Maruti Suzuki Sales May 2026: భారత ఆటోమొబైల్ మార్కెట్లో మే 2026 నెల అమ్మకాల గణాంకాలు ఆసక్తికరంగా ఉన్నాయి. చిన్న కార్ల నుంచి SUVల వరకు వివిధ విభాగాలకు చెందిన వాహనాలు వినియోగదారుల ఆదరణ పొందాయి. ముఖ్యంగా Maruthi Suzuki తన ఆధిపత్యాన్ని మరోసారి నిరూపించుకోగా.. టాటా మోటార్స్, మహీంద్రా, హ్యుందాయ్ కంపెనీలు కూడా బలమైన పోటీని కొనసాగించాయి. మే నెలలో అత్యధికంగా అమ్ముడైన టాప్ 10 కార్ల జాబితాలో ఏ మోడళ్లు చోటు దక్కించుకున్నాయో చూద్దాం.
1. మారుతి సుజుకి డిజైర్
మే 2026లో అత్యధికంగా అమ్ముడైన కారుగా Maruti Suzuki Dzire నిలిచింది. ఈ కాంపాక్ట్ సెడాన్ మొత్తం 24,546 యూనిట్ల విక్రయాలు చేసుకుంది. గత ఏడాది మే నెలలో నమోదైన 18,084 యూనిట్లతో పోలిస్తే ఇది 36 శాతం వృద్ధి. కుటుంబ వినియోగానికి అనుకూలమైన డిజైన్, మెరుగైన మైలేజ్, అందుబాటు ధరలు ఈ కారుకు భారీ డిమాండ్ను తీసుకొచ్చాయి. దీని ధర రూ.6.26 లక్షల నుంచి రూ.9.31 లక్షల వరకు ఉంది.
2. ఫ్రాంక్స్కు భారీ డిమాండ్:
Maruti Suzuki Fronx మే నెలలో 20,686 యూనిట్ల అమ్మకాలతో రెండో స్థానాన్ని దక్కించుకుంది. గత ఏడాదితో పోలిస్తే 52 శాతం వృద్ధిని నమోదు చేయడం విశేషం. క్రాస్ఓవర్ SUV సెగ్మెంట్లో యువతను ఆకట్టుకుంటున్న ఫ్రాంక్స్, స్టైలిష్ లుక్తో పాటు ఆధునిక ఫీచర్ల కారణంగా వేగంగా ప్రజాదరణ పొందుతోంది. దీని ధర రూ.6.85 లక్షల నుంచి రూ.11.84 లక్షల వరకు ఉంది.
3. ఎర్టిగా:
MPV విభాగంలో అగ్రగామిగా ఉన్న Maruti Suzuki Ertiga వరుసగా రెండో నెల కూడా మూడో స్థానాన్ని నిలబెట్టుకుంది. మే 2026లో 20,350 యూనిట్లు విక్రయించి 26 శాతం వార్షిక వృద్ధిని నమోదు చేసింది. పెద్ద కుటుంబాలకు అనువైన సీటింగ్ సామర్థ్యం, మంచి మైలేజ్, నిర్వహణ ఖర్చులు తక్కువగా ఉండటం ఎర్టిగా విజయానికి ప్రధాన కారణాలు. దీని ధర రూ.8.80 లక్షల నుంచి రూ.12.94 లక్షల వరకు ఉంది.
4.మైక్రో ఎస్యూవీ విభాగంలో టాటా పంచ్..
Tata Punch, దాని ఎలక్ట్రిక్ వెర్షన్ కలిపి మే నెలలో 20,208 యూనిట్ల అమ్మకాలను నమోదు చేశాయి. ఇది 54 శాతం వార్షిక వృద్ధి. గతంలో రెండో స్థానంలో ఉన్న పంచ్, ఇతర మోడళ్ల వేగవంతమైన వృద్ధి కారణంగా నాలుగో స్థానానికి పడిపోయినా అమ్మకాల పరంగా బలమైన ప్రదర్శన కొనసాగించింది. ఈ శ్రేణి ధర రూ.5.65 లక్షల నుంచి రూ.10.60 లక్షల వరకు ఉంది.
