Wedding Cancelled Over Makeup Issue: పెళ్లి జరుతుండగా.. అయ్యవారు మంత్రాలు చదువుతుండగా.. ఓ పక్కనుంచి ఆపండి అనే మాట వినిపిస్తుంది. ఇలాంటి సీన్లు సినిమాల్లో కనిపిస్తాయి. కట్నం ఇవ్వలేదనో.. తక్కువ ఇచ్చారనో.. లేక పెళ్లి కొడుకే లేదా పెళ్లి కూతురుకు అప్పటికే వేరే రిలేషన్ ఉందనో ఆపడం చూస్తుంటాం. ఇక కొన్ని పెళ్లిళ్లు పెళ్లి కొడుకు నచ్చలేదని ఆపిన ఘటనలూ ఉన్నాయి. కానీ మేకప్ సామగ్రి తక్కువైందని పెళ్లి కాన్సన్ చేసుకున్న ఘటన ఉత్తరప్రదేశ్లో జరిగింది. దీంతో పెళ్లి వేదిక.. రణరంగానికి వేదికైంది.
పెళ్లి మండపంలో ఊహించని ఘర్షణ
వివాహ వేడుకలు జరుగుతుండగా, మేకప్ ఆర్టిస్ట్ అందించిన సామగ్రిపై వధువు అసంతృప్తి వ్యక్తం చేసింది. తనకు కావాల్సినంత మేకప్ సామగ్రి లేదని, నాణ్యత తక్కువగా ఉందని ఆమె ఆరోపించింది. దీంతో ఆమె పెళ్లికి నిరాకరించింది. దీంతో ఇరు కుటుంబాల మధ్య వాగ్వాదానికి దారితీసింది.
పొట్టుపొట్టు కొట్టుకున్నరు..
ఇరువర్గాల మధ్య మాటల యుద్ధం ముదిరి రాళ్ల రువ్వుకున్నారు. పెళ్లికొడుకు కారును వధువు వర్గీయులు ధ్వంసం చేశారు. పెళ్లికొడుకు సోదరుడిపై దాడి జరిగింది. పెళ్లి మండపంలోని కొన్ని వస్తువులు ధ్వంసమయ్యాయి. విషయం తెలుసుకున్న స్థానిక పోలీసులు వెంటనే రంగప్రవేశం చేశారు. ఘర్షణలో పాల్గొన్న పలువురిని అరెస్టు చేసి, పరిస్థితిని అదుపులోకి తెచ్చారు. ఇరువర్గాలను పోలీస్ స్టేషన్కు పిలిపించి, రాజీ కుదర్చే ప్రయత్నం చేశారు.
చివరికి పెళ్లి రద్దు
పెద్దమనుషులు, పోలీసు అధికారుల సమక్షంలో ఇరు కుటుంబాలు చర్చలు జరిపాయి. చివరికి పెళ్లిని రద్దు చేసుకునేందుకు ఇరువర్గాలు అంగీకరించాయి. వరకట్న వేధింపులు లేదా ఇతర కారణాలు కాకుండా, కేవలం మేకప్ సామగ్రి తక్కువైందని పెళ్లి రద్దు కావడం స్థానికులను ఆశ్చర్యపరిచింది.
ఈ ఘటన పెళ్లిళ్లలో పెరుగుతున్న ఆర్భాటం, వస్తు నిర్ధారణపై ఉన్న అతిశయ అంచనాలను ఎత్తిచూపుతోంది. మేకప్ సామగ్రి వంటి చిన్న విషయాల కోసం పెళ్లిళ్లు రద్దు కావడం, ఇరు కుటుంబాల మధ్య ఘర్షణలు చోటుచేసుకోవడం సమాజంలో మారుతున్న వివాహ సంస్కృతికి నిదర్శనంగా మారింది. వివాహాలపై సమాజంలో అవగాహన మారాల్సిన అవసరం ఉందని సామాజిక విశ్లేషకులు అభిప్రాయపడుతున్నారు.