Male Fertility Heat Exposure Risks: నేటి ఆధునిక జీవనశైలిలో ఆరోగ్యాన్ని కాపాడుకోవాల్సిన అవసరం చాలా ఉంది. ముఖ్యంగా ఇప్పటి పురుషుల్లో సంతానోత్పత్తి సమస్యలు చాలా వరకు చూస్తుననారు. వీరిలో స్పెర్మ్ సామర్థ్యం తగ్గడం ఒక సాధారణ సమస్యగా మారుతోంది. దీని వెనుక అనేక కారణాలు ఉన్నప్పటికీ, వైద్య నిపుణులు ప్రత్యేకంగా సూచించే అంశం శరీరంలో వేడి ఎక్కువగా ఉండడమే అని అంటున్నారు. అయితే ఈ వేడి మనం రోజూ ఉండే అలవాటల్లోనే ఎక్కువవుతుందని కొందరు వైద్యులు సూచిస్తున్నారు. ఆ అలవాట్లు ఏంటంటే?
పురుషుల్లో ఉండే వృషణాల ఉష్ణోగ్రత పెరిగినప్పుడు వీర్యకణాల ఉత్పత్తి ప్రక్రియ దెబ్బతింటుంది. దీని వల్ల స్పెర్మ్ కౌంట్ తగ్గడం.. కదలిక మందగించడం , ఆకృతి లోపాలు వంటి సమస్యలు వస్తాయి. దీర్ఘకాలంలో ఇది పురుషుల్లో వంధ్యత్వానికి దారితీయవచ్చు. ముఖ్యంగా నిరంతరం వేడి ప్రభావంలో ఉండే వారు ఈ సమస్యకు ఎక్కువగా గురవుతున్నారు.
అయితే మనకు తెలియకుండానే కొన్ని రోజువారీ అలవాట్లు వృషణాల ఉష్ణోగ్రతను పెంచుతున్నాయి. ల్యాప్టాప్ను ఒడిలో పెట్టుకుని పనిచేయడం వల్ల నేరుగా వేడి ప్రభావం పడుతుంది. టైట్ జీన్స్ లేదా గట్టిగా ఉండే లోదుస్తులు ధరించడం వల్ల గాలి ఆడక ఉష్ణోగ్రత పెరుగుతుంది. అలాగే కార్లలో హీటెడ్ సీట్లు, ఎక్కువసేపు కూర్చోవడం, బైక్పై దీర్ఘకాల ప్రయాణం కూడా ఈ సమస్యను మరింత పెంచుతాయి. వేడి నీటితో ఎక్కువసేపు స్నానం చేయడం, సౌనా లేదా స్టీమ్ బాత్లను తరచుగా ఉపయోగించడం కూడా వృషణాలపై ప్రతికూల ప్రభావం చూపుతాయి. అలాగే ఎక్కువసేపు ఒకే స్థితిలో కూర్చోవడం వల్ల రక్తప్రసరణ తగ్గి ఉష్ణోగ్రత పెరగడం జరుగుతుంది. ఈ అలవాట్లు క్రమంగా వీర్యకణాల నాణ్యతను దెబ్బతీస్తాయి.
ఫెర్టిలిటీని కాపాడుకోవాలంటే చిన్నచిన్న జాగ్రత్తలు తీసుకోవడం చాలా అవసరం. ల్యాప్టాప్ను ఎప్పుడూ టేబుల్పై పెట్టుకుని ఉపయోగించడం మంచిది. కాటన్ లోదుస్తులు ధరించడం ద్వారా గాలి ప్రసరణ సరిగ్గా జరుగుతుంది. టైట్ జీన్స్కు బదులుగా లూజ్గా ఉండే దుస్తులు ధరించాలి. బైక్ సీటు వేడి తగ్గిన తర్వాతే కూర్చోవడం మంచిది. అలాగే ఎక్కువసేపు కూర్చోకుండా మధ్య మధ్యలో లేచి నడవడం కూడా ఉపయోగకరం.
