Srinija: మోహన్ బాబుపై వ్యాఖ్యలు చేసిన శ్రీనిజపై ఈసీ వేటు

Srinija: ఇటీవలే జరిగిన మూవీ ఆర్టిస్ట్​ అసోసియేషన్​ ఎన్నికల్లో మోహన్​ బాబు తనయుడు మంచు విష్ణు గెలుపొందిన విషయం తెలిసిందే. ఈ క్రమంలోనే ప్రమాణ స్వీకారం రోజున శ్రీనిజ అనే నటి మోహన్​బాబుపై సంచలన వ్యాఖ్యలు చేసింది. ఈ క్రమంలోనే ఆమెను మా శాశ్వత సభ్యత్వం నుంచి నివధికంగా సస్పెండ్​ చేశారు. ఈ మేరకు అక్టోబరు 23న మా ఈసీ సమావేశంలో నిర్ణయం తీసుకున్నట్లు విశ్వసనీయ వర్గాల సమాచారం. మా ప్రతిష్టకు భంగం కలిగించేలా ప్రవర్తించారంటూ శ్రీనిజకు అక్టోబరు16న ఈసీ షోకాజ్​ నోటీసు పంపించింది. మీడియాలో వచ్చిన వార్తలను ఉటంకిస్తూ.. షోకాజ్​ నోటీసులను పంపించారు.

మూడు రోజుల్లో ఈ విషయంపై వివరణ ఇవ్వకపోతే చర్యలు తీసుకుంటామని ఈసీ హెచ్చరించింది. అయితే, షోకాజ్​ నోటీసుకు ఆమె ఇచ్చిన సమాధానం సంతృప్తికరంగా లేకపోవడంతో ఈసీ, ఆమెపై వేటు వేసింది. మంచు విష్ణు గెలుపు తర్వాత శాశ్వత సభ్యురాలిపై ఈ తరహా చర్యలు తీసుకోవడం ఇదే తొలిసారి.

ప్రమాణ స్వీకారోత్సవ సమయంలో మోహన్ బాబు, నరేష్‌లపై శ్రీనిజ కొన్ని వ్యాఖ్యలు చేశారు. ఆ తర్వాత కొన్ని యూట్యూబ్ ఛానెళ్లకు ఇచ్చిన ఇంటర్వ్యూలలో తాను ఏ పరిస్థితులలో అలా మాట్లాడాల్సి వచ్చిందో వివరించారు. సాధారణంగా ఎవరైనా సభ్యులు ఈ తరహా వ్యాఖ్యలు చేసినప్పుడు వారిని పిలిచి.. మందలించడం అనేది ఒక సంప్రదాయంగా వస్తోంది. కానీ శ్రీనిజ విషయంలో ఇంత తీవ్రమైన చర్య తీసుకోవడం పట్ల కొందరు ఆశ్చర్యం వ్యక్తం చేస్తున్నారు.