Andhra Global Investment Summit : ఏపీలో పెట్టుబడులకు అనువైన వాతావరణం సృష్టించాలని జగన్ ప్రభుత్వం సంకల్పించింది. 2023 మార్చి 3 మరియు 4 తేదీల్లో గ్లోబల్ ఇన్వెస్ట్మెంట్ సమ్మిట్ (జిఐఎస్)కి ఆతిథ్యం ఇవ్వడానికి ఆంధ్రప్రదేశ్లోని విశాఖపట్నం సిద్ధంగా ఉంది. ‘అడ్వాంటేజ్ ఆంధ్రప్రదేశ్-వేర్ అబండెన్స్ మస్పర్టీ’ పేరిట జగన్ ప్రభుత్వం సదస్సు నిర్వహిస్తోంది. దీనికి దేశ విదేశాల నుంచి పెట్టుబడిదారులను ఆహ్వానిస్తోంది. ఏపీలో పెట్టుబడి అవకాశాల కోసం 13 రంగాలను గుర్తించింది. బలమైన పారిశ్రామిక పునాది, ఎంఎస్ఎంఈలు, స్టార్టప్ల బలమైన ఉనికిని చాటేందుకు సిద్ధమైంది. ఏపీకి బ్యాడ్ నేమ్ ను తొలగించుకోవాలని పట్టుదలగా ఉంది. పెట్టుబడిదారులకు స్నేహపూర్వక వాతావరణాన్ని సృష్టించేందుకు ప్రత్యేక రాష్ట్ర పెవిలియన్ సమ్మిట్ ఏర్పాటు చేస్తోంది. చైనా, అమెరికా సహా 40 దేశాల నుండి పెట్టుబడిదారులు, ప్రతినిధులు శిఖరాగ్ర సమావేశానికి హాజరుకానున్నారు. ఈ నేపథ్యంలో ఆంధ్ర గ్లోబల్ ఇన్వెస్ట్మెంట్ సమ్మిట్ పై స్పెషల్ ఫోకస్..
-సమ్మిట్ లో ఏమేం ఉంటాయి.?
సమ్మిట్లో మొదటి రోజు సీఎం జగన్, మంత్రులు, వ్యాపారులు, “ఆంధ్రా అడ్వాంటేజ్” ,భారతదేశ ఆధునిక ఆర్థిక వ్యవస్థపై దాని ప్రభావం గురించి చర్చిస్తారు. సమ్మిట్లో స్థిరమైన అభివృద్ధి, భారతదేశం యొక్క టెక్, ఎలక్ట్రిక్ విప్లవం, ఇతర అంశాలపై సెషన్లు కూడా ఉంటాయి. ఫాస్ట్ట్రాక్ మెకానిజం అమలుతో ఈజ్ ఆఫ్ డూయింగ్ బిజినెస్ టాలీలో ఆంధ్ర అగ్రగామిగా ఉందన్న విషయాన్ని పెట్టుబడిదారులకు వివరిస్తారు. పెట్టుబడుల కోసం సింగిల్ విండో సిస్టమ్ ఏర్పాటు చేశామని.. పెట్టుబడికి కార్పొరేట్ రంగాన్ని ఒప్పించేలా ఏపీ ప్రభుత్వం కసరత్తు చేసింది. 24 ప్రభుత్వ శాఖలకు చెందిన 96 సేవలను ఒకే చోట తీసుకువస్తూ పెట్టుబడిదారులను ఆకర్షించేలా ప్లాన్ చేశారు..
