Intra Circle Roaming: టెలికాం రంగంలో మరో కీలక ముందడుగు పడింది. నెట్వర్క్ సమస్యల వల్ల వినియోగదారులు ఎదుర్కొంటున్న అసౌకర్యాలను తగ్గించేందుకు టెలికాం కంపెనీలు ఇప్పుడు ఇంట్రా సర్కిల్ రోమింగ్ (ICR) సేవలను ప్రారంభించాయి. ఈ కొత్త సదుపాయం ద్వారా వినియోగదారులు తమ ప్రస్తుత నెట్వర్క్ సిగ్నల్స్ అందుబాటులో లేకపోయినా, అదే సర్కిల్లోని ఇతర టెలికాం నెట్వర్క్ సేవలను ఉపయోగించుకోవచ్చు.
ఇంట్రా సర్కిల్ రోమింగ్ అంటే ఏమిటి?
ఇంట్రా సర్కిల్ రోమింగ్ (ICR) అనేది టెలికాం ఆపరేటర్ల మధ్య ఒక ఒప్పందం. దీనిద్వారా ఒక ఆపరేటర్ వినియోగదారులు తమ సిగ్నల్ అందుబాటులో లేకపోయినప్పుడు, అదే సర్కిల్లో పనిచేస్తున్న మరో ఆపరేటర్ టవర్ సిగ్నల్స్ను ఉపయోగించుకోవచ్చు. దీని ద్వారా వినియోగదారులకు ఎప్పటికీ సిగ్నల్ సమస్యలు ఉండవు. ఇక మీదట బీఎస్ఎన్ఎల్, జియో, ఎయిర్టెల్ సిమ్ కార్డులు కస్టమర్లు డిజిటల్ భారత్ నిధి (DBN) కింద ఏర్పాటైన టవర్ల ద్వారా 4జీ సేవలను పొందొచ్చు.
డిజిటల్ భారత్ నిధి
దేశంలోని గ్రామీణ, మారుమూల ప్రాంతాలకు టెలికాం సేవలను అందించే లక్ష్యంతో కేంద్రం డిజిటల్ భారత్ నిధి (DBN) కార్యక్రమాన్ని ప్రారంభించింది. గతంలో దీనిని యూనివర్సల్ సర్వీస్ ఆబ్లిగేషన్ ఫండ్ అని పిలిచేవారు. దీనిని డిజిటల్ భారత్ నిధిగా మార్చారు. డిజిటల్ భారత్ నిధి (DBN) నిధులతో ఏర్పాటు చేయబడిన టవర్లు సంబంధిత టెలికాం సర్వీస్ ప్రొవైడర్ వినియోగదారులకు మాత్రమే సేవలు అందిస్తాయి. ఈ సందర్భంలో టెలికాం మంత్రి జ్యోతిరాదిత్య సింధియా ఇటీవల ఇంట్రా-సర్కిల్ రోమింగ్ సేవలను ప్రారంభించారు.
డిజిటల్ భారత్ నిధి (DBN) నిధులతో ఏర్పాటు చేసిన మౌలిక సదుపాయాలను పంచుకోవడానికి BSNL, Airtel, Reliance Jio సంస్థలు ముందుకు వచ్చాయని మంత్రి జ్యోతిరాదిత్య సింధియా అన్నారు. దీనివల్ల వివిధ నెట్వర్క్లకు ప్రత్యేక టవర్ల అవసరం తొలగిపోతుంది. సంబంధిత టెలికాం కంపెనీల వినియోగదారులు ఒకే టవర్ ద్వారా 4G సేవలను పొందగలుగుతారు. DBN నిధులతో దేశవ్యాప్తంగా దాదాపు 27 వేల టవర్లు ఏర్పాటు చేయబడ్డాయని, 35,400 మారుమూల గ్రామాలు దీని ద్వారా ప్రయోజనం పొందుతాయని ఆయన అన్నారు. DBN నిధులతో ఏర్పాటు చేసిన టవర్ల వరకు మాత్రమే ఈ సౌకర్యం అందుబాటులో ఉంటుందని ఆయన అన్నారు.
ఈ సేవ వినియోగదారులకు ఎలా ఉపయోగపడుతుంది?
* అందుబాటులో నెట్వర్క్: గ్రామీణ ప్రాంతాలు, సిగ్నల్స్ తక్కువగా ఉండే ప్రాంతాలు లేదా ప్రయాణాల సమయంలో నెట్వర్క్ సమస్యలు ఎదురయ్యే పరిస్థితుల్లో ఇది పెద్ద పరిష్కారం.
* కాల్ డ్రాప్లకు గుడ్బై: ఇంట్రా సర్కిల్ రోమింగ్ ద్వారా సిగ్నల్ లభ్యత స్థిరంగా ఉంటుంది, ఫలితంగా కాల్ డ్రాప్లు తగ్గుతాయి.
* డేటా కనెక్టివిటీ మెరుగుదల: వేగంగా పనిచేసే ఇంటర్నెట్ కోసం వినియోగదారులు ఇకపై తమ ప్రస్తుత ఆపరేటర్పై మాత్రమే ఆధారపడవలసిన అవసరం లేదు.
ఎలా పనిచేస్తుంది?
ఈ సేవలు టెలికాం ఆపరేటర్ల మధ్య కలయిక ఒప్పందాల ద్వారా పనిచేస్తాయి. ఒక వినియోగదారు తమ ప్రస్తుత నెట్వర్క్ కవరేజీ బలహీనంగా ఉన్నప్పుడు, అదే ప్రాంతంలో అందుబాటులో ఉన్న ఇతర ఆపరేటర్ నెట్వర్క్ను స్వయంచాలకంగా ఉపయోగించుకుంటారు.
ఎవరికి ఉపయోగకరం?
* తరచూ ప్రయాణాలు చేసే వ్యక్తులు
* గ్రామీణ ప్రాంతాల్లో నివసించే వినియోగదారులు
* అత్యవసర పరిస్థితుల్లో కవరేజ్ లేకపోవడం వల్ల ఇబ్బందులు పడేవారు
* ఐసీఆర్ సేవలను అందిస్తున్న ఆపరేటర్లు
ప్రస్తుతానికి, భారతీయ టెలికాం దిగ్గజాలు జియో, ఎయిర్టెల్, వోడాఫోన్ ఐడియా వంటి కంపెనీలు ఈ సేవలను ప్రారంభించాయి. ఐసీఆర్ సేవలను ప్రారంభించడంతో వినియోగదారుల అనుభవం మరింత మెరుగవుతుందని భావిస్తున్నారు. ఇంట్రా సర్కిల్ రోమింగ్ సేవలతో, టెలికాం వినియోగదారులకు నెట్వర్క్ సంబంధిత సమస్యలు గత చరిత్రగా మారనున్నాయి. “నో సిగ్నల్” అన్న మాటలు ఇకపై వినిపించవు!