Woman Surgery While Watching OG: ఇటీవల వైద్యులు ఆపరేషన్లను వినూత్న పద్ధతుల్లో నిర్వహిస్తున్నారు. ముఖ్యంగా మెదడుకు సంబంధించిన వ్యాధులకు ఆపరేషన్లు చేసే సమయంలో రోగులు మెలకువగా ఉండాలి. అందుకే తమకు ఇష్టమైన సినిమాలను ప్రదర్శించడం.. వాటిని చూపించి ఆపరేషన్ చేయడం వంటివి చేస్తున్నారు. తాజాగా గుంటూరులో కూడా ఇలానే ఓ మహిళకు ఆపరేషన్ చేశారు. తన అభిమాన నటుడు నటించిన సినిమాను ఆపరేషన్ థియేటర్లో ప్రదర్శించి చికిత్స చేశారు. ఆపరేషన్ విజయవంతం కావడంతో ఊపిరి పీల్చుకున్నారు.
* నిరుపేద మహిళ..
ప్రకాశం జిల్లా దర్శి ప్రాంతానికి చెందిన గనిపిశెట్టి రాఘవులు, కోటేశ్వరమ్మ దంపతులు గుంటూరు జిల్లా పొన్నూరులో నివాసం ఉంటున్నారు. వారికి కిచిడీ షాపు ఉంది. అయితే ఇటీవల కోటేశ్వరమ్మ అనారోగ్యానికి గురయ్యారు. మూర్ఛ వ్యాధితో అస్వస్థతకు గురయ్యారు. వెంటనే కుటుంబ సభ్యులు వడ్లమూడి లోని డివిసి ఆసుపత్రిలో చేర్చారు. వెంటనే అక్కడ వైద్యులు స్కాన్ చేసి ఆమె తలలో రక్తం గడ్డకట్టి ఉండడాన్ని గుర్తించారు. ఆపరేషన్ చేయాలని కూడా నిర్ణయించారు. కానీ ఎటువంటి మత్తుమందు ఇవ్వకుండా మెలకువగా ఉన్న సమయంలోనే ఆ ఆపరేషన్ చేయాల్సి ఉంటుంది. అందుకే అక్కడి డాక్టర్లు వినూత్న ఆలోచన చేశారు. కోటేశ్వరమ్మకు పవన్ కళ్యాణ్ అంటే చాలా ఇష్టం. అందుకే ఆయన నటించిన ఓజి సినిమాను ప్రదర్శించి.. ఆమె చూస్తుండగానే ఈ ఆపరేషన్ పూర్తి చేయగలిగారు.
* ఇటీవల సర్వసాధారణం..
ఇటీవల నాడీ వ్యవస్థకు ముప్పు వాటిల్లకుండా.. రోగికి ఎటువంటి మత్తు మందు ఇవ్వకుండా.. ఆపరేషన్లు చేయడం ఆనవాయితీగా వస్తోంది. ఈ క్రమంలోనే కోటేశ్వరమ్మకు ఈ ఆపరేషన్ చేశారు. అయితే కొంతమంది పాత సినిమాలకు ఇష్టపడతారు. మరికొందరు కొత్త సినిమాలను ఇష్టంగా చూస్తారు. అటువంటివారికి క్లిష్టమైన ఆపరేషన్లు చేసే సమయంలో తాము అభిమానించే నటుడు చిత్రాన్ని ప్రదర్శించి ఆపరేషన్లు చేస్తుంటారు. ఇప్పుడు కోటీశ్వరమ్మ సైతం ఓ జి సినిమా చూసి తన ఆపరేషన్ కు ఎంతగానో సహకరించింది.
