమై రక్తంలో గ్లూకోజ్ స్థాయిలను ఒక్కసారిగా పెంచుతాయి. ముఖ్యంగా రాత్రి వేళ శరీర చలనం తక్కువగా ఉండటంతో ఈ అదనపు శక్తి కొవ్వుగా నిల్వ అయ్యే ప్రమాదం ఉంటుంది. దీంతో బరువు పెరగడం, మధుమేహం వచ్చే అవకాశాలు కూడా పెరుగుతాయి.
రాత్రి పడుకునే ముందు భారమైన లేదా అధిక కార్బోహైడ్రేట్లు ఉన్న ఆహారం తీసుకుంటే జీర్ణక్రియకు ఎక్కువ సమయం పడుతుంది. దీనివల్ల కడుపులో అసౌకర్యం, అజీర్ణం, గ్యాస్ వంటి సమస్యలు తలెత్తవచ్చు. ఫలితంగా ప్రశాంతమైన నిద్రకు భంగం కలిగి, మరుసటి రోజు అలసటగా అనిపించే అవకాశం ఉంటుంది. ఇన్స్టంట్ నూడుల్స్ ఆకలిని తాత్కాలికంగా తీర్చగలవు కానీ శరీరానికి అవసరమైన విటమిన్లు, ఖనిజాలు, ఫైబర్ వంటి పోషకాలు చాలా తక్కువగా ఉంటాయి. అందువల్ల ఇవి కడుపు నింపినా శరీరానికి సరైన పోషణ అందించలేవు. తరచూ వీటిపై ఆధారపడితే పోషకాహార లోపాలు తలెత్తే ప్రమాదం ఉంది.
రాత్రిపూట ఆకలి వేస్తే నూడుల్స్కు బదులుగా మఖానా (ఫాక్స్ నట్స్), బాదం, వాల్నట్స్ వంటి డ్రైఫ్రూట్స్ తీసుకోవచ్చు. అలాగే గోరువెచ్చని పాలలో కొద్దిగా పసుపు కలిపి తాగడం కూడా మంచి ఎంపిక. ఇవి ఆకలిని తగ్గించడమే కాకుండా శరీరానికి అవసరమైన పోషకాలను అందించి నిద్రను మెరుగుపరచడంలో సహాయపడతాయి.
అప్పుడప్పుడు నూడుల్స్ తినడం పెద్ద సమస్య కాకపోయినా, వాటిని రోజువారీ రాత్రి ఆహారంగా మార్చుకోవడం మంచిది కాదని వైద్యులు సూచిస్తున్నారు. ఆరోగ్యకరమైన స్నాక్స్ను ఎంచుకోవడం ద్వారా గుండె ఆరోగ్యం, రక్తపోటు నియంత్రణ, మంచి నిద్ర మరియు మొత్తం శారీరక ఆరోగ్యాన్ని కాపాడుకోవచ్చని వారు చెబుతున్నారు.
