Kamal Hasan: కమల్హాసన్ హీరోగా లోకేశ్ కనగరాజు ప్రతిష్టాత్మకంగా తెరకెక్కిస్తోన్న సినిమా విక్రమ్. ఇందులో విజయ్ సేతుపతి, ఫాహద్ ఫజిల్ కీలక పాత్రల్లో కనిపంచనున్నారు. ఈ సినిమాను కమల్ హాసన్ తన సొంత బ్యానర్ రాజ్ కమల్ ఫిల్మ్స్ ఇంటర్నేష్నల్పై ఆర్. మహేంద్రన్తో కలిసి సంయుక్తంగా నిర్మిస్తున్నారు. ఇప్పటికే ఈసినిమాకు సంబంధించిన ప్రచార చిత్రాలు ప్రేక్షకులను, అభిమానులను అమితంగా ఆకట్టుకున్నాయి. తాజాగా, ఈ సినిమాకు సంబంధించిన కొత్త అప్డేట్ను చిత్రబృందం ప్రకటించింది. కమల్హాసన్ పుట్టినరోజు సందర్భంగా అడ్వాన్స్ బర్త్డే విషెస్ తెలుపుతూ దర్శకుడు కనగరాజ్ ఓ కొత్త పోస్టర్ను విడుదల చేశారు. దీంతో పాటు, విక్రమ్ సినిమాకు సంబంధించిన ఫస్ట్ గ్లాన్స్ను శనివారం సాయంత్రం సాయంత్రం 6 గంటలకు రిలీజ్ చేయనున్నట్లు తెలిపారు.
దీంతో కమల్ అభిమానులు సంతోషం వ్యక్తం చేస్తున్నారు. వచ్చే ఏడాది ఎప్రిల్లో ప్రపంచ వ్యాప్తంగా ప్రేక్షకుల ముందుకు తీసుకొచ్చేందుకు చిత్ర యూనిట్ ప్లాన్ చేస్తోంది. కాగా, గతంలో కమల్ తనే సొంతంగా కథ రాసుకొని తీసిన విశ్వరూపం, విశ్వరూపం 2 చిత్రాలు భిన్నంగా ఉన్నప్పటికీ.. ప్రేక్షకులను ఆకట్టుకోలేకపోయాయి. అయితే, ఈ రెండు సినిమాలకు జాతీయ స్థాయిలో మంచి పేరు లభించింది. ఆ తర్వాత వచ్చిన ఉత్తమ విలన్లో కమల్ నటనకు ప్రజలు నీరాజనాలు పట్టారు. విభిన్న కథాంశంతో రూపొందిన ఈ సినిమాలో దిగ్గజ దర్శకులు బాలచందర్, కె.విశ్వనాథ్లు కీలకపాత్ర పోషించారు. మరి విక్రమ్ సినిమాతో థియేటర్లలో ఎలాంటి రెస్పాన్స్ సాధిస్తారో తెలియాలంటే విడుదల వరకు వేచిచూడాల్సిందే.
