RGV: విభిన్న చిత్రాలతో సంచలనం సృష్టిస్తూ.. ఎప్పుడూ వివాదాల్లో నిలిచే దర్శకుడు రామ్గోపాల్ వర్మ. ఈ క్రమంలోనే ప్రస్తుతం కొండా అనే సినిమాను రూపొందిస్తున్నారు. తెలంగాణ రాజకీయాల్లో తమకంటూ ఓ గుర్తింపు పొందిన కొండా దంపతుల కథాంశం నేపథ్యంలో ఈ చిత్రాన్ని తెరకెక్కిస్తున్నారు రామ్గోపాల్ వర్మ. ఇప్పటికే ఈ సినిమా పోస్టర్ విడుదల చేసి మరింత హీట్ను పెంచారు.
మరోవైపు తాజాగా, హన్మకొండలో కొండా చిత్రబృందం పర్యటించింది. ఈ సందర్భంగా హన్మకొండలో వర్మకు కొండా సురేఖ దంపతులు ఘన స్వాగతం పలికారు. కొండా సురేఖ ఇంటికి వెళ్లిన రామ్గోపాల్.. అనంతరం ర్యాలీ నిర్వహించారు. వరంగల్ నుంచి వంచనిగిరి వరకు ఈ ర్యాలీ కొనసాగింది. సినిమా షూటింగ్ నేపథ్యంలో వర్మ హన్మకొండకు వచ్చినట్లు తెలుస్తోంది.
ఎప్పుడూ ఏదో ఒక పని చేసి వార్తల్లో నిలిచే రామ్ గోపాల్ వర్మ … ఇప్పుడు కూడా అందుకే ఈ ర్యాలీ నిర్వహించాడని నెటిజన్లు కామెంట్లు చేస్తున్నారు. సినిమా ప్రమోషన్లు చేసుకోవడంలో వర్మ కు సాటి ఎవరూ రారు అంటూ పలువురు అభిప్రాయపడుతున్నారు. రక్తచరిత్ర ఘన విజయం సాధించిన రీతిలోనే ఈ మూవీ కూడా హిట్ కావాలని ఆర్జివి అభిమానులు కోరుకుంటున్నారు.
మరోవైపు డేంజరస్ సినిమా తెరకెక్కిస్తోన్న రామ్గోపాల్… దీనికి సంబంధించిన ట్రైలర్ను విడుదల చేశారు. ఇద్దరు అమ్మాయిల మధ్య ప్రేమతో పాటు, క్రైమ్ థ్రిల్లర్ నేపథ్యంలో ఈ సినమా సాగనుంది. దీంతో పాటు ఎంటర్ ది గర్ల్ డ్రాగన్, D కంపెనీ ( వెబ్ సిరీస్) వంటి వరుస చిత్రాలతో మునిగిపోయారు వర్మ. ఇంత బిజీ షెడ్యూల్లోనూ తనదైన శైలిలో ట్విట్టర్ వేదికగా పలు అంశాలపై స్పందిస్తూ హాట్ టాపిక్గా నిలుస్తుంటారు.
