AP Rain Alert: ఏపీకి( Andhra Pradesh) భారీ వర్ష సూచన. బంగాళాఖాతంలో ఏర్పడిన ఉపరితల ఆవర్తనం బలపడింది. అల్పపీడనంగా మారనుంది. దీని ప్రభావంతో ఏపీలో విస్తారంగా వర్షాలు పడే అవకాశం కనిపిస్తోంది. ముఖ్యంగా ఉత్తరాంధ్రతో పాటు ఉత్తర కోస్తాకు భారీ వర్ష సూచన ఉంది. రాయలసీమలో సైతం సాధారణ వర్షాలు నమోదు అయ్యే అవకాశం ఉంది. బంగాళాఖాతం వాయువ్య ప్రాంతంలో ఉపరితల ఆవర్తనం ఏర్పడింది. రాగల 24 గంటల్లో ఇది అల్పపీడనంగా మారనుంది. దీని ప్రభావంతో వర్షాలు విస్తారంగా పడతాయని వాతావరణ శాఖ అంచనా వేస్తోంది. భారీ వర్షాలు నమోదు కానుండడంతో ఏపీ విపత్తుల నిర్వహణ సంస్థ అప్రమత్తం అయ్యింది.
Also Read: ఏపీకి దిగ్గజ ఐటీ సంస్థ.. సంచలన ప్రకటన!
* భారీ వర్షాలు నమోదు
ఉపరితల ఆవర్తన ప్రభావంతో చాలా జిల్లాల్లో వర్షాలు పడుతున్నాయి. ముఖ్యంగా ఉత్తర కోస్తాలో( North coastal ) వర్షాలు పడ్డాయి. తూర్పుగోదావరి జిల్లా నాగంపల్లి లో అత్యధికంగా 49 మిల్లీమీటర్ల వర్షపాతం నమోదయింది. విశాఖ రూరల్ లో 37.7, ఎన్టీఆర్ జిల్లా మునకుళ్ళలో 36.5, అల్లూరి సీతారామరాజు జిల్లా కూనవరంలో 35.7, విశాఖ జిల్లా ఎండాడలో 35.7, సీతమ్మధారలో 35.5 మిల్లీమీటర్ల వర్షపాతం నమోదయింది. మరోవైపు ఉపరితల ఆవర్తనం మరింత బలపడనుంది. వాయువ్య బంగాళాఖాతంలో వచ్చే 24 గంటల్లో అల్పపీడనం ఏర్పడనుంది.
* ఈ జిల్లాల్లో వర్షాలు..
ఈరోజు శ్రీకాకుళం( Srikakulam), విజయనగరం, పార్వతీపురం మన్యం, అల్లూరి సీతారామరాజు, కాకినాడ, తూర్పుగోదావరి, ఏలూరు జిల్లాల్లో భారీ వర్షాలు కురిసే అవకాశం ఉంది. ఉరుములతో పాటు పిడుగులు పడే అవకాశం కనిపిస్తోంది. పిడుగులు పడే అవకాశం ఉన్నందున ప్రజలు జాగ్రత్తగా ఉండాలని విపత్తుల నిర్వహణ సంస్థ సూచిస్తోంది. మరోవైపు విశాఖపట్నం, అనకాపల్లి, అంబేద్కర్ కోనసీమ, పశ్చిమగోదావరి,కృష్ణా, ఎన్టీఆర్,గుంటూరు, బాపట్ల, పలనాడు, ప్రకాశం, నెల్లూరు, కర్నూలు,నంద్యాల, అనంతపురం, శ్రీ సత్యసాయి పుట్టపర్తి, వైయస్సార్ కడప, అన్నమయ్య, రాయచోటి,చిత్తూరు, తిరుపతి జిల్లాల్లో సైతం సాధారణ వర్షాలు పడతాయని వాతావరణ శాఖ చెబుతోంది.
* రుతుపవనాల విస్తరణకు అనుకూలం
ప్రస్తుతం రుతుపవనాల విస్తరణకు అవసరమైన అనుకూల వాతావరణం ఏర్పడింది. దీంతో బంగాళాఖాతంలో మరిన్ని ఆవర్తనాలు ఏర్పడతాయని వాతావరణ శాఖ చెబుతోంది. ఈ ఏడాది ముందుగానే రుతుపవనాలు ప్రవేశించాయి. దీంతో మే నెలలోనే దేశవ్యాప్తంగా వర్షాలు ప్రారంభం అయ్యాయి. ఉత్తరాది రాష్ట్రాల్లో భారీ వర్షాలు కురిసాయి. దక్షిణ రాష్ట్రాలకు సంబంధించి కర్ణాటకలో భారీ వర్షాలు నమోదయ్యాయి. ఏపీవ్యాప్తంగా కూడా వర్షాలు పడ్డాయి. ఇప్పుడు తాజాగా అల్పపీడనం ఏర్పడడంతో భారీ వర్షాలు నమోదయ్యే అవకాశం కనిపిస్తోంది.
