Microsoft Hyderabad Data Center: Microsoft సంస్థ భారతదేశంలో తన క్లౌడ్, ఆర్టిఫిషియల్ ఇంటెలిజెన్స్ (AI) మౌలిక సదుపాయాలను భారీగా విస్తరిస్తోంది. ఇందులో భాగంగా ఇప్పటికే విశాఖపట్నంలో ఒక Data center ను ఏర్పాటు చేసేందుకు అంగీకారం తెలిపిన ఐటీ దిగ్గజం, ఇప్పుడు తెలంగాణ రాజధాని హైదరాబాద్లో మరో ప్రతిష్టాత్మక డేటా సెంటర్ నిర్మాణానికి నడుం బిగించింది. ఆసియా ఖండంలోనే మైక్రోసాఫ్ట్ పెడుతున్న అతిపెద్ద పెట్టుబడిగా ఇది నిలవనుంది. దీని గురించి పూర్తి వివరాల్లోకి వెళితే..
గత సంవత్సరం డిసెంబర్లో మైక్రోసాఫ్ట్ సీఈఓ సత్య నాదెళ్ల తన భారత ఏఐ (AI) పర్యటనలో భాగంగా ప్రధానమంత్రి నరేంద్ర మోదీని కలుసుకున్నారు. ఈ సందర్భంగా దేశవ్యాప్తంగా తమ ఉనికిని, సాంకేతిక సామర్థ్యాన్ని మరింత విస్తరించడానికి రాబోయే నాలుగేళ్లలో కంపెనీ ఏకంగా 17.5 బిలియన్ డాలర్ల భారీ పెట్టుబడి పెట్టనున్నట్లు ప్రకటించారు. ఇందులో భాగంగా హైదరాబాద్ లో డాటా సెంటర్ ఏర్పాటు చేయనున్నారు.అయితే 2026 మధ్య నాటికి ఈ కొత్త డేటా సెంటర్ను ప్రారంభించే అవకాశం ఉందని, దీనితో భారతదేశంలోనే మైక్రోసాఫ్ట్ అతిపెద్ద హైపర్స్కేల్ ఉనికిని కలిగి ఉంటుందని సత్య నాదెళ్ల స్పష్టం చేశారు.
భారతదేశంలో మైక్రోసాఫ్ట్ అజూర్ క్లౌడ్ సేవలతో పాటు, వారి సరికొత్త ఏఐ అసిస్టెంట్ ‘కోపైలట్ 365’ (Copilot 365) కి విపరీతమైన డిమాండ్ ఏర్పడింది. నెలకు సుమారు 30 డాలర్ల ధర కలిగిన ఈ అధునాతన ఏఐ సహాయకుడిని వినియోగించుకోవడానికి భారతీయ కార్పొరేట్ రంగం ఎంతో ఆసక్తి చూపిస్తోంది. ఈ నేపథ్యంలోనే ఆసియా వ్యాప్తంగా మైక్రోసాఫ్ట్ కేటాయించిన భారీ పెట్టుబడిలో సింహభాగం నేరుగా ఈ హైదరాబాద్ డేటా సెంటర్ నిర్మాణానికే తరలిరావడం విశేషం.
హైదరాబాద్లో ఏర్పాటు కాబోతున్న ఈ డేటా సెంటర్ ప్రధానంగా భారతదేశంలోని ప్రముఖ ఐటీ దిగ్గజాల ఏఐ సేవల అవసరాలను తీర్చడమే లక్ష్యంగా పెట్టుకుంది.
ప్రస్తుతం ఇన్ఫోసిస్, కాగ్నిజెంట్, టాటా కన్సల్టెన్సీ సర్వీసెస్ (TCS) వంటి ప్రధాన కంపెనీల్లో ఆర్టిఫిషియల్ ఇంటెలిజెన్స్ సేవల కోసం డిమాండ్ రోజురోజుకూ పెరుగుతోంది. సమాచారం ప్రకారం.. ఈ టాప్ ఐటీ కంపెనీలలో ప్రతి ఒక్కటి ఇప్పటికే సుమారు 50,000 కోపైలట్ లైసెన్సులను కలిగి ఉన్నాయి. ఈ భారీ డిమాండ్కు అనుగుణంగా అత్యంత వేగవంతమైన, సురక్షితమైన క్లౌడ్ మౌలిక సదుపాయాలను అందించడంలో హైదరాబాద్ డేటా సెంటర్ కీలక పాత్ర పోషించనుంది.
