F3: అనిల్ రావిపుడి దర్శకత్వంలో విక్టరీ వెంకటేశ్- వరుణ్ తేజ్ కాంబినేషన్లో తెరకెక్కుతోన్న చిత్రం ఎఫ్3. తమన్న, మెహ్రిన్ హీరో హీరోయిన్లుగా నటించనున్నారు. కామెడీ ఎంటర్టైనర్గా తెరకెక్కుతోన్న సినిమా ఇది. గతంలో వీరి కాంబినేషన్లో వచ్చిన ఎఫ్2 ప్రేక్షకులను ఎంతగానో ఆకట్టుకుంది. ఈ క్రమంలోనే మరోసారి కామెడీతో నవ్వించేందుకు సిద్ధమయ్యింది చిత్రబృందం. సునీల్ ప్రత్యేక పాత్రలో కనిపించనున్నారు.
తాజాగా, దీపావళి కానుకగా ఓ వీడియోను విడుదల చేసింది చిత్రబృందం. అభిమానులకు దీపావళి శుభాకాంక్షలు చెబుతూ తారా జువ్వలు ఎగరేశారు. హైదరాబాద్లోని దుర్గం చెరువు కేబుల్ బ్రిడ్జ్ వద్ద సునీల్, వెంకటేశ్, వరుణ్తేజ్తో సహా దర్శకుడు అనిల్ రావిపుడి కలిసి అభిమానులకు దీపావళి శుభాకాంక్షలు తెలియజేశారు. దీంతో పాటు తారా జువ్వలు ఎగరేశారు. అలా దుర్గం చెరువు డ్రోన్ షాట్తో వీడియో ఎండ్ అయ్యింది. వచ్చే ఏడాది ఫిబ్రవరి 25న ఈ సినిమా విడుదల కానుంది. శ్రీ వెంకటేశ్వర క్రియేషన్స్పై దిల్రాజు ఈ సినిమాను నిర్మిస్తున్నారు. దేవిశ్రీ ప్రసాద్ సంగీతం అందిస్తున్నారు.
కాగా, 2019 సంక్రాంతి కానుకగా విడుదలైన ఎఫ్2.. ప్రేక్షకుల మనసు దోచుకుంది. అందులో కామెడీతో నవ్వులు పూయిస్తూనే.. సెంటిమెంటల్గా భార్య, భర్తల అనుబంధం గురించి చక్కగా వివరించారు. మరి ఈ సారి ఎలాంటి స్టోరీతో అనిల్ రావిపుడి థియేటర్లలోకి అడుగుపెట్టనున్నారో తెలియాలంటే సినిమా విడుదలయ్యేంతవరకు వేచి చూడాల్సిందే.