Marakkar: ప్రముఖ మలయాళ హీరో మోహన్లాల్ ప్రధాన పాత్రలో ప్రియదర్శన్ దర్శకత్వంలో తెరకెక్కుతోన్న సినిమా మరక్కర్: అరబికడలింటే సింహమ్. 15 వ శతాబ్దానికి చెందిన నేవర్ చీఫ్ మహమ్మద్ అలీ మరక్కర్ అలియాస్ కుంజాలి మరక్కర్ జీవిత కథ ఆధారంగా ఈ సినిమా రూపొందించారు. అయితే, ఇటీవలే ఈ సినిమా ఓటీటీలో విడుదల కానున్నట్లు ప్రచారం సాగింది. దీనికి తెర దించుతూ.. చిత్రబృందం తాజాగా, ఆసక్తికర ప్రకటన వెలవరించింది. మరక్కర్ సినిమాను థియేటర్లలోనూ విడుదల చేయనున్నట్లు స్పష్టం చేసింది.
ఇంతకాలం దాచిపెట్టిన విషయాన్ని ఇప్పుడు మీ ముందుకు తెస్తూ.. అందరికీ సర్ప్రైజ్ ఇస్తున్నాం. మరక్కర్ సినిమా థియేటర్లలోనే ఈ ఏడాది డిసెంబరు 2న విడుదల కానుంది. అంటూ మోహన్లాల్ స్పష్టం చేశారు. ఈ సినిమా తెలుగు, తమిళ, కన్నడ, హిందీ భాషల్లో ప్రేక్షకుల ముందుకు రానుంది. 67వ జాతీయ అవార్డ్స్లో ఈ చిత్రం మూడు (బెస్ట్ ఫీచర్ ఫిల్మ్, బెస్ట్ స్పెషల్ ఎఫెక్ట్స్, బెస్ట్ కాస్ట్యూమ్) విభాగాల్లో అవార్డులు సాధించిన విషయం తెలిసిందే. ఈ సినిమాలో అర్జున్, సునీల్ శెట్టి, కీర్తీ సురేశ్, మంజు వారియర్, కల్యాణీ ప్రియదర్శన్ కీలక పాత్రలు పోషిస్తున్నారు.
కాగా, గతంలో మన్యం పులి, లూసీఫర్, దృశ్యం 2 సినిమాలతో ప్రేక్షకుల ముందుకు వచ్చారు మోహన్లాల్. ఈ సినిమాలు ప్రేక్షకులను అమితంగా ఆకట్టుకున్నాయి. మోహన్లాల్ తెలుగులోనూ కొన్ని సినిమాలు విడుదల చేస్తుంటారు. ఈ క్రమంలోనే తెలుగు ప్రేక్షకులకూ ఆయన బాగా కనెక్ట్ అయ్యారు. దీంతో, ఈ సినిమాను కూడా తెలుగులో విడుదల చేసేందుకు సిద్ధమయ్యారు.
