Operation Sindoor 2.0: ఇండియా–పాక్ సరిహద్దు వద్ద మళ్లీ ఉద్రిక్తతలు పెరుగుతున్నాయి. గుజరాత్లోని సర్ క్రీక్ ప్రాంతంలో పాకిస్తాన్ ఆర్మీ డ్రోన్ల కదలికలు పెరిగాయి. ఈ నేపథ్యంలో రక్షణ మంత్రి రాజ్నాథ్ సింగ్ ఘాటుగా స్పందించి, ‘‘మరో కవ్వింపు పాక్ భూభాగాన్నే ప్రమాదంలో పడేస్తుంది’’ అని వార్నింగ్ ఇచ్చారు. అదే సమయంలో బోర్డర్ వద్ద సైన్యం చర్యలు గమనించదగ్గవిగా మారాయి.
ఆపరేషన్ సిందూర్ జ్ఞాపకం
గత దఫా జరిగిన ‘ఆపరేషన్ సిందూర్’లో భారత సైన్యం పాకిస్తాన్ను తీవ్రంగా కొట్టింది. 96 గంటల యుద్ధంలో పాక్ వైమానిక దళం పూర్తిగా వెనుకంజ వేసింది. చివరికి సీజ్ఫైర్ అంగీకరించక తప్పలేదు. ఆ ఆపరేషన్ తర్వాత భారత్ అంతర్జాతీయ వేదికపై వ్యూహాత్మక ఆధిక్యం సాధించింది. ఇప్పుడు అదే ఘటన మరో రూపంలో పునరావతమయ్యే సూచనలు కనిపిస్తున్నాయి.
చరిత్రలో ముద్ర వేసిన పాకిస్తాన్ దాడులు
పాకిస్తాన్ ఆర్మీ చీఫ్ల రాజకీయ అవసరాల కోసం భారత్ను టార్గెట్ చేసి దాడులు చేపట్టిన గత చరిత్ర ఉంది.
– రాహిల్ షరీఫ్ (2016): పదవీకాలం పొడగించేందుకు యూరీ దాడి జరిగింది. భారత సైన్యం వెంటనే సర్జికల్ స్ట్రైక్ నిర్వహించింది. అయినా అతనికి పొడిగింపు దక్కలేదు.
– కమర్ జావెద్ బాజ్వా (2019): పుల్వామా ఘటనతో సీఆర్పీఎఫ్ జవాన్ల మరణాలు సంభవించాయి. ఆ దాడి తర్వాత బాజ్వా పదవీకాలం పొడిగించుకున్నారు.
– ఇప్పుడు ఆసిమ్ మునీర్ (2025): నవంబర్ 26లోపు ఆయన పదవీకాలం ముగుస్తుంది. పొడగింపు కోసం భారత్పైనా దాడి మార్గాన్ని ఎంచుకునే అవకాశం ఉందని విశ్లేషకులు సూచిస్తున్నారు.
ఆర్మీ చీఫ్ ఎంపిక..
పాకిస్తాన్లో ఆర్మీ చీఫ్ ఎంపిక పూర్తిగా రాజకీయ సమీకరణలపై ఆధారపడి ఉంటుంది. ప్రధానమంత్రి షరీఫ్–సైన్యం మధ్య ఉద్రిక్తతతో, మునీర్ తన స్థానాన్ని బలపరచుకోవాలనే ప్రయత్నంలో ఉన్నట్లు ఇంటెలిజెన్స్ వివరాలు సూచిస్తున్నాయి. భారతంపై ఆగ్రహభావం ప్రదర్శించడం, దేశంలో అసలు సమస్యల నుంచి దృష్టి మళ్లించడానికి ఇది ఉపయోగపడుతుంది.
భారత వైఖరి స్పష్టంగా
ఇటీవల ఎయిర్ఫోర్స్ చీఫ్ మరియు ఆర్మీ చీఫ్ ఇద్దరూ ‘‘యుద్ధం జరిగితే పాకిస్తాన్ పటంలో ఉండదు’’ అని హెచ్చరించారు. భారత్ ఆధునిక వైమానిక సామర్థ్యాలు, దీర్ఘశ్రేణి మిసైల్ వ్యవస్థలు, డ్రోన్ నిశిత సాంకేతికతతో సిద్ధంగా ఉందనే విషయం స్పష్టమైంది. గతంలో తిప్పికొట్టిన డ్రోన్ దాడులు, ఆర్మీ ప్రతిఘటనలు దీనికి నిదర్శనం. ఇండియా దృష్టికోణంలో పాకిస్తాన్ చర్యలు వ్యూహాత్మక కవ్వింపుగా కనిపిస్తున్నాయి. ఆర్థిక సంక్షోభం, అంతర్గత అసంతృప్తితో మునిగిపోతున్న దేశం, ప్రజాదృష్టిని మళ్లించాలనుకుంటోంది. రాజకీయ అస్థిరతకు ఉపశమనం కలిగించేది ‘‘భారత్–వ్యతిరేక యుద్ధమే’’ అన్న భావజాలం పాక్ సైన్యంలో మరింత బలపడుతోంది.
విస్ఫోటానికి సమీపంలో ఉన్న సరిహద్దు
సర్ క్రీక్, పఠాన్కోట్, పూంచ్ ప్రాంతాల్లో సర్వేలెన్స్ చర్యలు గట్టిగా కొనసాగుతున్నాయి. భారత సైన్యం ఆపరేషన్ ‘సిందూర్ 2.0’ పేరుతో సన్నద్ధత ప్రారంభించింది. ఈ యుద్ధం మొదలైతే, పాకిస్తాన్ రక్షణ వ్యవస్థ పూర్తిగా కూలిపోయే ప్రమాదం ఉన్నదని రక్షణ విశ్లేషకులు హెచ్చరిస్తున్నారు.
భారత్ చరిత్ర చెబుతోంది – కవ్వింపులకు తగిన సమాధానం ఇవ్వడంలో అది వెనుకడుగు వేయదు. ఆసిమ్ మునీర్ తన పదవీకాలం పొడిగించుకోవటానికి యుద్ధాన్ని ఎంచుకుంటే, ఈసారి ఫలితం చరిత్రాత్మకంగా మారే అవకాశం ఉంది పాకిస్తాన్ రాజకీయ భూగోళం మారిపోయే ప్రమాదం సాక్షాత్కారమవుతోంది.
