Nagabandham Movie Review: రివ్యూ: నాగబంధం
నటీనటులు: విరాట్ కర్ణ, నభ నటేష్, ఐశ్వర్య మీనన్, జగపతిబాబు, మురళీ శర్మ, మహేష్ మంజ్రేకర్, రిషభ్ తదితరులు
సంగీత దర్శకులు: అభి – జునైద్ కుమార్
ఛాయాగ్రహణం: సౌందర్ రాజన్
ఎడిటర్: ఆర్.సి. ప్రణవ్
దర్శకత్వం: అభిషేక్ నామా
నిర్మాణం: అభిషేక్ పిక్చర్స్, NIK స్టూడియోస్
టాలీవుడ్లో ఈమధ్య కాలంలో అత్యధిక బడ్జెట్తో రూపొందిన చిత్రాల్లో నాగబంధం ఒకటి. స్టార్ హీరో లేకపోయినా దాదాపు వంద కోట్లకు పైగా బడ్జెట్, ఈమధ్య కాలంలో ట్రెండ్ గా మారిన హిందూ పురాణాల నేపథ్యంలో సినిమా తెరకెక్కడంతో ఈ సినిమాపై సర్వత్రా ఆసక్తి నెలకొంది. ట్రైలర్లతోనే ఈ సినిమా గ్రాండ్ గా ఉండబోతోందని అర్థమైంది. ఈరోజే నాగబంధం ప్రేక్షకులముందుకు వచ్చింది. పెద్ద బడ్జెట్, గ్రాండ్ విజువల్స్ తో వస్తున్న ఈ సినిమా అదే స్థాయిలో ప్రేక్షకులను థ్రిల్ చేసిందా లేదా అనేది రివ్యూలో చూద్దాం.
ఆర్కియాలజీ డిపార్ట్ మెంట్ వారు చేస్తున్న పరిశోధనల్లో ఒక అధికారికి హిమాలయాల్లో కాలవృక్షంలో బందీగా ఉన్న బైరాగి(గరుడ రామ్) ఆనే తాంత్రికుడు తారసపడతాడు. అతను చెప్పిన వివరాల ప్రకారం బ్రహ్మ కమలం, దానితో పాటు గరుడ మంత్రాల గ్రంథం సహాయంతో నాగబంధం ద్వారా ఈ ప్రపంచాన్నే తమ చేతుల్లోకి తీసుకోవచ్చనని అలీ(రిషబ్) కు తెలుస్తుంది. ఎప్పుడైతే ఈ లోకాన్ని జయించే మార్గం ఉందని తెలిసిందో అప్పటి నుంచి వాటికోసం వేట మొదలు పెడతాడు అలీ. అందుకోసం ఎంతమందిని చంపడానికైనా, మారణహోమం సృష్టించేందుకైనా వెనుకాడడు. మరోవైపు ఆ పుస్తకం హిమాలయాల్లోనే టెస్లా ఆనే వ్యక్తికి దొరుకుతుంది. అతను ఆ పుస్తకాన్ని పురావస్తు శాఖ అధికారి ప్రభాకర్(జగపతి బాబు) కు అప్పగిస్తాడు. బ్రహ్మకమలం కోసం అలీ చేస్తున్న ప్రయత్నానికి అడ్డు తగిలే వ్యక్తే మన హీరో రుద్ర(విరాట్ కర్ణ). బ్రహ్మ కమలం-గరుడ మంత్రాల గ్రంథాన్ని చేజిక్కించుకునే ప్రయాణంలో రుద్ర ఎందుకు భాగం అవుతాడు? అసలు రుద్రకు, నాగబంధం కాన్సెప్ట్ కు సంబంధం ఏంటి. చివరికి దుష్టశక్తుల బారిన పడకుండా నాగబంధం పక్షాన రుద్ర జరిపిన పోరాటం ఫలించిందా అనేది తెరపై చూడాలి.
