Sunnyleone: ఇటీవల కాలంలో క్రిప్టో కరెన్సీ చాలా ప్రాచుర్యం పొందింది. ఈ పద్దతిని ప్రోత్సహించడంలో భాగంగా అమితాబ్ బచ్చన్, రజనీకాంత్, సల్మాన్ఖాన్ స్టార్లు ఎన్ఎఫ్టీ వ్యాపార రంగంలోకి అడుగుపెట్టిన సంగతి తెలిసిందే. ఎన్ఎఫ్టీ అంటే ఓ డిజిటల్ బిజినెస్. ఇందులో భాగంగా సెలబ్రిటీలకు సంబంధించిన మాటలు, పాటలు, ఆటలు, సినిమాలు, ప్రత్యేక ఫొటోలు, వీడియోలను డిజిటల్ ఫార్మాట్లోకి మార్చి వేలంలో విక్రయిస్తారు. ఇదంతా బ్లాక్చెయిన్ టెక్నాలజీ పద్దతిలో జరుగుతుంటుంది. ఈ డిజిటల్ ఆస్తులను ఎవ్వరైనా వేలం ద్వారా సొంతం చేసుకోవచ్చు. ఎన్ఎఫ్టీలను కొనుగోలు చేసినవారు తిరిగి వాటిని వేలం వేసుకునే వెసులుబాటు ఉంది. అలా వేలం జరిగిన ప్రతిసారి వేలం మొత్తంలో 10శాతం ఎన్ఎఫ్టీ క్రియేటర్లకు వాటాగా వెళ్తుంటుంది.
తాజాగా, బాలీవుడ్ బ్యూటీ సన్నీ లియోన్ ఈ ఎన్ఎఫ్టీ బిజినెస్లోకి అడుగుపెట్టింది. దీంతో ఈ వ్యాపారంలో అడుగుపెట్టిన తొలి భారతీయ నటిగా గుర్తింపు దక్కించుకుంది. కాగా, మిస్ ఫిట్ పేరుతో తన ఎన్ఎఫ్టీ వివరాలను సోషల్ మీడియాలో షేర్ చేయడం మొదలుపెట్టింది. ‘ మిస్ ఫిట్ను కలవండి. ఆమెకు గులాబీ రంగు అంటే ఎంతో ఇష్టం. ట్యాటూలు వేయించుకోవాలన్నా, అబ్బాయిలన్నా ఇష్టమే. ఎప్పుడూ సరదాగా నవ్వుతూ ఉంటుంది. ఇంకా మీరు దేనికోసం ఎదురుచూస్తున్నారు. సన్నీ లియోన్ ఎన్ఎఫ్టీలు సిద్ధంగా ఉన్నాయి ‘ అని సన్నీ పేర్కొంది.
