Bangladesh vs Australia Series: క్రికెట్ గురించి ప్రస్తావన వస్తే కచ్చితంగా అందులో ఆస్ట్రేలియా జట్టుకు ప్రథమ స్థానం ఉంటుంది. ఇంగ్లాండ్లో క్రికెట్ పుట్టినప్పటికీ.. ఆ క్రీడలో ఆస్ట్రేలియా జట్టు తిరుగులేని ఆధిపత్యాన్ని కొనసాగించింది. బ్యాటింగ్.. బౌలింగ్.. ఫీల్డింగ్ ఇలా అన్ని విభాగాలలో సరికొత్త ప్రమాణాలను ఆస్ట్రేలియా జట్టు నెలకొల్పింది. వన్డే వరల్డ్ కప్ లను ఏకంగా ఆరుసార్లు సొంతం చేసుకుని సరికొత్త రికార్డు సృష్టించింది ఆస్ట్రేలియా జట్టు.
అద్భుతమైన ప్లేయర్లతో నిండి ఉండే ఆస్ట్రేలియా జట్టు ఇప్పుడు తడబడుతోంది. కనీసం తమ జట్టు పేరును కూడా కలలో కూడా కలవరించడానికి భయపడే జట్ల చేతిలో ఊడిపోతుంది. దీంతో ఆస్ట్రేలియా క్రికెట్ జట్టుకు ఏమైంది అనే చర్చ మొదలైంది. ఆస్ట్రేలియా జట్టు 2023లో వన్డే వరల్డ్ కప్ సాధించింది. ఆ తర్వాత ఐసీసీ టోర్నీలలో ఆ స్థాయిలో సత్తా చూపించలేదు. వరల్డ్ టెస్ట్ ఛాంపియన్ ఫైనల్స్ లో దక్షిణాఫ్రికా చేతిలో ఓడిపోయింది. ఛాంపియన్స్ ట్రోఫీలో సత్తా చూపించలేకపోయింది. టి20 వరల్డ్ కప్ లో కూడా తన జోరు కొనసాగించలేకపోయింది. ఫలితంగా ఆస్ట్రేలియా క్రికెట్ మీద రకరకాల సందేహాలు వ్యక్తం అవుతున్నాయి. ఇవన్నీ ఇలా సాగుతుండగానే ఆస్ట్రేలియా జట్టు దారుణమైన ఓటములను మూట కట్టుకోవాల్సి వస్తోంది.
ముఖ్యంగా వైట్ బాల్ ఫార్మేట్ లో ఆస్ట్రేలియా జట్టు పాకిస్తాన్ చేతిలో వన్డే సిరీస్ కోల్పోయింది. అది కూడా పాకిస్తాన్ దేశంలో.. ఆస్ట్రేలియా బ్యాటర్లు ఏమాత్రం సత్తా చూపించలేదు ఆ సిరీస్లో. చివరికి బంగ్లాదేశ్ చేతిలో కూడా ఆస్ట్రేలియా జట్టు వన్డే సిరీస్ కోల్పోవాల్సి వచ్చింది. బంగ్లాదేశ్ వేదికగా జరుగుతున్న 3 వన్డేల సిరీస్లో ఆస్ట్రేలియా జట్టు ఇప్పటికే వరుసగా రెండు మ్యాచ్లు ఓడిపోయింది. దీంతో బంగ్లాదేశ్ తొలిసారిగా ఆస్ట్రేలియాపై అంతర్జాతీయ వన్డే సిరీస్ ట్రోఫీని అందుకుంది.. ఆస్ట్రేలియాపై దాదాపు 21 సంవత్సరాల తర్వాత బంగ్లాదేశ్ జట్టు తొలి వన్డే సిరీస్ దక్కించుకుంది.. ఆస్ట్రేలియా జట్టు చేతిలో గతంలో ఆడిన 4 వన్డే సిరీస్ లను బంగ్లాదేశ్ కోల్పోయింది. 2005లో ఇంగ్లాండ్ లో జరిగిన ట్రై సిరీస్లో ఆస్ట్రేలియాపై బంగ్లాదేశ్ విజయం సాధించింది. 2021లో టి20 వరల్డ్ కప్ లో ఆస్ట్రేలియా మీద బాంగ్లాదేశ్ విజయం సాధించింది. ఆ తర్వాత మళ్లీ ఇప్పుడు తొలి వన్డే సిరీస్ విజయాన్ని అందుకుంది.
బంగ్లాదేశ్ సిరీస్ ను ఆస్ట్రేలియా మేనేజ్మెంట్ అంతగా పట్టించుకున్నట్టు కనిపించడం లేదు. అందువల్లే మామూలు ప్లేయర్లను ఈ సిరీస్ కు పంపించింది. అయితే ఈ సిరీస్లో బంగ్లాదేశ్ ప్లేయర్లు కట్టుదిట్టంగా ఆడారు. ఆస్ట్రేలియా ప్లేయర్లకు ఏమాత్రం అవకాశం ఇవ్వకుండా బ్యాటింగ్.. బౌలింగ్ చేశారు. దీంతో ఆస్ట్రేలియా తలవంచక తప్పలేదు. తొలి వన్డేలో ఓడిపోయిన ఆస్ట్రేలియా జట్టు.. రెండవ వన్డేలో కూడా ఓటమిపాలైంది. ఫలితంగా అనామకమైన బంగ్లాదేశ్ చేతిలో సిరీస్ కోల్పోవాల్సి వచ్చింది. ఆస్ట్రేలియా జట్టు ఇటీవల పాకిస్తాన్ చేతిలో.. ఇప్పుడు బంగ్లాదేశ్ చేతిలో సిరీస్ కోల్పోవడం ఆ జట్టు అభిమానులకు ఆందోళన కలిగిస్తోంది. వన్డే ప్రపంచ కప్ ముందు ఆస్ట్రేలియా ఇలా ఆడటాన్ని ఆ జట్టు అభిమానులు జీర్ణించుకోలేకపోతున్నారు.