సమ్మిట్ రెండవ రోజు కేంద్ర ఎలక్ట్రానిక్స్ మరియు ఐటీ శాఖ సహాయ మంత్రి రాజీవ్ చంద్రశేఖర్ నేతృత్వంలో భారతదేశ సాంకేతిక , డేటా ఎడ్జ్లో ఆంధ్ర పాత్రపై చర్చ వంటి అనేక పరిశ్రమ-కేంద్రీకృత సెషన్లు ఉంటాయి. భారతదేశ తీరప్రాంత సముద్ర వాణిజ్యాన్ని ఆంధ్రప్రదేశ్ ఎలా శక్తివంతం చేయగలదు అనే అంశంపై కేంద్ర ఓడరేవులు, షిప్పింగ్ మరియు జలమార్గాల మంత్రి సర్బానంద్ సోనోవాల్ ద్వారా వివరిస్తారు. ఫార్మా, హెల్త్కేర్ రంగంపైనా దృష్టి సారిస్తుంది. ఇందులో డాక్టర్ రెడ్డీస్ లేబొరేటరీస్ చైర్మన్ డాక్టర్ సతీష్ రెడ్డి ఫార్మా ‘ఆర్ అండ్ డి విప్లవం’కు నాయకత్వం వహించడంపై ప్రదర్శన ఇస్తారు. భారత్ బయోటెక్ వ్యవస్థాపక చైర్మన్ డాక్టర్ సుచిత్రా ఎల్లా నేతృత్వంలో ప్రపంచాన్ని వ్యాధుల నుండి రక్షించడంపై చర్చ ఉంటుంది. సెషన్లో ఇతర ప్రముఖ వక్తలు వెల్స్పన్ గ్రూప్ ఎండీ రాజేష్ మండవేవాలా, ఆ తర్వాత ప్రపంచ బ్యాడ్మింటన్ ఛాంపియన్ పీవీ సింధు స్ఫూర్తిదాయకమైన ప్రసంగం ఉంటుంది. జీఐఎస్ 2023 ముగింపు ప్రసంగాన్ని ముఖ్యమంత్రి వైఎస్ జగన్ మోహన్ రెడ్డి చేయనున్నారు.
-పోయినసారి ఏమి జరిగింది? ఎన్ని కంపెనీస్ ఇన్వెస్ట్మెంట్ పెట్టాయి?
గతంలో చంద్రబాబు హయాంలోనూ విశాఖలో ఇలాంటి సమ్మిట్ జరిగింది. లోకేష్, చంద్రబాబులు ప్రపంచమంతా తిరిగి పెట్టుబడులను ఆహ్వానించారు. వచ్చిన వారికి భూములు కేటాయించారు. దాదాపు 2.5 లక్షల కోట్ల పెట్టుబడులు వచ్చాయని ఊదరగొట్టారు. కట్ చేస్తే కనీసం 20వేల కోట్ల పెట్టబడులు కూడా పెట్టలేదు. తర్వాత జగన్ ప్రభుత్వం రావడంతో ఈ పెట్టబడులు అటకెక్కాయి.
-సమ్మిట్ కు రాబోయే కంపెనీలు ఏవి? ఎంత పెట్టనున్నారు?
సమ్మిట్కు హాజరయ్యేందుకు ఇప్పటికే దాదాపు 9,000 మంది రిజిస్ట్రేషన్లు చేసుకున్నారని, అది 12,000కు చేరుకోవచ్చని అధికారులు తెలిపారు. 1.50 లక్షల కోట్ల వరకు పెట్టుబడుల ప్రకటనలు రాష్ట్రానికి వస్తాయని అంచనా వేస్తున్నట్లు అధికారులు తెలిపారు. ఆంధ్రప్రదేశ్ చాలా వనరులతో కూడిన రాష్ట్రమని, భారతదేశంలోనే అత్యంత వేగంగా అభివృద్ధి చెందుతున్న రాష్ట్రంగా ఇప్పటికే ఆవిర్భవించిందని ముఖ్యమంత్రి వైఎస్ జగన్మోహన్రెడ్డి అన్నారు. అంబానీలు, జిందాల్లు, బిర్లాలు, బంగర్లు మరియు మధ్యశ్రేణి పెట్టుబడిదారులు ఇప్పుడు ఆంధ్రప్రదేశ్లో పెట్టుబడులు పెట్టాలని ఆసక్తి చూపుతుండడం ఒక ముఖ్యమైన విజయం అని జగన్ అన్నారు. పెట్టుబడిదారులకు రాజకీయ సుస్థిరతతో పాటు బలమైన పాలనను కూడా రాష్ట్రం అందిస్తోందని ముఖ్యమంత్రి పేర్కొన్నారు.
-ఏఏ రంగాల్లో పెట్టుబడులు రానున్నాయి.?
