Signs of Protein deficiency in Body: శరీరానికి అవసరమైన పోషకాల్లో ప్రోటీన్ కీలకమైనది. మన శరీర కణజాల నిర్మాణం, కండరాల బలం, రోగనిరోధక వ్యవస్థ పనితీరు అంతా ప్రోటీన్లపైనే ఆధారపడి ఉంటుంది. అయితే, ఆధునిక జీవనశైలిలో సరైన పోషకాహారం తీసుకోకపోవడం వల్ల అనేక మంది ప్రోటీన్ లోపం సమస్యను ఎదుర్కొంటున్నారు. కొంత మంది వైద్య నిపుణుల అభిప్రాయం ప్రకారం.. శరీరంలో ప్రోటీన్ స్థాయిలు పడిపోయినప్పుడు మన శరీరం కొన్ని హెచ్చరికలను జారీ చేస్తుంది. వీటిని గుర్తించి తగిన జాగ్రత్తలు తీసుకోవడం అత్యవసరం. మరి ప్రొటీన్ తక్కువైనప్పుడు ఎలాంటి హెచ్చరికలు వస్తాయి?
సాధారణంగా జుట్టు రాలడం , చర్మం పొడిబారడం వంటి లక్షణాలు కనిపిస్తే అది ప్రోటీన్ లోపానికి సంకేతం కావచ్చు. మన శరీరానికి అవసరమైనంత మోతాదులో ప్రోటీన్ అందనప్పుడు, అందుబాటులో ఉన్న కొద్దిపాటి ప్రోటీన్ను గుండె, మెదడు వంటి అత్యవసర అవయవాలు తమ పనితీరు కోసం వాడుకుంటాయి. దీనివల్ల చర్మం, జుట్టు, గోళ్ల వంటి తక్కువ ప్రాధాన్యత కలిగిన కణజాలాలకు పోషకాలు అందక అవి బలహీనపడతాయి. ఫలితంగా జుట్టు రాలడం, చర్మం జీవం కోల్పోయి పొడిబారడం వంటి సమస్యలు తలెత్తుతాయి.
ప్రోటీన్ లోపం ఉన్నవారిలో కడుపు నిండినట్లు అనిపించకపోవడం మరొక ప్రధాన సమస్య. సాధారణంగా ప్రోటీన్ ఎక్కువగా ఉన్న ఆహారం తీసుకున్నప్పుడు కడుపు నిండుగా ఉన్న అనుభూతి కలుగుతుంది. కానీ, డైట్లో ప్రోటీన్ లోపించినప్పుడు ఆ సంతృప్తి కలగదు. దీనివల్ల శరీరం తక్షణ శక్తి కోసం షుగర్స్ మరియు కార్బోహైడ్రేట్లపై ఆధారపడుతుంది. ఫలితంగా తరచుగా తీపి పదార్థాలు లేదా జంక్ ఫుడ్ తినాలనే కోరిక పెరిగి, బరువు పెరగడానికి లేదా జీవక్రియలో అసమతుల్యతకు దారితీస్తుంది.
శరీరం తరచూ ఇన్ఫెక్షన్లకు గురికావడం, జ్వరం రావడం కూడా ప్రోటీన్ లోపానికి నిదర్శనం. మన శరీరంలో రోగనిరోధక శక్తిని పెంచే యాంటీబాడీలు ప్రోటీన్లతోనే తయారవుతాయి. తగినంత ప్రోటీన్ లేకపోతే, శరీరం వ్యాధులతో పోరాడే సామర్థ్యాన్ని కోల్పోతుంది. దీనివల్ల చిన్నపాటి వైరల్ ఇన్ఫెక్షన్లు కూడా త్వరగా సోకడం, కోలుకోవడానికి ఎక్కువ సమయం పట్టడం జరుగుతుంది. కాబట్టి, పప్పు ధాన్యాలు, గుడ్లు, పాలు, మాంసం వంటి ప్రోటీన్ అధికంగా ఉండే ఆహారాన్ని రోజువారీ ఆహారంలో చేర్చుకోవడం ద్వారా ఈ సమస్యల నుంచి బయటపడవచ్చు.
