Kantara Movie: దేశం మొత్తం కాంతార చిత్రం గురించి మాట్లాడుకుంటుంది. కన్నడ పరిశ్రమ నుండి కెజిఎఫ్ 2 తర్వాత అంతకు మించి కాంతార మూవీ గురించి చర్చ నడుస్తుంది. కర్ణాటకలో ఆల్రెడీ ఈ మూవీ రికార్డు కలెక్షన్లు రాబట్టింది. తెలుగుతో పాటు ఇతర భాషల్లో విడుదలకు సిద్ధమైంది. అక్టోబర్ 15న కాంతార తెలుగులో విడుదల కానుంది. తెలుగు ఆడియన్స్ సైతం మూవీ కోసం ఆసక్తిగా ఎదురుచూస్తున్నారు. కాగా కాంతార చిత్రం అరుదైన రికార్డు నమోదు చేసింది. అత్యధిక ఐఎండీబీ రేటింగ్ సాధించిన భారత చిత్రంగా రికార్డులకు ఎక్కింది. ఇప్పటి వరకు టాప్ లో ఉన్న కెజిఎఫ్ 2 చిత్రాన్ని కాంతార వెనక్కి నెట్టి మొదటి స్థానం కైవసం చేసుకుంది.
కాంతార చిత్రానికి అత్యధికంగా 9.5 రేటింగ్ దక్కింది. మొన్నటి వరకు టాప్ లో ఉన్న కెజిఎఫ్ 2 రెండో స్థానానికి పడిపోయింది. 8.5 ఐఎండీబీ రేటింగ్ తో కెజిఎఫ్ చాప్టర్ 2, 8 రేటింగ్ తో ఆర్ ఆర్ ఆర్ మొదటి రెండు స్థానాల్లో ఉండేవి. ఇప్పుడు కాంతార ఫస్ట్ ప్లేస్ ఆక్రమించడంతో కెజిఫ్ చాప్టర్ 2, ఆర్ ఆర్ ఆర్ ఐఎండీబీ ర్యాంకింగ్స్ లో రెండు, మూడు స్థానాలకు పడిపోయాయి. ఇండియన్ బాక్సాఫీస్ షేక్ చేసిన ఆర్ ఆర్ ఆర్, కెజిఎఫ్ 2 చిత్రాలను కాంతార అధిగమించడం నిజంగా గొప్ప విషయం.
దేశవ్యాప్తంగా ఆదరణ దక్కించుకున్న కెజిఎఫ్ పార్ట్ 2 రూ. 1200 కోట్లకు పైగా వసూళ్లు అందుకుంది. ఇక ఆర్ ఆర్ ఆర్ వరల్డ్ వైడ్ రూ. 1100 కోట్ల వసూళ్లను అధిగమించింది. ఈ క్రమంలో కాంతార సైతం సంచలనాలు చేయనుందా అనే అంచనాలు పెరిగిపోయాయి. కాంతార బాక్సాఫీస్ వద్ద సక్సెస్ అయితే హిందీ, తెలుగుతో పాటు మలయాళ భాషల్లో భారీ వసూళ్లు సాధించడం ఖాయం.
భూమిపై ఆధిపత్యం అనే కాన్సెప్ట్ తో కాంతార చిత్రం తెరకెక్కింది. హీరో రిషబ్ శెట్టి రచించి దర్శకత్వం వహించి నటించారు. ఈ క్రమంలో ఒక అద్భుత చిత్రాన్ని తెరకెక్కించిన రిషబ్ శెట్టి పేరు మారుమ్రోగుతుంది. కాంతార ఆయనకు నటుడిగా, దర్శకుడిగా భారీ ఇమేజ్ తెచ్చిపెట్టింది. మరొక విశేషం ఏమిటంటే కెజిఎఫ్ నిర్మాతలైన హోమబుల్ ఫిల్మ్స్ కాంతార చిత్రాన్ని నిర్మించారు. తెలుగులో గీతా ఆర్ట్స్ బ్యానర్ లో విడుదల చేస్తున్నారు. ఈ చిత్ర హక్కులను అల్లు అరవింద్ దక్కించుకున్నారు.
