GST Relief For Middle Class: పన్ను విధానం దేశ వ్యాప్తంగా ఒకేలా ఉండాలని కేంద్రం జీఎస్టీని తీసుకువచ్చింది. సుమారు పదేళ్లుగా జీఎస్టీ అమలవుతోంది. కేంద్రం అవసరమైనప్పుడు సవరణలు చేస్తోంది. ఇంకా జీఎస్టీ పరిధిలోకి రానివాటిని చేరుస్తోంది. శ్లాబులను సవరిస్తోంది. ఇంతకాలం పన్ను ఆదాయం పెంచుకుంటూ పోతున్న కేంద్రం తాజాగా చిన్న సవరణతో సామాన్యులకు పెద్ద ఊరట ఇవ్వాలని భావిస్తోంది. కేంద్ర ప్రభుత్వం త్వరలో 12% శ్లాబ్ను జీఎస్టీ నుంచి ఎత్తివేయాలని యోచిస్తోంది.
అన్నీ 5 శాతం శ్లాబులోకి..
కేంద్రం జీఎస్టీలో 12 శాతం శ్లాబు ఎత్తివేస్తే.. ప్రస్తుతం ఆ పరిధిలో ఉన్న పన్నులన్నీ 5 శాతం పరిధిలోకి చేరుతాయని తెలుస్తోంది. ఈ చర్య సామాన్య ప్రజలపై ఆర్థిక భారాన్ని తగ్గించడం, వినియోగ వస్తువుల ధరలను తగ్గించడం ద్వారా వారికి ఊరటనిచ్చే లక్ష్యంతో ఉన్నట్లు తెలుస్తోంది. జీఎస్టీ శ్లాబ్ల సరళీకరణ ప్రభుత్వం దీర్ఘకాలిక ఆర్థిక సంస్కరణల అజెండాలో భాగమై ఉంటుందని ఆర్థిక నిపుణులు అంచనా వేస్తున్నారు.
ప్రభావితమయ్యే వస్తువులు..
జీఎస్టీలో 12 శాతం శ్లాబు ఎత్తివేతతో రోజువారీ అవసరమైన అనేక వస్తువుల ధరలు తగ్గే అవకాశం ఉంది. టూత్పేస్ట్, గొడుగులు, కిచెన్ సామగ్రి, కుట్టు మిషన్లు, గీజర్లు, ఐరన్ బాక్స్లు, సైకిళ్లు, రూ.1,000 పైబడి ఉండే రెడీమేడ్ దుస్తులు, రూ.500–రూ.1,000 మధ్య ధరల చెప్పులు, స్టేషనరీ, వ్యవసాయ సామగ్రి, వ్యాకిన్స్ వంటి ఉత్పత్తులు 12% నుంచి 5% శ్లాబ్లోకి మారనున్నాయి. దీంతో ధరలు గణనీయంగా తగ్గవచ్చు. ఈ వస్తువులు సామాన్య, మధ్యతరగతి కుటుంబాల రోజువారీ జీవనంలో కీలక పాత్ర పోషిస్తాయి కాబట్టి, ఈ మార్పు వారి ఆర్థిక భారాన్ని తగ్గించి, వినియోగ వ్యయాన్ని తగ్గించే యోచనలో కేంద్రం ఉంది.
ప్రస్తుతం జీఎస్టీ ఇలా..
జీఎస్టీ శ్లాబ్ల సరళీకరణ భారత ఆర్థిక వ్యవస్థలో పన్ను నిర్మాణాన్ని మరింత సులభతరం చేయవచ్చు. ప్రస్తుతం జీఎస్టీలో 0%, 5%, 12%, 18%, 28% శ్లాబ్లు ఉన్నాయి, 12% శ్లాబ్ ఎత్తివేత వల్ల పన్ను వ్యవస్థ సరళంగా మారి, వినియోగదారులకు, వ్యాపారులకు స్పష్టత పెరుగుతుంది. ఈ చర్య వినియోగదారులకు ధరల తగ్గుదల రూపంలో ప్రయోజనం చేకూర్చడమే కాక, దేశంలోని చిన్న తరగతి వ్యాపారాలకు కూడా పోటీతత్వాన్ని పెంచవచ్చు. అయితే, ఈ సంస్కరణను అమలు చేయడానికి ముందు జీఎస్టీ కౌన్సిల్ విస్తృత చర్చలు జరపాల్సి ఉంటుంది.
ఆర్థిక నిపుణుల అంచనాలు ఇవీ..
ఆర్థిక నిపుణులు ఈ జీఎస్టీ శ్లాబ్ సరళీకరణను సానుకూల చర్యగా భావిస్తున్నారు. 12% శ్లాబ్ ఎత్తివేత వల్ల సామాన్య వస్తువుల ధరలు తగ్గడమే కాక, వినియోగదారుల విశ్వాసం పెరిగి, మార్కెట్ డిమాండ్ పెరగవచ్చని అంచనా వేస్తున్నారు. అదనంగా, ఈ చర్య చిన్న వమధ్య తరగతి వ్యాపారాలకు కూడా ఉపశమనం కలిగించవచ్చు, ఎందుకంటే తక్కువ పన్ను రేట్లు ఉత్పత్తి ధరలను తగ్గించి, వాటిని మరింత పోటీతత్వంగా చేయవచ్చు. అయితే, కొందరు నిపుణులు ఈ మార్పు ప్రభుత్వ ఆదాయంపై ప్రభావం చూపవచ్చని, దీనిని సమతుల్యం చేయడానికి ఇతర ఆదాయ మార్గాలను బలోపేతం చేయాలని సూచిస్తున్నారు.
