Andhra Pradesh Schools Reopening 2026: ఏపీవ్యాప్తంగా ఈరోజు పాఠశాలలు తెరుచుకున్నాయి. 50 రోజుల వేసవి సెలవుల అనంతరం విద్యా సంస్థలు ప్రారంభం అయ్యాయి ఈరోజు. వేసవి ఉష్ణోగ్రతలతో సెలవులు పొడిగిస్తారు అన్న ప్రచారం సాగింది. కానీ అటువంటి వాటిని నమ్మవద్దు అని కోరుతూ ప్రభుత్వం ప్రత్యేక ప్రకటన జారీ చేసింది. ఏప్రిల్ 24 నుంచి వేసవి సెలవులు ప్రకటించింది ప్రభుత్వం. ఈరోజు నుంచి విద్యా సంవత్సరం ప్రారంభం కావడంతో.. అకడమిక్ క్యాలెండర్ ను విడుదల చేసింది ఏపీ ప్రభుత్వం. ఈ విద్యా సంవత్సరంలో మొత్తం 229 పని దినాలు ఉన్నాయి. సెలవులతో పాటు ఆదివారాలను కలుపుకొని మొత్తం 87 సెలవులు ఉండనున్నాయి.
* పండుగ సెలవులు ఎన్నంటే?
విద్యాశాఖ తాజాగా విడుదల చేసిన క్యాలెండర్ ప్రకారం దసరాతో పాటు సంక్రాంతి సెలవులను సైతం ప్రకటించింది. అక్టోబర్ 12 నుంచి 21 వరకు దసరా సెలవులు ఉండనున్నాయి. పది రోజులపాటు దసరా సెలవులు కొనసాగనున్నాయి. క్రిస్మస్ సందర్భంగా డిసెంబర్ 20 నుంచి డిసెంబర్ 27 వరకు సెలవులు ప్రకటించారు.. అయితే ఇవి కేవలం క్రిస్టియన్ మైనారిటీ పాఠశాలల్లో చదువుతున్న విద్యార్థులకు మాత్రమే. మరోవైపు రాష్ట్రంలో అత్యంత ముఖ్యమైన పండగల్లో సంక్రాంతి ఒకటి. జనవరి 11 నుంచి 17 వరకు కేవలం వారం రోజులపాటు సంక్రాంతి సెలవులను ప్రకటించారు. మరోవైపు ఆదివారాలతో పాటు ప్రత్యేక పర్వదినాలు, రెండో శనివారాలు సైతం సెలవులను ప్రకటించారు. ఇలా అన్ని సెలవులు కలుపుకొని 87 ఉండనున్నాయి.
* నో బ్యాగ్ డే పై ఆదేశాలు..
మరోవైపు ప్రతి శనివారం నో బ్యాగ్ డే ను తప్పకుండా అమలు చేయాలని ప్రభుత్వం స్పష్టమైన ఆదేశాలు జారీ చేసింది. విద్యార్థులపై చదువుల ఒత్తిడి తగ్గించేందుకు, పుస్తకాల బరువు లేకుండా, సృజనాత్మక, క్రీడా మరియు నైపుణ్యాభివృద్ధి కార్యక్రమంలో భాగంగా నో బ్యాగ్ డేను అమలు చేయాలని నిర్ణయించింది. మరోవైపు పదో తరగతి పబ్లిక్ పరీక్షలు మార్చి 15 నుంచి 31 వరకు నిర్వహించనున్నట్లు ఈ క్యాలెండర్ లో పేర్కొంది. విద్యార్థులతో పాటు తల్లిదండ్రులు విద్యాశాఖ విడుదల చేసిన అకడమిక్ క్యాలెండర్ను పరిశీలించి తమ విద్యాప్రణాళికలను రూపొందించుకోవచ్చు.