Tesla
Tesla : టెస్లా కార్లు వచ్చే నెల నుంచి భారతీయ మార్కెట్‌లో ఎంట్రీ ఇస్తోంది. ప్రస్తుతం కంపెనీ దిగుమతి చేసుకున్న కార్లను మాత్రమే ఇండియాలో విక్రయించేందుకు ప్లాన్ చేస్తుంది. కానీ త్వరలోనే ఇక్కడ తన కార్లను తయారు చేయాల్సి ఉంటుంది. అలా చేయకపోతే, తన కార్లను చౌకగా దిగుమతి చేసుకోలేదు. కాబట్టి, టెస్లా ఇండియాలోనే తన ఫ్యాక్టరీని ఏర్పాటు చేసి కార్లను తయారు చేస్తే, అవి ఎంత చౌకగా లభిస్తాయి?
ఇండియాలో ఉన్న అన్ని ఆటోమొబైల్ కంపెనీలు ప్రతేడాది తమ ఫ్యాక్టరీలలో మొత్తం 62 లక్షల కార్లను ఉత్పత్తి చేయగలుగుతాయి. కానీ ప్రస్తుతం దానిలో 75శాతం ఉత్పత్తి మాత్రమే జరుగుతోంది. కాబట్టి, ఎలన్ మస్క్ టెస్లా ప్రారంభంలో మిగిలిన 25శాతం సామర్థ్యాన్ని ఉపయోగించుకోవడానికి కాంట్రాక్ట్ తయారీ ఎంపికను పరిశీలిస్తోంది. కానీ నిజానికి చూస్తే, టెస్లా ఇండియాలో గిగాఫ్యాక్టరీని ఏర్పాటు చేయడం లాభదాయకంగా ఉంటుంది.
మనదేశంలో టెస్లా ఎంత చౌకగా ఉంటుంది?
ప్రస్తుతం టెస్లాకు ప్రపంచవ్యాప్తంగా 5 గిగాఫ్యాక్టరీలు ఉన్నాయి. వాటిలో 3 అమెరికాలో, ఒకటి జర్మనీలో, ఒకటి చైనాలో ఉన్నాయి. కంపెనీ మెక్సికోలో కూడా ఒక గిగాఫ్యాక్టరీని ఏర్పాటు చేయాలని యోచిస్తోంది. ఈటీ వార్తా కథనం ప్రకారం.. టెస్లా ఇండియాలో ఏడాదికి 5 లక్షల యూనిట్ల ఉత్పత్తి సామర్థ్యంతో గిగాఫ్యాక్టరీని ఏర్పాటు చేస్తే, అది అమెరికా, జర్మనీతో పోలిస్తే చాలా చౌకగా ఉంటుంది. దీనివల్ల ఉత్పత్తి వ్యయం కూడా తగ్గుతుంది.
ఈ సామర్థ్యం కలిగిన గిగాఫ్యాక్టరీని జర్మనీలోని బెర్లిన్‌లో ఏర్పాటు చేస్తే, దాని ఖర్చు 5 బిలియన్ డాలర్ల వరకు ఉంటుంది. అదే అమెరికాలోని టెక్సాస్‌లో దీని ఖర్చు 7 బిలియన్ డాలర్లకు చేరుకుంటుంది. అయితే భారతదేశంలో దీని వ్యయం కేవలం 2 నుంచి 3 బిలియన్ డాలర్లు మాత్రమే ఉంటుంది.
కంపెనీకి కేవలం ఫ్యాక్టరీ ఖర్చులోనే కాకుండా కార్మిక వ్యయంలో కూడా ఆదా అవుతుంది. మనదేశంలో కార్మిక వ్యయం గంటకు 2 నుంచి 5 డాలర్లు (గరిష్టంగా 500 రూపాయలు) ఉంటుంది. అదే అమెరికాలో ఇది గంటకు 36 డాలర్లు, జర్మనీలో గంటకు 45 డాలర్ల వరకు ఉంటుంది. అంతేకాకుండా, కంపెనీ మనదేశంలోనే కార్లను తయారు చేస్తే, సప్లై చైన్ ప్రయోజనం, పెద్ద వినియోగదారుల మార్కెట్ ప్రయోజనం, ప్రభుత్వం నుండి కొన్నేళ్ల పాటు పన్ను మినహాయింపు ప్రయోజనం కూడా లభిస్తుంది.
కాంట్రాక్ట్ తయారీ నష్టాలు
టెస్లా కాంట్రాక్ట్ తయారీ మార్గాన్ని ఎంచుకుంటే, అనేక నష్టాలను చవిచూడాల్సి ఉంటుంది. దీనివల్ల సరఫరా గొలుసుపై దాని నియంత్రణ ఉండదు. అలాగే, డెలివరీ సమయపాలన ప్రభావితమవుతుంది. అంతేకాకుండా, దాని వ్యయం కూడా పెరుగుతుంది. భవిష్యత్తులో ఫ్యాక్టరీని ఏర్పాటు చేస్తే అది మొదటి నుంచి ప్రారంభించాల్సి ఉంటుంది.