సినిమా హిమాలయాల్లో ఓపెన్ చేసి ఆసక్తికరంగా ఉంటుందనే ఫీల్ కలిగించారు. ఫస్ట్ హాఫ్ లో చాలా భాగం సినిమా సెటప్ ను, థీమ్ ను ఎలివేట్ చేస్తూ ఇంట్రడక్షన్ ఇవ్వడంతో ఏదో జరగబోతోందని ప్రేక్షకులు ఆశిస్తారు. అయితే ఆ ఆసక్తి మొదటి గంటలోనే ఆవిరైపోతుంది. విజువల్స్ అన్నీ భారీగా ఉన్నా, అఖండ తరహాలో సంగీతం మోత మోగిపోతున్నా పాత్రలతో, వాటి మధ్య ఉన్న డ్రామాతో ఎక్కడా ప్రేక్షకుడు కనెక్ట్ కాలేడు. మరోవైపు మితిమీరిన హింస కూడా అవసరమా అనిపిస్తూ ఉంటుంది. విలన్ క్రూరుడు అని చెప్పడానికి ఒకటి రెండు సీక్వెన్సులు సరిపోతాయి కానీ హిందీలో వచ్చిన ‘కిల్’ సినిమా తరహాలో ప్రతి పది నిముషాలకు నరకడమే పనిగా పెట్టుకున్నారు. అది కూడా సినిమా మీద ఆసక్తి తగ్గేలా చేస్తుంది. పాత్రలు బలంగా లేకపోవడం, కథ కంటే టెక్నికల్ అంశాలు హైలైట్ అవుతూ ఉండడంతో అప్పుడప్పుడూ ప్రేక్షకుడు బుర్ర గోక్కునే బదులు ఫోన్ తీసి వాట్సాప్ చెక్ చేసుకుంటే అది వారి తప్పేమీ కాదు. మరోవైపు హీరో – హీరోయిన్ పాత్ర పార్వతి(నభ నటేష్) ట్రాక్ ఎఫెక్టివ్ గా లేదు. సినిమా వయొలెన్స్ ఇంటెన్సిటీలో హీరోయిన్ ట్రాక్ చప్పగా మారింది.
సినిమాలో పెద్ద మైనస్ ఏంటి అంటే విజువల్స్ భారీగా ఉండి కథ, కథనం బలహీనంగా ఉండడం. యాక్షన్ ఎపిసోడ్లు కొన్ని బాగున్నప్పటికీ కొన్ని మాత్రం సాగదీసినట్టు అనిపిస్తాయి. విజువల్స్ మాత్రం చాలా గ్రాండ్ గా ఉన్నాయి. ఆర్ట్ డిపార్ట్ మెంట్ వారి వర్క్ కూడా తెరపై గొప్పగా కనిపిస్తుంది. మ్యూజిక్ కూడా సినిమా థీమ్ కు తగ్గట్టు సీన్స్ ను ఎలివేట్ చేసింది. సాంగ్స్ మాత్రం గొప్పగా లేవు. రైటింగ్, డైరెక్షన్ వీక్ గా ఉండడం వల్ల ఎమోషనల్ కనెక్ట్ మిస్ అయింది. ఈ సినిమాకు మూడు గంటలకు పైగా నిడివి అవసరం లేదు. ఎడిటర్ మరో అరగంట తగ్గించినా పెద్ద ప్రమాదం ఏమీ ఉండేది కాదు. సినిమాలో వీఎఫ్ యక్స్ కొన్ని చోట్ల తేలిపోయింది కానీ ఎక్కువ భాగం బాగుంది. నిజానికి అవసరం లేని చోట్ల కూడా VFX ను వాడినట్టు కనిపిస్తుంది.
రుద్ర పాత్ర పోషించిన విరాట్ కర్ణ కష్టం తెరపై కనిపించింది. నాగ సాధువుగా లుక్ చాలా బాగుంది, నటన కూడా ఇంప్రెసివ్ గా ఉంది. నభ నటేష్ యాక్టింగ్ డీసెంట్ గా ఉంది. విలన్ పాత్ర పోషించిన రిషబ్, జగపతి బాబు, మురళి శర్మ, మహేష్ మంజ్రేకర్ తదితరులు తమ పాత్రలకు తగ్గట్టు నటించారు.
సినిమాలో ఏం బాగున్నాయో తెలుసా?
1. గ్రాండ్ విజువల్స్, సినిమాటోగ్రఫీ.
2. కొన్ని యాక్షన్ ఎపిసోడ్స్.
3. ఇంటర్వెల్ ఎపిసోడ్, బ్యాక్గ్రౌండ్ స్కోర్.
సినిమాలో బాగలేనివి ఇవి:
1. నెమ్మదిగా సాగే స్క్రీన్ప్లే, వీక్ డైరెక్షన్
2. ఎమోషనల్ కనెక్ట్ లేకపోవడం.
3. బలహీనమైన సెకండాఫ్, ఊహించదగ్గ ట్విస్టులు.
రేటింగ్: 2/5
ఫైనల్ వర్డ్: A’ఖండ’
