CM Vijay: రాజకీయ నాయకులు నాలుక మడత పెట్టడం కొత్తేమీ కాదు. మడమ తిప్పడం కూడా వింత కాదు. పైగా దేశవ్యాప్తంగా క్రెడిట్ చోరీ రాజకీయాలు దర్జాగా సాగుతున్నాయి. గొప్పగా ఉంటే నాది అని.. చెత్తగా ఉంటే అవతలివాడిదని చెప్పుకోవడం ఇప్పటి కాలంలో అలవాటుగా మారింది. ఇలాంటి వ్యవహారాలకు తలలు పండిన రాజకీయ నాయకులు పాల్పడుతుంటారు. ఇది తప్పా? ఒప్పా? అనే విషయాలను పక్కన పెడితే.. ఇటువంటి వ్యవహారాలు రాజకీయ నాయకులకు అలవాటుగా మారిపోతున్నాయి.
తలలు పండిన రాజకీయాలు మాత్రమే కాదు.. కొత్తగా రాజకీయాల్లోకి వచ్చిన వారు కూడా ఇలాంటి వ్యవహారాలకు పాల్పడటం నిజంగా ఆశ్చర్యాన్ని కలిగిస్తోంది. తమిళనాడులో ముఖ్యమంత్రిగా విజయ్ ప్రమాణ స్వీకారం చేసి పది రోజులు కూడా కావడం లేదు. పైగా ఆయన అధికారాన్ని దక్కించుకోవడానికి అనేక రకాల ప్రయత్నాలు చేశారు. పుష్ప సినిమా మాదిరిగా సోఫాలు కూడా పంపించారు.. ఎన్డీఏ కూటమిలో ఉన్న ఏఐడీఎంకే మద్దతు తీసుకోబోనని చెప్పిన ఆయన.. కొద్ది రోజులకే మాట మార్చారు. అసెంబ్లీలో బలపరీక్ష నెగ్గడానికి ఆయన అన్నాడీఎంకే సపోర్ట్ తీసుకోవాలి.. అంతేకాదు ఇంకా అనేక రకాలుగా ఆయన నాలుక మడత పెడుతూనే ఉన్నారు. కేవలం ఈ పది రోజుల్లోనే ఆయన ఈ పని చేయడం నిజంగా ఆశ్చర్యాన్ని కలిగిస్తోంది.
తన వ్యక్తిగత జ్యోతిష్యుడిని ముఖ్యమంత్రి కార్యాలయంలో ఉన్నతమైన అధికారిగా విజయ్ నియమించుకున్నారు. దీనిపై ప్రతిపక్షాలు తీవ్రస్థాయిలో మండిపడ్డాయి. హేతువాద సంఘాలు తోడయ్యాయి. దీంతో విజయ్ వెనక్కి తగ్గక తప్పలేదు. పైగా జ్యోతిష్యుడి నియామకం పట్ల వెంటనే స్పందించారు విజయ్. 24 గంటల్లో అతడు నియామకాన్ని రద్దు చేశారు.
సనాతన ధర్మాన్ని డీఎంకే ఎమ్మెల్యే ఉదయనిధి తీవ్రంగా విమర్శించారు. ఆ సమయంలో విజయ్ సైలెంట్ గా ఉన్నారు. ఇప్పుడు విజయ మంత్రివర్గంలో కీలక మంత్రి అధర్వ.. బహిరంగంగానే ఉదయనిది వ్యాఖ్యలను తప్పుపట్టారు. ఇది ఆ పార్టీలో ఉన్న అంతర్గత వ్యవహారాలను బయటపెట్టింది.
ఎన్డీఏ కూటమికి అనుకూలంగా ఉండే ఏ పార్టీ మద్దతు తీసుకోబోమని విజయ్ ప్రకటించారు. ఫ్లోర్ టెస్ట్ సమయంలో సిద్ధాంతాన్ని పక్కన పెట్టి ఏఐడీఎంకే కు చెందిన 25 మంది తిరుగుబాటు ఎమ్మెల్యేల సపోర్ట్ తీసుకున్నారు.
ఎన్నికల ప్రచారం సమయంలో ప్రతి మహిళకు 2500 ఆర్థిక సహాయం చేస్తామని విజయ ప్రకటించారు. అయితే ఆ పథకాన్ని ఇంతవరకు ప్రారంభించలేదు. పైగా ఇప్పుడు అమల్లో ఉన్న వెయ్యి రూపాయల పథకాన్ని కూడా నిలిపివేస్తామని.. దానిని పునర్ వ్యవస్థీకరిస్తామంటూ చెబుతున్నారు.
స్థూలంగా చూస్తే తమిళనాడు సీఎం పరిపాలనకు.. అరవింద్ కేజ్రివాల్ వ్యవహరించిన తీరుకు పెద్దగా తేడా కనిపించడం లేదు. సోషల్ మీడియాలో విజయ్ గురించి కొంతమంది గొప్పగా చెప్పవచ్చు. పి ఆర్ టీం రకరకాల వీడియోలను విడుదల చేయవచ్చు. కానీ అంతిమంగా ఫీల్డ్ రియాలిటీ మాత్రమే నిలబడుతుంది. ఎందుకంటే రీల్ కంటే రియల్ చాలా విలువైనది.