అసమానమైన అవకాశాలను అందించే 13 ఫోకస్ రంగాలను రాష్ట్ర ప్రభుత్వం గుర్తించింది. 974 కి.మీ పొడవైన తీర రేఖతో, ఇప్పటికే ఉన్న ఆరు ఓడరేవులు , రాబోయే నాలుగు ఓడరేవులతో దేశంలోనే రెండవ పొడవైన తీరప్రాంతంతో ఆగ్నేయ దిశలో భారతదేశం యొక్క గేట్వేగా ఆంధ్రప్రదేశ్ను శిఖరాగ్ర సమావేశం అంచనా వేసి పెట్టుబడులను ఆహ్వానిస్తోంది. దేశవ్యాప్తంగా కేంద్రం అభివృద్ధి చేస్తున్న 11 పారిశ్రామిక కారిడార్లలో ఆంధ్రప్రదేశ్ మూడు కారిడార్లలో భాగం అని చాటిచెబుతుంది. హైదరాబాద్ నుండి బెంగళూరు, విశాఖపట్నం నుండి చెన్నై మరియు చెన్నై నుండి బెంగళూరు వరకూ కారిడార్ లు నిర్మించాలని.. ఏపీ మీదుగా ఈ ప్రాజెక్టులకు ఏపీ ప్రభుత్వం సంకల్పించింది. పెట్టుబడులు ఆ ప్రాంతాల్లోనే ఉండనున్నాయి. 2021-22లో 11.43 శాతం రెండంకెల వృద్ధితో ఇప్పటివరకు విడుదల చేసిన సంఖ్యల ప్రకారం ఇది భారతదేశంలో అత్యంత వేగంగా అభివృద్ధి చెందుతున్న రాష్ట్రంగా ఏపీ అవతరించింది.ప్రభుత్వం చేపట్టిన పాలనా సంస్కరణలు, పెట్టుబడిదారులకు అనుకూలమైన విధానాలను రూపొందించడం వల్ల ఈజ్ ఆఫ్ డూయింగ్ బిజినెస్ (ఈవోడీబీ)లో రాష్ట్రం వరుసగా మూడేళ్లుగా అగ్రస్థానంలో నిలిచింది.
-ఈ సమ్మిట్ కు కేంద్రమంత్రుల రాక.. 100 కోట్ల ఖర్చు
కేంద్ర రోడ్డు రవాణా మరియు రహదారుల శాఖ మంత్రి నితిన్ గడ్కరీ, వాణిజ్య మరియు పరిశ్రమల శాఖ మంత్రి పీయూష్ గోయల్, కేంద్ర విద్యుత్ శాఖ మంత్రి ఆర్కే సింగ్ తదితరులు కూడా ఈ సదస్సుకు హాజరుకానున్నారు.సమ్మిట్ కు ప్రపంచవ్యాప్తంగా ఉన్న పరిశ్రమల ప్రముఖులను ఆహ్వానించడానికి ముఖ్యమంత్రి మరియు సీనియర్ మంత్రులు గత కొన్ని వారాలుగా అనేక పెట్టుబడిదారుల సమావేశాలను నిర్వహించారు. ముంబైలో రాష్ట్ర మంత్రులు ఇటీవల 200 మంది అగ్రశ్రేణి పారిశ్రామికవేత్తలతో చర్చలు జరిపారు. ఢిల్లీ, బెంగళూరు, చెన్నై, హైదరాబాద్లో కూడా ఇలాంటి పెట్టుబడిదారుల సమావేశాలు జరిగాయి.గ్లోబల్ ఇన్వెస్ట్మెంట్ సమ్మిట్లో పాల్గొనేందుకు ముఖేష్ అంబానీ, కెఎమ్ బిర్లా, హరి మోహన్ బంగూర్, సజ్జన్ జిందాల్, సంజీవ్ బజాజ్ మరియు నవీన్ జిందాల్తో సహా ప్రముఖ పారిశ్రామికవేత్తలను రాష్ట్రం ఆహ్వానించింది. సమ్మిట్కు ముందు పోర్టు సిటీని సుందరంగా తీర్చిదిద్దేందుకు రాష్ట్ర ప్రభుత్వం రూ.100 కోట్లు వెచ్చించింది.
-జగన్ ఇన్వెస్టర్స్ నీ ఆకర్షించ గలడా?
జగన్ ప్రభుత్వంలో పారిశ్రామికవేత్తలు పారిపోతున్నారని.. పెట్టుబడికి రావడం లేదని విపక్షాలు తీవ్ర ఆరోపణలు చేశాయి.పారిశ్రామికంగా అథోగతి పాలైందని విమర్శించారు. ఆమెరోన్ లాంటి కంపెనీ కూడా వేధింపులకు తెలంగాణ తరలిపోయిందని విమర్శించారు. ఈ క్రమంలోనే ఆ ముద్ర ను చెరిపేసేందుకు జగన్ సంకల్పించారు. స్వయంగా అంబానీ, అదానీ సహా పారిశ్రామికవేత్తల వద్దకు మంత్రులను పంపి మరీ ఆహ్వానించాడు. పెట్టుబడులు పెట్టాలని జగన్ భరోసానిచ్చాడు. అయితే జగన్ కక్ష్యసాధింపుల రాజకీయానికి పారిశ్రామికవేత్తలు ఎంతమంది వస్తారు? ఎంత పెడుతారన్నది వేచిచూడాలి.
