Prabhas Fauji movie car accident: రెబల్ స్టార్ ప్రభాస్(Rebel Star Prabhas) ప్రస్తుతం ‘ఫౌజీ'(Fauji Movie) మూవీ షూటింగ్ లో ఫుల్ బిజీ గా ఉన్నాడు. అయితే నేడు ఉదయం ఈ చిత్రం షూటింగ్ కోసం వెళ్తున్న చిత్ర బృందానికి సంబంధించిన యూనిట్ సభ్యుల కారు రోడ్డు ప్రమాదానికి గురైంది. యాదాద్రి భువనగిరి జిల్లా, చౌటుప్పల్ మండలం, తూప్రాన్ పేట వద్ద జరిగిన విషాద సంఘటనలో ఒకరు మృతి చెందగా , 5 మందికి తీవ్రమైన గాయాలు అయ్యాయి. నేడు ఉదయం మూవీ యూనిట్ కి సంబంధించిన స్టాఫ్ మీటింగ్ ని ఏర్పాటు చేశారు మేకర్స్. ఇక్కడికి వెళ్తున్న సమయం లో కారు అదుపుతప్పి డివైడర్ ని ఢీ కొట్టింది. ఈ సమాచారం అందుకున్న పోలీసులు వెంటనే ఘటనా స్థలం వద్దకు చేరుకొని సహాయ చర్యలు మొదలు పెట్టారు. హాయపడిన వారిని సమీపం లోని హాస్పిటల్ లో చేర్చి చికిత్స అందిస్తుండగా , మృతి చెందిన వ్యక్తి మృతదేహాన్ని పోస్టు మార్టం కోసం ఉస్మానియా హాస్పిటల్ కి తరలించారు.
సినిమా షూటింగ్ విరామం లేకుండా ఎంతో ఉత్సాహంతో జరుగుతున్న ఈ సమయం లో ఇలాంటి ఘటన చోటు చేసుకోవడం మూవీ యూనిట్ ని తీవ్రమైన దిగ్బ్రాంతికి గురి చేసింది. ఈ సందర్భంగా మృతుడి కుటుంబానికి తమ సానుభూతి వ్యక్తం చేసిన యూనిట్ , భవిష్యత్తులో ఆ కుటుంబానికి అండగా నిలుస్తామని మాట ఇచ్చింది. మరోపక్క పోలీసులు ఈ ప్రమాదం జరగడం పై విచారణ చేపడుతున్నారు. ఇక ఈ ఘటన కి సంబంధించిన ఫోటోలు సోషల్ మీడియా లో బాగా వైరల్ అవ్వడం , ప్రభాస్ అభిమానులు తీవ్రమైన దిగ్భ్రాంతిని వ్యక్తం చేయడం వంటివి జరిగాయి. ఈ చిత్రాన్ని ఎట్టి పరిస్థితి లోనూ దసరా కానుకగా ప్రేక్షకుల ముందుకు తీసుకొచ్చేందుకు సన్నాహాలు చేస్తున్నారు మేకర్స్. ఒకవేళ దసరా మిస్ అయితే , వచ్చే ఏడాది సంక్రాంతికి ఈ చిత్రం కచ్చితంగా విడుదలయ్యే అవకాశాలు ఉన్నాయి.
ఇక మూవీ వివరాల్లోకి వెళ్తే హను రాఘవపూడి దర్శకత్వం వహిస్తున్న ఈ చిత్రం పీరియాడికల్ లవ్ స్టోరీ గా తెరకెక్కుతోంది. రజాకార్ ఉద్యమం జరుగుతున్న సమయం లో ఇండియన్ సైనికుడికి, పాకిస్థాన్ అమ్మాయి కి మధ్య జరిగిన ప్రేమ కథ ఇది. లవ్ సన్నివేశాలు ఏ రేంజ్ లో ఉంటాయో, యాక్షన్ సన్నివేశాలు కూడా అదే రేంజ్ లో ఉంటాయి. ప్రస్తుతానికి కేవలం 3 యాక్షన్ బ్లాక్ సన్నివేశాల చిత్రీకరణ మాత్రమే బ్యాలన్స్ ఉందట. జులై లోపు పూర్తి అవుతుందని అంటున్నారు. ‘రాజా సాబ్’ ఫెయిల్యూర్ తో డీలాపడిన ప్రభాస్ ఫ్యాన్స్, ‘స్పిరిట్’ చిత్రం మీదనే భారీ ఆశలు పెట్టుకున్నారు. ఆ సినిమా విడుదల అయ్యేలోపు ‘ఫౌజీ’ ని విడుదల చేసి భారీ హిట్ కొట్టే ప్లాన్ లో ఉన్నాడు ప్రభాస్.
