Bigg Boss – 7 : బిగ్ బాస్ రియాలిటీ షో పట్ల జనాల్లో భారీ హైప్ ఉంది. గత ఐదు సీజన్స్ సూపర్ సక్సెస్ అయ్యాయి. భారీ టీఆర్పీ రాబట్టాయి. సీజన్ 6 మాత్రం నిరాశపరిచింది. పలు కారణాలతో ఈ సీజన్ కి కనీస ఆదరణ దక్కలేదు. అవే పాత గేమ్స్ తో ఇబ్బంది పెట్టారు. కంటెస్టెంట్స్ లో పస లేదు. నాగార్జున హోస్టింగ్ కూడా ఈసారి తేలిపోయిందన్నమాట వినిపించింది. అలాగే కంటెస్టెంట్స్ ఎలిమినేషన్ నుండి విజేతను నిర్ణయించడం వరకు విమర్శలు వెల్లువెత్తాయి.
సీజన్ 6 వైఫల్యాలను అధిగమించి ప్రేక్షకులను కట్టిపడేసేలా ప్రణాళికలు సిద్ధం చేస్తున్నారట. అందులో భాగంగా కొంచెం పేరున్న కంటెస్టెంట్స్ ని ఎంపిక చేయాలని భావిస్తున్నారట. ఇప్పటికే కంటెస్టెంట్స్ ఎంపిక ప్రక్రియ మొదలైందట. ఈ క్రమంలో కొందరి పేర్లు తెరపైకి వస్తున్నాయి. నిజంగా వారందరూ హౌస్లోకి వెళితే రచ్చ రచ్చే అని చెప్పొచ్చు.
ప్రచారం అవుతున్న లిస్ట్ ప్రకారం… సీరియల్ నటుడు అమర్ దీప్, అతని భార్య, యాంకర్ దీపికా పిల్లి, రష్మీ గౌతమ్, నటి ఐశ్వర్య, యూట్యూబర్ నిఖిల్, సింగర్ హేమచంద్ర, నటి మిత్రా శర్మ, డాన్సర్ శ్వేతా నాయుడు, ట్రాన్సజెండర్ తన్మయి, మోడల్ సాయి రోనక్, న్యూస్ రీడర్ ప్రత్యూష, సింగర్ మోహన భోగరాజు, సింగర్ మంగలి, కామన్ మాన్ కేటగిరీలో పల్లవి ప్రశాంత్, ఎంపికయ్యారట.
ప్రచారంలో ఉన్న ఈ లిస్ట్ దాదాపు ఖాయమే అంటున్నారు. మరి హోస్ట్ సంగతి ఏంటనే మాట వినిపిస్తోంది. నాగార్జున హోస్టింగ్ గత సీజన్లో విమర్శలపాలు కాగా ఆయననే కొనసాగిస్తారా? లేదంటే కొత్త హోస్ట్ ని రంగంలోకి దించుతారా? అనేది చూడాలి. రానా, బాలకృష్ణ వంటి స్టార్స్ పేర్లు వినిపిస్తున్నాయి. ఎన్టీఆర్ పట్ల మేకర్స్ ఆసక్తిగా ఉన్నా ఆయనకు తీరిక లేదు. జులై చివరి వారం లేదా ఆగస్టు ప్రారంభంలో బిగ్ బాస్ సీజన్ 7 స్టార్ట్ అవుతుందని అంటున్నారు
