Chandrababu
Chandrababu: చంద్రబాబులో మార్పు స్పష్టంగా కనిపిస్తోంది. జైలుకెళ్లి వచ్చిన తర్వాత చంద్రబాబులో వాడి, వేడి పెరిగింది. ప్రత్యర్థులపై పదునైన విమర్శనాస్త్రాలతో విరుచుకుపడుతున్నారు. మంత్రులపై పంచులతో చెలరేగిపోతున్నారు. అప్ డేటెడ్ పొలిటీషియన్ గా ఎప్పటికప్పుడు ఆయా రాజకీయ పరిస్థితులకు తగ్గట్టు రాజకీయాలు చేయడం చంద్రబాబుకు అలవాటైన విద్య. అవినీతి కేసుల్లో సుదీర్ఘకాలం జైల్లో ఉండేసరికి.. రెట్టించిన ఉత్సాహంతో పని చేయడం ప్రారంభించారు.
రాష్ట్రవ్యాప్తంగా చంద్రబాబు పర్యటనలు జోరుగా సాగుతున్నాయి. ఏడుపదుల వయసులో కూడా ఉత్సాహంగా పనిచేస్తున్నారు. రాజకీయ యాత్రలు మొదలుపెట్టారు.’రా కదలి రా’ భారీ బహిరంగ సభలకు శ్రీకారం చుట్టారు. ప్రజలకు ఎడ్యుకేట్ చేస్తున్నారు. మంత్రులపై ఓ రేంజ్ లో సెటైర్లు పేల్చుతున్నారు.ఆచంట లో ఏర్పాటు చేసిన కార్యక్రమంలో అయితే చంద్రబాబు మంత్రులపై వేసిన పంచులు ఆకట్టుకున్నాయి. “డయా ఫ్రమ్ వాల్ అంటే తెలియని వ్యక్తి ఇరిగేషన్ మంత్రి. ధాన్యానికి సంచులు అందించలేని వ్యక్తి పౌరసరఫరాల శాఖ మంత్రి. పెట్టుబడులంటే కోడిగుడ్డు అనే వ్యక్తి ఐటి మంత్రి. కోర్టు ఫైళ్లు లేపేసేవాడు వ్యవసాయ మంత్రి” అంటూ చంద్రబాబు మాట్లాడే సరికి టిడిపి శ్రేణులు హర్షధ్వనాలు వ్యక్తం చేశాయి.
ఎక్కడా మంత్రుల పేర్లు చెప్పకుండానే చంద్రబాబు విమర్శనాస్త్రాలు సంధించడం విశేషం. గనులు మింగేసేవాడు గనుల శాఖ మంత్రి, క్లబ్బుల్లో డాన్సులు వేసుకునే వ్యక్తి మహిళా సంక్షేమ మంత్రి అంటూ చంద్రబాబు ఘాటు వ్యాఖ్యలు చేశారు. ప్రధానంగా మంత్రి రోజా తీరుపై వీరుచుకుపడ్డారు. ఏ ఒక్కరి పేరు చెప్పకుండా ప్రజలకు అర్థమయ్యేలా బాబు చేసిన ప్రసంగాన్ని చూసి టిడిపి అభిమానులు ఫిదా అయ్యారు. చంద్రబాబుతో రాజకీయం ఇలానే ఉంటుందని.. అదును చూసి దెబ్బ కొట్టడం ఆయన స్టైల్ అని టిడిపి అభిమానులు కామెంట్స్ చేస్తున్నారు. ఇక్కడ నుంచి చంద్రబాబు రాజకీయం ఇలానే కొనసాగుతుందని కూడా చెప్పుకొస్తున్నారు.
