Shyam Singha Roy: నేచురల్ స్టార్ నాని హీరోగా రానున్న సినిమా శ్యామ్ సింగరాయ్. టాక్సీవాలా సినిమాతో విజయాన్ని సొంతం చేసుకున్న దర్శకుడు రాహుల్ సాంకృత్యన్ ఈ చిత్రానికి డైరెక్ట్ చేస్తున్నారు. పిరియాడికల్ నేపథ్యంలో రానున్న ఈ సినిమా విభిన్నమైన కథాంశంతో తెరకెక్కుతోంది. ఇందులో నాని డ్యుయల్ రోల్లో కనిపించనున్నాడని సమాచారం. ఈ చిత్రంలో ముగ్గురు హీరోయిన్స్ నటిస్తున్నారు. సాయిపల్లవి, మడోన్నా సెబాస్టియన్, కృతి శెట్టి ఈ సినిమాలో కనిపించనున్నారు.
ఇటీవల దీపావళి కానుకగా హీరోయిన్స్కు సంబంధించిన లుక్ పోస్టర్ను విడుదల చేశారు. ముగ్గురు విభిన్నమైన గెటప్స్లో కనువిందు చేశారు. కలకత్తా బ్యాక్ డ్రాప్లో తెరకెక్కుతోన్న ఈ సినిమాలో సాయిపల్లవి రోల్ కీలకంగా ఉండనుందని సినీ వర్గాల్లో టాక్. అంతే కాకుండా, సాయిపల్లవి పాత్రకు అతీత శక్తులు ఉంటాయని టాక్ నడుస్తోంది.
కాగా, ఇటీవలే నాని నటించిన వి, టక్ జగదీష్ సినిమాలు ఆశించిన స్థాయిలో ప్రేక్షకులను ఆకట్టుకోలేకపోయాయి. పైగా ఈ రెండు చిత్రాలు ఓటీటీ వేదికగా విడుదలయ్యాయి. అయితే, శ్యామ్సింగ్రాయ్ మాత్రం థియేటర్లలో రిలీజ్ కానుంది. దీంతో, నాని ఎలాగైనా ఈ సినిమాలో హిట్ కొట్టాలని అనుకుంటున్నారు. డిసెంబరు 24న ఈ సినిమా గ్రాండ్ రిలీజ్ కానుంది. దీంతో వరుసగా సినిమాకు సంబంధించిన అప్డేట్స్ ఇస్తోంది చిత్రబృందం. మరి ఆశించిన స్థాయిలో విజయం అందుకుంటుందేమో వేచి చూడాలి.
