tvk vijay government : అధికారంలో ఉన్న పార్టీ దానిని సుస్థిరం చేసుకోవడానికి ప్రయత్నిస్తుంది. అధికారం లేని పార్టీ దానిని దక్కించుకోవడానికి ప్రయత్నాలు చేస్తుంది. ఎవరి పనులు వారివే. ఎవరి లక్ష్యాలు వారివే. ఎవరి ఉద్దేశాలు వారివే. అయితే అధికారం అనేది విపరీతమైన స్వేచ్ఛను.. అంతకుమించిన సౌలభ్యాలను ఇస్తుంది. అందువల్లే రాజకీయ పార్టీలు అధికారం కోసం ఎన్ని అడ్డదారులైనా సరే తొక్కుతుంటాయి. విమర్శలు.. ఆరోపణలు.. వ్యూహాలు ఇలా చెప్పుకుంటూ పోతే ఎన్నో చేస్తుంటాయి.
రాజకీయం అనేది ఒక పరమపద సోపానం లాంటిది. రెండు నిచ్చెనలు ఎక్కి పైకి చేరుకోగానే.. లాగేసే పాములు చాలా ఉంటాయి. అలాంటి పాములను చూసుకుంటూ జాగ్రత్తగా నిచ్చెనలు ఎక్కుతూ ఉండాలి. అలా కాకుండా నిర్లక్ష్యంగా ఉంటే పాములు లాగేస్తాయి.. అవసరమైతే కింద పడేసి తొక్కుతాయి. ప్రస్తుతం తమిళనాడు రాజకీయాల్లో ఇలాంటి పరిస్థితులే కనిపిస్తున్నాయి. అందువల్లే అక్కడి పరిణామాలు ప్రతిరోజు జాతీయస్థాయి మీడియాలో కనిపిస్తున్నాయి. వినిపిస్తున్నాయి .
తమిళనాడులో ఈసారి ఏ పార్టీకి కూడా అధికారాన్ని సొంతంగా దక్కించుకునే స్థాయిని ప్రజలు ఇవ్వలేదు. పైగా ఈసారి ద్రావిడ రాజకీయాలకు భిన్నంగా అక్కడి ప్రజలు తీర్పు ఇచ్చారు. విజయ్ టీవీకే పార్టీ అధిక స్థానాలు గెలుచుకున్నప్పటికీ.. పొత్తులు కుదుర్చుకొని అధికారంలోకి వచ్చింది. అందువల్ల అక్కడ రాజకీయం రసవత్తరంగా మారుతుంది. ఇప్పటికే డిఎంకె అధినేత స్టాలిన్ టీవీకే ప్రభుత్వం మీద తీవ్రస్థాయిలో విమర్శలు చేస్తోంది.. అంతేకాదు, టీవీకే పార్టీ ప్రభుత్వం కూలిపోతుందని.. కౌంట్ డౌన్ మొదలైందని.. ప్రజలు ఎన్నికలకు సిద్ధంగా ఉండాలని స్టాలిన్ పిలుపునిచ్చారు. స్టాలిన్ ఇలా మాట్లాడటం ఇదే తొలిసారి కాదు. విజయ్ ప్రభుత్వం కొలువుదిరిన తొలి రోజుల్లోనే స్టాలిన్ ఈ తరహా వ్యాఖ్యలు చేశారు.
జాతీయ మీడియాలో వస్తున్న వార్తల ప్రకారం తమిళనాడులో ప్రభుత్వం కూలిపోతే డీఎంకే.. అన్నా డీఎంకే కలిసి ప్రభుత్వాన్ని ఏర్పాటు చేస్తాయని తెలుస్తోంది. వాస్తవానికి విజయ్ కి కాంగ్రెస్, ఐయూఎంఎల్, కమ్యూనిస్టులు గనుక సపోర్ట్ చేయకపోతే కచ్చితంగా డీఎంకే, అన్నా డీఎంకే కలిసి ప్రభుత్వాన్ని ఏర్పాటు చేసేవని అప్పట్లో వార్తలు వచ్చాయి. ఆ తర్వాత టీవీ కే అధినేత విజయ్ చాకచక్యంగా అడుగులు వేయడంతో ఆ రెండు పార్టీల పొత్తుకు బ్రేక్ పడింది. ఒకవేళ స్టాలిన్ చెప్పినట్టుగా ప్రభుత్వం కూలిపోతే డీఎంకేకు అన్న డీఎంకే సపోర్ట్ చేస్తుందా.. ఇప్పటికే ఈ రెండు పార్టీలలో చీలికలు వచ్చాయి. కొంతమంది నేతలు విజయ్ కి బహిరంగంగానే మద్దతు పలుకుతున్నారు. అలాంటప్పుడు వారి సపోర్టు వీరికి ఏ విధంగా లభిస్తుంది.. ఐయూఎంఎల్.. కాంగ్రెస్ పార్టీ ఎమ్మెల్యేలకు విజయ్ మంత్రి పదవులు ఇచ్చారు. పెద్దగా అసమ్మతి కూడా లేదు. అలాంటప్పుడు స్టాలిన్ విజయ్ ప్రభుత్వం కూలిపోతుందని ఎలా చెబుతారని టీవీకే నేతలు అంటున్నారు. వయసు మరలిపోయింది కాబట్టి.. స్టాలిన్ అలా మాట్లాడుతున్నారని టీవీ కె నేతలు ఎద్దేవా చేస్తున్నారు.
