Vaibhav Suryavanshi: 15 సంవత్సరాల వయసులో ఎవరైనా ఏం చేస్తారు.. బుద్ధిగా స్కూల్ కి వెళ్తారు. స్కూల్ ముగిసిన తర్వాత హోంవర్క్ చేసుకుంటారు. అది పూర్తి అయిన తర్వాత స్నేహితులతో ఆడుకుంటారు. సరదాగా టీవీ చూస్తారు. తల్లిదండ్రులతో కబుర్లు చెబుతారు. తోబుట్టువులతో ఆటలాడుకుంటారు. కానీ వైభవ్ సూర్య వంశీ పూర్తి డిఫరెంట్.
Also Read: దౌత్యం పేరుతో దళారీగా మారిన పాకిస్తాన్.. శాంతి చర్చలను బహిష్కరించిన ఇరాన్!
అతనికి చిన్నప్పటినుంచి క్రికెట్ అంటే విపరీతమైన పిచ్చి. కాకపోతే ఆర్థిక నేపథ్యం సహకరించేది కాదు. అయినప్పటికీ సూర్య వంశీ ఆసక్తిని గమనించిన తండ్రి తన ఇంటి పక్కన ఉన్న స్థలాన్ని క్రికెట్ మైదానంగా మార్చాడు. కొడుకు కోసం తన ఉద్యోగాన్ని కూడా పక్కన పెట్టాడు. అతడిలో ఉన్న క్రికెటర్ ను చూసి మురిసిపోయేవాడు. అతడు ఆడుతుంటే ఆనందించేవాడు.. తన తండ్రి ఇచ్చిన ప్రోత్సాహంతో వైభవ్ సూర్య వంశీ మరింత రాటు తేలాడు. బీహార్ క్రికెట్ జట్టులో చేరి.. డొమెస్టిక్ క్రికెట్లో సత్తా చూపించాడు.. ఫలితంగా అతడి ప్రతిభ వెలుగులోకి వచ్చింది. దీంతో అతడి గురించి దేశవ్యాప్తంగా చర్చ మొదలైంది.
గత సీజన్లో రాజస్థాన్ రాయల్స్ అతడిని కొనుగోలు చేసింది. అతనికోసం ఢిల్లీ జట్టు కూడా తీవ్రంగా పోటీ పడింది. చివరికి రాజస్థాన్ జట్టు సొంతం చేసుకుంది. ద్రావిడ్ శిక్షణలో సూర్య వంశీ అత్యుత్తమ టెక్నిక్ నేర్చుకున్నాడు. కాకపోతే అతడి బరువు విపరీతమైన సమస్యగా ఉండేది. వికెట్ల మధ్య వేగంగా పరుగులు పెట్టడంలో అతడు ఇబ్బంది పడేవాడు. చివరికి అతడి లోపం గురించి ద్రావిడ్ చెప్పడంతో.. దానిని సవరించుకునే పని మొదలుపెట్టాడు. చివరికి వైభవ్ సరి కొత్తగా కనిపించాడు.
వైభవ్ సూర్య వంశీ కి మటన్ అంటే చాలా ఇష్టం. పానీ పూరి కూడా ఇష్టంగా తింటాడు. అవసరమైతే కొన్ని సందర్భాలలో వందకు మించి పానీపూరీలు లాగించేవాడు. దాదాపు అర కిలో మటన్ తినేసేవాడు. చంపారన్ స్టైల్ లో చేసే మటన్ కూరను అతడు విపరీతంగా ఇష్టపడేవాడు.. ఎప్పుడైతే మటన్ ను దూరం పెట్టడం మొదలు పెట్టాడో .. పానీ పూరిని అవాయిడ్ చేశాడో.. వైభవ్ బరువు తగ్గాడు. డైట్ కంట్రోల్ లో ఉంచుకున్నాక బ్యాటింగ్ మీద మరింత దృష్టి పెట్టాడు. లోపాలను పూర్తిగా సవరించుకున్నాడు. ఫలితంగా అత్యుత్తమ ఆటగాడిగా కనిపిస్తున్నాడు
” మా కుమారుడు మటన్ ఇష్టంగా తినేవాడు. పానీ పూరి కూడా లాగించేవాడు. ద్రావిడ్ సార్ చెప్పిన తర్వాత డైట్ కంట్రోల్ లో పెట్టుకున్నాడు. బ్యాటింగ్ మీద దృష్టి పెట్టాడు. సెలెక్టెడ్ షాట్లు ఆడుతున్నాడు. అతని ఆట ఎలా మారిందో మీరు ఇప్పుడు గమనించవచ్చని” సూర్య వంశీ తండ్రి చెప్తున్నాడు.
