Forbes 250 Immigrants List: భారత్ లేకుంటే అమెరికా లేదు.. ఆ దేశ మాజీ అధ్యక్షుడు బిల్క్లింటన్ మూడు దశాబ్దాల క్రితం చేసిన ప్రకటన ఇది. ఇది నూటిని నూరుపాళ్లు నిజం. భారతీయులు అమెరికాకు వెళ్లి.. తక్కువ వేతనాలతో మన మేధాశక్తిని అమెరికా అభివృద్ధికి ధారపోశారు.. ఇప్పటికీ పోస్తున్నారు. అమెరికా ఎదుగుదలలో భారతీయుల పాత్రను ఎవరూ కాదనలేరు. భారత్తోపాటు ప్రపంచ వ్యాప్తంగా వలస వచ్చి స్థిరపడిన ఎలాన్ మస్క్ వంటి వారు కూడా అగ్రరాజ్యాభివృద్ధిలో భాగస్వాములయ్యారు. అమెరికా ఏర్పడి జూలై 5 నాటికి 250 ఏళ్లు పూర్తవుతుంది. ఈ నేపథ్యంలో ఫోర్బ్స్ 250 మంది ఉత్తమ వలసదారుల జాబితాను ప్రకటించింది. ఈ లిస్ట్లో 27 మంది భారత సంతతి వ్యక్తులు చోటు దక్కించుకోవడం, భారతీయల ప్రపంచ స్థాయి ప్రభావాన్ని స్పష్టం చేస్తోంది. ఇందులో వ్యాపారం, సాంకేతికత, సంస్కృతి, రాజకీయాలు వంటి రంగాల్లో విశేష కృషి చేసిన వలసదారులు ఉన్నారు.
టాప్లో ఆస్ట్రియా నటుడు..
250 మంది ఉత్తమ వలసవాదుల జాబితాలో ఆస్ట్రియా నుంచి వచ్చిన నటుడు–రాజకీయ నాయకుడు ఆర్నాల్డ్ ష్వాజ్నెగ్గర్ టాప్ స్థానంలో ఉన్నారు. ఈ జాబితా అమెరికా అభివృద్ధిలో వలసదారుల పాత్రను హైలైట్ చేస్తుంది. 27 మంది భారత సంతతి వ్యక్తుల్లో గూగుల్ సీఈవో సుందర్ పిచాయ్, మైక్రోసాఫ్ట్ సీఈవో సత్య నాదెళ్ల, పెప్సికో మాజీ సీఈవో ఇంద్రా నూయి వంటి ప్రముఖులు ఉన్నారు. వీరు తమ నాయకత్వంలో ప్రపంచ స్థాయి కంపెనీలను మరింత బలోపేతం చేశారు. సాంకేతిక రంగంలో భారతీయుల సంఖ్య ఎక్కువగా ఉండటం, ఈ జాబితాలో భారత్ టాప్ స్థానాల్లో ఒకటిగా నిలవడానికి కారణమైంది.
భారతీయుల విజయానికి ప్రతీక..
భారత సంతతి వ్యక్తులు ఈ స్థాయిలో విజయం సాధించడం కేవలం యాదృచ్ఛికం కాదు. భారతదేశంలోని ఉన్నత విద్యా వ్యవస్థ, గణితం–సైన్స్లో బలమైన పునాది, పని కఠినత్వం వంటివి వారిని ప్రపంచ స్థాయిలో పోటీ పడేలా చేశాయి. అమెరికా వంటి దేశంలో అవకాశాలు, ఇన్నోవేషన్కు అనుకూలమైన వాతావరణం ఈ ప్రతిభను మరింత ముందుకు తీసుకెళ్లాయి. వీరు కేవలం వ్యక్తిగత విజయం సాధించలేదు. గూగుల్, మైక్రోసాఫ్ట్ వంటి కంపెనీలను గ్లోబల్ లీడర్లుగా మార్చడం ద్వారా అమెరికా ఆర్థిక వ్యవస్థకు భారీగా సహకరించారు. ఇది ‘బ్రెయిన్ గెయిన్’ అనే భావనను బలపరుస్తుంది. అయితే, భారత్ నుంచి ప్రతిభావంతులు వలస వెళ్లడం వల్ల దేశంలోని నైపుణ్యాల కొరత గురించి కూడా చర్చలు జరుగుతున్నాయి.
250 సంవత్సరాల చరిత్రలో వలసదారులు ఎప్పుడూ కీలక భూమిక పోషించారు. భారత సంతతి వ్యక్తులు టెక్, బిజినెస్ రంగాల్లో ఆధునిక ఇన్నోవేషన్లకు నాంది పలికారు. వీరి నాయకత్వం వల్ల అమెరికా ఆర్థిక వృద్ధి, ఉద్యోగ సృష్టి, సాంకేతిక పురోగతి వేగవంతమైంది. ఈ లిస్ట్ ద్వారా ఫోర్బ్స్ అమెరికా అభివృద్ధి వలసదారుల సహకారం లేకుండా సాధ్యం కాదని సూచిస్తోంది. మొత్తంమీద, ఈ ఫోర్బ్స్ లిస్ట్ భారత సంతతి వ్యక్తుల విజయ గాథను మాత్రమే కాకుండా, ప్రపంచీకరణ యుగంలో నైపుణ్యాలు, అవకాశాలు ఎలా మిళితమవుతాయో చూపిస్తోంది.