Komaram Bheemudu Song: ‘కొమురం భీముడో’ పాటలోని పదాలకు అర్థాలు, వాటి మూలాలు ఏమిటి?

Komaram Bheemudu Song: “కొమురం భీముడో” పాట ఎంత గొప్పగా హిట్ అయ్యిందో ఇప్పుడు కొత్తగా చెప్పక్కర్లేదు. ప్రతీకారం ప్రజ్వరిల్లింపజేయడానికి, ఆ సందర్భాన్ని వర్ణించడానికి రాసిన అలతి పదాల అచ్చ తెలుగు భావోద్వేగాపూరితా విప్లవ గేయం ఇది. అర్థం రాస్తున్నప్పుడు చివరి చరణం గుండెని తడి చేసింది. ముఖ్యంగా ఎన్టీఆర్ నటన ఈ పాటకు ప్రాణం అయ్యింది.

ఎన్టీఆర్ పాటలో నటించిన విధానం, అందుకు తగ్గ తీక్షణత, ఉద్విగ్నత, బావోద్వేగం, ఆవేశ ఆవేదనార్ద్రతా, ధైన్య భాధా భావాలు ఎన్టీఆర్ చాలా లోతుగా పలికించారు. అందుకే ఎన్టీఆర్ నటన అద్భుతం. ప్రస్తుతం ఈ పాటకి సంబంధించి పదాలకు అర్థాలు, వాటి మూలాలు సోషల్ మీడియాలో వైరల్ అవుతున్నాయి. అవేమిటో చూద్దాం.

Also Read: Ramoji Rao- Megastar Chiranjeevi: అప్పటి ముచ్చట్లు : చిరంజీవి క్రేజీ సినిమా పై రామోజీరావు పగ.. అసలేం జరిగింది ?

*కొమురం భీముడో.. కొమురం భీముడో..
కొర్రాసు నెగడోలే మండాలి కొడుకో.. మండాలి కొడుకో
కొమురం భీముడో .. కొమురం భీముడో..
రగరాక సూరీడై రగలాలి కొడుకో.. రగలాలి కొడుకో..*

పదబంధాలు:

నెగడు: కుప్పగా నిలువుగా పెట్టిన కట్టెల మంట. చాలా సేపు అలా రగులుతూ ఉంటుంది. పంట పొలాల్లో రైతులు కాపలాగా ఉన్నప్పుడు నెగళ్లు వేస్తుంటారు

రగరాక సూరీడై రగలాలి: అలా అలా మండుతున్న సూరీడుగా మారి రగిలి పోవాలి — ఆవేశం తెచ్చుకోమని

కోర్రాసు : ఓ రకమయిన చెట్టు కట్టే ఏమో మరి తెలియదు. ( ఉదాహరణకి: చింత కొమ్మలు, కట్టే లేదా మాను వెంటనే మండిపోదు. రగులుతూనే వుండి అతి వేడిమినీ ఇస్తుంది..అలాంటిది ఏమో మరి …)

అర్ధం:

ఓ కొమరం భీమా కోర్రాసు నెగడు మంటవలె రగులుతూనే, మండుతూనే(ఉద్రేకంతో, కోపంతో, ఆగ్రహంతో) ఉండాలి, అది ప్రజ్వరిల్లిస్తూనే(ఆరకుండా రగులుతూనే ) ఉండాలి కొడుకా

*కాల్మొక్తా బాంచెన్ అని వొంగితోగాల..
కారడవి తల్లికి పుట్టనట్టేరో.. పుట్టనట్టేరో..
జులుము గద్దెకు తలను ఒంచితోగాలా..
జుడుము తల్లి పేగున పెరగానట్టేరో.. *

పదబంధాలు:

ఒకవేళ : ఒకానొక సమయానికి అయితే/జరిగితే కనుక

గద్దె: రచ్చబండ, ఎత్తులో ఉన్నదీ, అధికారం(గద్దెనేక్కడం అంటారు రాజకీయాల్లో)

జులుముకి : జులుం అంటే అధికారంతో కూడిన అధర్మ బలప్రయోగం, అది చేసే అధికార ప్రభుత్వం

కారడవి:వెలుతురూ దూరని దట్టమయిన అడవి

అర్ధం:

కాలుమొక్కి ఒంగిపోతే(తలోంచితే) ఒకవేళ

కారడవి తల్లి వడిలో పుట్టని వానివే (అంటే, కారడవి గడ్డ మీద నీవు పుట్టని వానివే)

జులుం చేసే అధికారానికి భయపడి తలను వంచితే ఒకవేళ

నీవు అడివి తల్లి చెంతన పెరగనట్టే

* చర్మమొలిచే దెబ్బకు ఒప్పంతోగాల..
సిలికే రక్తం సూసి సెదిరేతోగాల..
బుగులేసి కన్నీరు ఒలికితోగాల..
భూతల్లి సనుబాలు తాగనట్టేరో.. తాగనట్టేరో.. *

అర్ధం:

చర్మంని ఒలిచేటట్టు కొట్టే దెబ్బలకి తాళలేక పోతే/తట్టుకోలేక పోతే ఒకవేళ

కారుతున్న రక్తం చూసి చెదిరితే ఒకవేళ

మనోధైర్యం పోయి కళ్ళ నీరు ఉబికి వస్తే ఒకవేళ

ఈ భూమి తల్లి చనుపాలు తాగలేదు ..తాగలేదు (అంటే .. పాలిచ్చి పెంచిన తల్లి మీద సహజ మమకారం ఉన్నట్టే , అలాగే ఈ భూమి తల్లి మీద నీకు మమకారం, ఆ బంధం లేనట్టే అని ..)

*కాలువై పారే నీ గుండె నెత్తురు
నేలమ్మ నుదుటి బొట్టైతుంది సూడు
అమ్మకాళ్ల పారాణైతుంది సూడు
తల్లి పెదవుల నవ్వై మెరిసింది సూడు*

పదబంధాలు:

నెత్తురు: రక్తం

నేలమ్మ : నేల + అమ్మ : నేల తల్లి/పుట్టిన గడ్డ

బొట్టైతుంది: నుదుటి బొట్టుగా అవుతున్నది

పారాణైతుంది: పెళ్లి లాంటి సందర్భాల్లో కాళ్ళకి పెట్టె ఎర్ర పారాణి (అలంకారంగా)

అర్ధం:

కాలువులా పారుతున్న నీ గుండె నెత్తురు

నేల తల్లి మీద పడి ఆ తల్లికి బొట్టులా అవుతున్నది చూడు

నీ రక్త ధారలు నేలమీద పడి ఆ తల్లి కాళ్ళ పారాణిలా మారి ఎండుతున్నది చూడు

అ తల్లి పెదాల మీద నవ్వుగా (అతని వీరత్వముతో ఆమెకి గర్వంతో కలిగిన మందహాసం) మెరిసింది చూడు

*కొమురం భీముడో.. కొమురం భీముడో..
పుడమి తల్లికి జన్మ అరణామిస్తివిరో కొమురం భీముడో..*

పదబంధాలు:

పుడమి: భూమి, పుట్టిన భూమి

అర్ధం:

పుట్టిన భూమి తల్లికి జన్మనీ జీవితాన్నిఅరణంగా ఇచ్చావురో కొమరం భీమా

Also Read:NTR: ఆ డైరెక్టర్ తో సినిమా ఏందీ..? ఎన్టీఆర్ తప్పుచేస్తున్నాడా?