Param Ekadashi 2026: హిందూ ధర్మంలో ఏకాదశి తిథికి అత్యంత ప్రాముఖ్యత ఉంది. అయితే మూడు సంవత్సరాలకు ఒకసారి మాత్రమే వచ్చే పరమ ఏకాదశి మరింత విశిష్టమైనదిగా భావిస్తారు. అధిక మాసంలో కృష్ణ పక్ష ఏకాదశి రోజున వచ్చే ఈ పవిత్ర తిథిని భక్తులు అత్యంత భక్తిశ్రద్ధలతో ఆచరిస్తారు. 2026 జూన్ 11న వచ్చే ఈ రోజున శ్రీమహావిష్ణువును ఆరాధించి ఉపవాసం ఉండటం ద్వారా పాపాల నుంచి విముక్తి లభించడంతో పాటు మోక్షప్రాప్తి కలుగుతుందని పురాణాలు చెబుతున్నాయి. పరమ ఏకాదశి గురించి పూర్తి వివరాల్లోకి వెళితే..
పరమ ఏకాదశి రోజున ఉపవాసం చేయడం కేవలం ఆహారం మానేయడం మాత్రమే కాదు. ఇది శరీర శుద్ధితో పాటు మనస్సు, ఆలోచనలు, ప్రవర్తనను కూడా పవిత్రంగా ఉంచే ఆధ్యాత్మిక సాధనగా భావిస్తారు. భక్తులు రోజంతా విష్ణు నామస్మరణ, విష్ణు సహస్రనామ పారాయణం, భగవద్గీత పఠనం వంటి ఆధ్యాత్మిక కార్యక్రమాల్లో పాల్గొంటారు. ఈ విధంగా భక్తితో గడపడం వల్ల మనశ్శాంతి, ఆత్మసంతృప్తి కలుగుతాయని విశ్వాసం.
పండితుల సూచనల ప్రకారం.. పరమ ఏకాదశి ఉపవాసాన్ని పాటించేవారు ముందురోజు నుంచే కొన్ని నియమాలు అనుసరించాలి. ముఖ్యంగా బ్రహ్మచర్యం పాటించడం, సాత్విక ఆహారం తీసుకోవడం, కోపం మరియు అనవసర వాదనలకు దూరంగా ఉండడం అవసరం. ఉపవాసం అనేది శరీర నియంత్రణతో పాటు ఇంద్రియ నియంత్రణకు కూడా ప్రతీకగా భావిస్తారు.
ఏకాదశి రోజున పగటి సమయంలో నిద్రపోవడం మంచిది కాదని శాస్త్రాలు సూచిస్తున్నాయి. ఈ రోజు వీలైనంత వరకు జపం, ధ్యానం, భజనలు లేదా పుణ్యగ్రంథాల పఠనంలో సమయాన్ని గడపాలని చెబుతారు. అలాగే అహింసను పాటించడం, జీవుల పట్ల దయా భావం కలిగి ఉండడం కూడా ఈ వ్రతంలో ముఖ్యమైన భాగంగా పరిగణిస్తారు.
ఈ రోజున తులసి ఆకులను తుంచకూడదని పండితులు చెబుతున్నారు. తులసి దేవిని విష్ణుమూర్తికి అత్యంత ప్రీతిపాత్రమైనదిగా భావిస్తారు. అందువల్ల ఏకాదశి రోజున తులసిని కోయడం శాస్త్ర విరుద్ధమని చెబుతారు. ముందుగానే తులసి దళాలను సేకరించి పూజలో ఉపయోగించడం ఉత్తమమని సూచిస్తున్నారు.
ఉపవాసం చేసేవారు సాధ్యమైనంత వరకు ఉప్పు తినకుండా ఉండాలని సంప్రదాయం. కొందరు పూర్తిగా నిరాహారంగా ఉండగా, మరికొందరు పండ్లు, పాలు వంటి ఫలాహారం మాత్రమే తీసుకుంటారు. శరీరానికి ఇబ్బంది కలగకుండా తమ ఆరోగ్య పరిస్థితిని బట్టి ఉపవాసాన్ని ఆచరించవచ్చు.
పరమ ఏకాదశి రోజున మాటలు, ఆలోచనలు కూడా పవిత్రంగా ఉండాలని ధర్మశాస్త్రాలు చెబుతున్నాయి. ఇతరుల గురించి చెడుగా మాట్లాడడం, విమర్శించడం, అసూయ, ద్వేషం, కోపం వంటి ప్రతికూల భావాలను దూరం పెట్టాలి. అలాగే తిట్టడం, అబద్ధాలు చెప్పడం, అనవసర కలహాలు సృష్టించడం వంటి చర్యలను పూర్తిగా నివారించాలని సూచిస్తున్నారు.
పురాణాల ప్రకారం పరమ ఏకాదశి వ్రతాన్ని భక్తిశ్రద్ధలతో ఆచరించిన వారికి విష్ణుమూర్తి అనుగ్రహం లభించి, గత జన్మల పాపాలు కూడా తొలగుతాయని నమ్మకం. కుటుంబ సౌఖ్యం, ఆరోగ్యం, ఐశ్వర్యం, ఆధ్యాత్మిక పురోగతి కోసం లక్షలాది మంది భక్తులు ఈ పవిత్ర తిథిని ఎంతో భక్తితో జరుపుకుంటారు. అందుకే పరమ ఏకాదశిని సాధారణ ఏకాదశి కంటే మరింత మహిమాన్వితమైనదిగా హిందూ సంప్రదాయం పేర్కొంటుంది.
