Prashna Ravan: కొన్ని రకాల సాయాలు కొంతవరకు చేయగలరు. ఎవరో అండగా ఉన్నారని రెచ్చిపోతే కృష్ణ రావణ్ లా ఉంటుంది పరిస్థితి. పవన్ కళ్యాణ్ తో పాటు హిందూ దేవతలను దూషించిన కేసులో వరుసగా అరెస్టు అవుతున్నారు రావణ్. అందుకే న్యాయ సాయం కోసం ఆయన కుటుంబ సభ్యులు జగన్మోహన్ రెడ్డిని కలిశారు. బెంగళూరు వెళ్తున్న జగన్మోహన్ రెడ్డిని విమానాశ్రయంలో కలిసి కన్నీరు మున్నీరయ్యారు. కానీ జగన్ ఆ బాధ్యతను పార్టీ నేత దేవినేని అవినాష్ కి అప్పగించారు. ఆయన కూడా ఏం చేయలేకపోయారు. దీంతో అసలు సినిమా రావణ్ కుటుంబ సభ్యులకు అర్థం అయింది.
* ముందుకు వచ్చిన జడ శ్రవణ్ కుమార్
వాస్తవానికి రావణ్ కు న్యాయ సహాయం అందించేందుకు జడ శ్రావణ్ కుమార్ ముందుకు వచ్చారు. కానీ వైసీపీ లీడర్ సెల్ నేతలు శ్రావణ్ కుమార్ ను ఉద్దేశించి తక్కువ చేసి మాట్లాడారు. రావణ్ కోసం పార్టీ తరపున స్టార్ లాయర్లు వస్తున్నారంటూ వ్యాఖ్యానించేసేసరికి నొచ్చుకున్నారు. రావణ్ తరుపున వాదనలు వినిపించకుండానే కోర్టు నుంచి బయటకు వచ్చేసారు. అటు పార్టీ తరపున లాయర్లు రాక.. ఇటు ఉన్న లాయర్ శ్రావణ్ కుమార్ చేజారి పోవడంతో కుటుంబ సభ్యులు ఆందోళనకు గురయ్యారు. చివరకు బతిమిలాడుకోవడంతో శ్రావణ్ కుమార్ ముందుకు వచ్చి వాదనలు వినిపించారు. బెయిల్ ఇప్పించారు.
* వరుసగా కేసులు..
రావణ్ కు బెయిల్ వచ్చింది. కానీ ఆ ఆనందం ఎంతసేపు నిలవలేదు. బెయిల్ రాగానే పాయకరావుపేట పోలీసులు ఆయనపై నమోదైన మరో కేసులో అదుపులోకి తీసుకుని తరలించారు. దీంతో ఇప్పుడు రావణ్ కు అసలు పరీక్ష ఎదురవుతోంది. అందుకే తదుపరి కేసులో జడ శ్రావణ్ కుమార్ వాదిస్తారా? లేక పొన్నవోలు సుధాకర్ రెడ్డి రంగంలోకి దిగుతారా? అన్నది తెలియాల్సి ఉంది. కుటుంబ సభ్యులు మాత్రం జడ శ్రావణ్ కుమార్ ను మాత్రమే నమ్ముకున్నారు. వైయస్సార్ కాంగ్రెస్ పార్టీ నుంచి ఆశించిన స్థాయిలో సాయం అందదని ఒక నిర్ణయానికి వచ్చారు.
* ఆ భయంతోనే..
రావణ్ విషయంలో సాయం చేస్తే ప్రజల్లోకి భిన్న వైఖరి వెళుతుందన్నది వైయస్సార్ కాంగ్రెస్ పార్టీ నేతల ఆందోళన. హిందూ సమాజం పై తీవ్ర వ్యాఖ్యలు చేశారు రావణ్. హిందూ దేవతలను దారుణాతి దారుణంగా వ్యాఖ్యానించారు. ఇప్పుడు రావణ్ కు వైసీపీ తరఫున న్యాయ సహాయం చేస్తే ప్రజల్లోకి ప్రతికూలత వెళుతుందనేది వైసీపీ ఆందోళన. మరోవైపు కేంద్రంలోని బిజెపి పెద్దలకు కోపం వస్తుందని.. అందుకే జగన్మోహన్ రెడ్డి ఈ వ్యూహంతోనే న్యాయ సహాయానికి ముఖం చాటేసారని భావిస్తున్నారు. అయితే రావణ్ కు న్యాయ సహాయం అందకపోవడంపై పార్టీ సోషల్ మీడియాలోనే సెటైర్లు పడుతుండటం విశేషం.