5. టాటా నెక్సాన్ :
Tata Nexon , దాని ఈవీ వెర్షన్ కలిసి 19,100 యూనిట్ల అమ్మకాలతో ఐదో స్థానంలో నిలిచాయి. 46 శాతం వార్షిక వృద్ధి నమోదు చేసిన ఈ కాంపాక్ట్ ఎస్యూవీ పెట్రోల్, డీజిల్, ఎలక్ట్రిక్ ఎంపికలతో అందుబాటులో ఉండటం వినియోగదారులను ఆకర్షిస్తోంది. దీని ధర రూ.7.37 లక్షల నుంచి రూ.14.02 లక్షల వరకు ఉంది.
6. బాలెనో అమ్మకాల వృద్ధి:
Maruti Suzuki Baleno మే నెలలో 18,396 యూనిట్లు విక్రయించి ఈ జాబితాలో అత్యధికంగా 58 శాతం వార్షిక వృద్ధిని నమోదు చేసింది. ప్రీమియం హ్యాచ్బ్యాక్ విభాగంలో బాలెనోకు ఉన్న ఆదరణ ఇంకా తగ్గలేదని ఈ గణాంకాలు స్పష్టం చేస్తున్నాయి. దీని ధర రూ.5.99 లక్షల నుంచి రూ.9.10 లక్షల వరకు ఉంది.
7. వ్యాగన్ ఆర్ డిమాండ్ కొనసాగింపు:
Maruti Suzuki WagonR మే 2026లో 18,076 యూనిట్లు విక్రయించి ఏడో స్థానంలో నిలిచింది. 30 శాతం వార్షిక వృద్ధి సాధించినప్పటికీ నెలవారీ అమ్మకాలు కొంత తగ్గడంతో ర్యాంకింగ్లో రెండు స్థానాలు కోల్పోయింది. విశాలమైన క్యాబిన్, మంచి మైలేజ్ కారణంగా ఇది ఇప్పటికీ భారత కుటుంబాల ప్రియమైన హ్యాచ్బ్యాక్లలో ఒకటిగా కొనసాగుతోంది. ధర రూ.4.99 లక్షల నుంచి రూ.6.40 లక్షల వరకు ఉంది.
8. స్విఫ్ట్ సైతం..
Maruti Suzuki Swift మే నెలలో 17,519 యూనిట్ల అమ్మకాలతో ఎనిమిదో స్థానాన్ని దక్కించుకుంది. 24 శాతం వార్షిక వృద్ధిని నమోదు చేసిన ఈ హ్యాచ్బ్యాక్, స్పోర్టీ డిజైన్ , డ్రైవింగ్ అనుభవంతో యువతలో మంచి ఆదరణ పొందుతోంది. దీని ధర రూ.5.79 లక్షల నుంచి రూ.8.64 లక్షల వరకు ఉంది.
9. స్కార్పియో మెరుపు:
Mahindra Scorpio-N, స్కార్పియో క్లాసిక్ కలిపి 15,774 యూనిట్ల అమ్మకాలతో తొమ్మిదో స్థానంలో నిలిచాయి. 10 శాతం వార్షిక వృద్ధిని నమోదు చేసిన ఈ ఎస్యూవీ, ఏప్రిల్తో పోలిస్తే గణనీయమైన పెరుగుదల సాధించి హ్యుందాయ్ క్రెటాను వెనక్కి నెట్టింది. స్కార్పియో-ఎన్ ధర రూ.13.49 లక్షల నుంచి రూ.24.95 లక్షల వరకు ఉంది.
10. టాప్-10లో క్రెటా:
మిడ్సైజ్ SUV విభాగంలో బలమైన స్థానాన్ని కలిగి ఉన్న Hyundai Creta, దాని ఎలక్ట్రిక్ వెర్షన్ కలిసి 15,523 యూనిట్లు విక్రయించాయి. అయితే కేవలం 3 శాతం వార్షిక వృద్ధి మాత్రమే నమోదు కావడంతో ఈ జాబితాలో అత్యల్ప వృద్ధి రేటు కలిగిన మోడల్గా నిలిచింది. అయినప్పటికీ మార్కెట్లో తన ప్రాధాన్యాన్ని కొనసాగిస్తూ టాప్-10లో స్థానం దక్కించుకుంది. దీని ధర రూ.10.90 లక్షల నుంచి రూ.19.91 లక్షల వరకు ఉంది.
