Modern Youth Marriage: బెండకాయ ముదిరితే కూరకు పనికిరాదు..బ్రహ్మచారి ముదిరితే పెళ్లికి పనికిరాడు. ఇది ఒకప్పుడు విపరీతమైన ప్రచారంలో ఉన్న సామెత. ఇప్పుడు దీనికి ఈ తరం యువత అర్థం మార్చేశారు.. బెండకాయ ముదిరితే కూర వండుకోవడం మానేయాలి. బ్రహ్మచారి ముదిరితే హేళన చేయడం ఆపాలి. ఎవడి జీవితం వాడిది. బెండకాయ కూర వండుకోవాలని ఎందుకనుకోవాలి.. ఎన్నో రకాల కూరగాయలు అందుబాటులో ఉన్నాయి కదా.. అని నేటి యువత సమాధానం చెబుతున్నారు.
చదువు.. ఉద్యోగం.. కెరియర్.. ఆ తర్వాత అత్యున్నత స్థాయి అందుకోవాలని నేటి యువత భావిస్తోంది. అందువల్లే పెళ్లి అనే ఆలోచనను పక్కనపెడుతోంది. పైగా నేటి కాలంలో పిల్లల అభిప్రాయానికే తల్లిదండ్రులు ఓటు వేస్తున్నారు. అందువల్ల చాలామంది యువత తమకు నచ్చినట్టు బతికేస్తున్నారు. కేవలం యువకులు మాత్రమే కాదు.. యువతులు కూడా ఇలానే ఉండిపోతున్నారు.. నచ్చిన ఉద్యోగం చేయడం.. మెచ్చినట్టుగా బతికేయడం.. స్నేహితులతో కాలక్షేపం చేయడం.. టైంపాస్ కాకపోతే ట్రావెలింగ్ చేయడం వంటి వాటిని నేటి యువత ఎంచుకుంటున్నది. ఒకవేళ ప్రేమ వ్యవహారాలు గనక ఉండి ఉంటే.. వాటిని పెళ్లి వరకు రానివ్వడం లేదు.. కో లివింగ్ ను నేటి యువత విపరీతంగా ఇష్టపడుతోంది. గతంలో ఈ కల్చర్ వెస్ట్రన్ కంట్రీస్ లో ఉండేది. ఇప్పుడు మనదేశంలోకి కూడా వ్యాపించింది.
ప్రపంచవ్యాప్తంగా ఇటీవల ఓ సంస్థ సర్వే నిర్వహించింది. ఆ సర్వేలో ఆసక్తికరమైన విషయాలు వెలుగు చూశాయి. ఆ సమాచారం ప్రకారం స్వీడన్ దేశంలో 51 శాతం, డెన్మార్క్ లో 50%, పిన్ ల్యాండ్లో 49%, జర్మనీలో 48%, నార్వే లో 47 శాతం ఒంటరిగానే ఉంటున్నారు. వ్యక్తిగత స్వేచ్చను అక్కడి ప్రజలు విపరీతంగా ఇష్టపడుతున్నారు. ఇక మనదేశంలో 25 శాతం సింగిల్గానే ఉంటున్నారు.. వ్యక్తిగత స్వేచ్ఛ కావాలని.. పెళ్లి అనేది ఆప్షన్ మాత్రమేనని.. జీవితాన్ని నచ్చినట్టు జీవించాలని ఈ సర్వేలో పాల్గొన్నవారు చెప్పారు.
పెళ్లి అనేది అవసరం లేదని.. మన స్వేచ్ఛను ఒకరి దగ్గర తాకట్టు పెట్టాల్సిన అవసరం లేదని.. ఒకరు చెప్పినట్టు వింటే అప్పుడు మన జీవితానికి అర్థం ఏంటని నేటి యువత ప్రశ్నిస్తోంది. కష్టపడి.. సంపాదించి.. అన్ని రకాలుగా సౌకర్యాలు సమకూర్చిన తర్వాత.. గొడవలు పడుతూ ఉంటే అలాంటి బంధాన్ని ఎందుకు కొనసాగించాలని నేటి యువత ప్రశ్నిస్తోంది.
ఒంటరిగా ఉంటే మాత్రం నరకానికి పోతామా.. జంటగా ఉంటే మాత్రం స్వర్గ సుఖాలను అనుభవిస్తామా.. అంటూ వితండవాదానికి దిగుతున్నారు. ప్రేమ అనేది అందులో మునికి తేలడానికేనని.. పెళ్లి చేసుకుని దానిని సర్వనాశనం చేయడానికి కాదని మెజారిటీ యువత అభిప్రాయపడుతోంది. అందువల్లే తమ పెళ్ళికి దూరంగా ఉంటామని చెబుతోంది. ఈ సర్వే నేటికాలపు యువత అభిప్రాయాలను ప్రతిబింబిస్తోందని విశ్లేషకులు అంటున్నారు. ఇలానే కొనసాగితే జనాభా సంక్షోభం ఏర్పడి.. అది కాస్త ఆయా దేశాల ప్రగతి మీద ప్రభావం చూపిస్తుందని వారు ఆందోళన వ్యక్తం చేస్తున్నారు.
