ITR Filing : గత ఆర్థిక సంవత్సరంలో మీరు రెండు లేదా అంతకంటే ఎక్కువ ఉద్యోగాలు మారి ఉంటే, ఇన్కమ్ ట్యాక్స్ రిటర్న్స్ (ITR) ఫైల్ చేసేటప్పుడు చాలా జాగ్రత్తగా ఉండాలి. ఒక్క చిన్న తప్పు చేసినా, పన్నుల శాఖ నుంచి నోటీసులు వచ్చే అవకాశం ఉంది. ఒకే కంపెనీలో పనిచేసిన వారితో పోలిస్తే, ఉద్యోగాలు మారిన వారికి ఐటీఆర్ దాఖలు చేయడం కాస్త కష్టం. ముఖ్యంగా ఫారం-16, టీడీఎస్, గ్రాట్యుటీ, పీఎఫ్ విత్డ్రాలు వంటి వాటిని జాగ్రత్తగా చూసుకోవాలి. మరి, ఎలాంటి ఇబ్బందులు రాకుండా ఉండాలంటే ఏం చేయాలో ఇప్పుడు తెలుసుకుందాం.
Also Read : ఇండియన్ సినిమా ఇండస్ట్రీని శాసిస్తున్న టాప్ 3 తెలుగు డైరెక్టర్స్ వీళ్లేనా..?
అన్ని కంపెనీల ఫారం-16లు తీసుకోవాలి
చాలా మంది పన్ను చెల్లింపుదారులు చేసే పెద్ద పొరపాటు ఏమిటంటే, ప్రస్తుతం పనిచేస్తున్న కంపెనీ నుంచి మాత్రమే ఫారం-16 తీసుకోవడం. పాత కంపెనీలో సంపాదించిన జీతం గురించి మర్చిపోతుంటారు. దీనివల్ల మీరు తక్కువ ఆదాయాన్ని చూపించినట్లు అవుతుంది. అంతేకాదు, చాలా మంది ఉద్యోగులు తమ పాత ఆదాయ వివరాలను కొత్త యజమానికి చెప్పరు. దీనివల్ల ఆదాయం మరియు టీడీఎస్ లెక్కల మధ్య తేడాలు కనిపిస్తాయి. చివరికి ఐటీఆర్ ఫైల్ చేసేటప్పుడు ఒకేసారి ఎక్కువ పన్ను కట్టాల్సి వస్తుంది. కాబట్టి, గత ఆర్థిక సంవత్సరంలో మీరు పనిచేసిన అన్ని కంపెనీల నుంచి కూడా ఫారం-16లను తప్పనిసరిగా తీసుకోండి.
అన్ని ఆదాయాలను కలిపి చూపించాలి
మీరు తీసుకున్న అన్ని ఫారం-16లలో ఉన్న ఆదాయాన్ని కలిపి, మొత్తం ఎంత సంపాదించారో లెక్కించుకోవాలి. అలాగే, మీ ఫారం-26AS ను యాన్యువల్ ఇన్ఫర్మేషన్ స్టేట్మెంట్ (AIS) తో పోల్చి చూసుకోవాలి. అన్ని వివరాలను ఒకసారి సరిచూసుకుని, మీ మొత్తం ఆదాయానికి తగ్గట్లుగా సరైన ఫారంలో ఐటీఆర్ దాఖలు చేయాలి. ఇలా చేయడం వల్ల పన్ను ప్రక్రియలో పారదర్శకత ఉంటుంది. భవిష్యత్తులో పన్ను నోటీసులు రాకుండా ఉంటాయి. మీరు పాత పన్ను విధానం కింద రిటర్నులు దాఖలు చేస్తుంటే, 80C, 80D వంటి మినహాయింపులను రెండు కంపెనీలలోనూ క్లెయిమ్ చేసుకోవచ్చు. ఈ విషయంలో జాగ్రత్తగా ఉండాలి.
Also Read : కొత్తగా ఉద్యోగంలో చేరిన వారు కారు ఎప్పుడు కొనాలో తెలుసా?
తేడాలు కనిపిస్తే ఏం చేయాలి?
ఉద్యోగాలు మారినప్పుడు, ఫారం-16లోని ఆదాయానికి, ఫారం-26AS, AISలలోని వివరాలకు మధ్య తేడాలు ఉండవచ్చు. ఇలాంటి తేడాలు కనిపిస్తే, వెంటనే మీ పాత యజమానులను సంప్రదించి, టీడీఎస్ రిటర్న్ను సవరించమని కోరండి. ఐటీఆర్ దాఖలు చేసేటప్పుడు, 26AS లోని టీడీఎస్ వివరాలను ఆధారంగా తీసుకోవాలి. ఉద్యోగాలు మారినప్పుడు మీకు వచ్చిన అన్ని ప్రయోజనాలను ఐటీఆర్ ఫారంలో తప్పనిసరిగా చూపించాలి.
సరైన ఫారాన్ని ఎంచుకోవడం ముఖ్యం
ఒకటి కంటే ఎక్కువ ఆదాయ వనరులు ఉన్నప్పుడు, పన్ను చెల్లింపుదారులు ITR-1 కాకుండా ITR-2 లేదా ITR-3 ని ఎంచుకోవాల్సి ఉంటుంది. మీ ఆదాయ వనరులను బట్టి సరైన ఫారాన్ని ఎంచుకుని రిటర్నులు దాఖలు చేయండి. ఈ విషయంలో ఏమైనా సందేహాలు ఉంటే, ఒక ట్యాక్స్ నిపుణుడిని సంప్రదించడం మంచిది.
